Kimnin' o'ltirgeni biyma'lim o'liler haqqında(1-9),Tutqıng'a tu'sken qızg'a u'yleniw haqqında(10-14),Tun'g'ısh uldın' miyraslıq huqıqı(15-17),Boysınbaytug'ın ul(18-21),Ha'r tu'rli nızamlar(22-23).
Nızamnın' qaytalanıwı 21 bob
1 «Qudayın'ız Jaratqan İye sizlerge mu'lik etip berip atırg'an elde dalada jatırg'an bir o'li dene tabılsa ha'm onı kimnin' o'ltirgeni belgisiz bolsa,
2 aqsaqalların'ız ha'm qazıların'ız barıp, sol o'linin' do'geregindegi jaqın qalalardın' aralıg'ın o'lshep shıqsın.
3 O'lige jaqın bolg'an qalanın' aqsaqalları ele jumısqa qosılmag'an, moyıntırıq tag'ılmag'an bir qashardı alsın.
4 Qala aqsaqalları qashardı jeri su'rilmegen, g'a'lle egilmegen ha'm ishinde ha'mme waqıtta suw ag'ıp turatug'ın bir sayg'a alıp barsın. Sol sayda qashardın' moynın sındırsın.
5 Lebiyli ruwxaniyler de sol jerge barsın. O'ytkeni Qudayın'ız Jaratqan İye Mag'an xızmet etsin ha'm Menin' atım menen xalıqtı jarılqasın dep, Lebiy urıwın tan'lap aldı. Ha'r tu'rli ja'njellerdi ha'm bir-birewge zorlıq qılıw ma'selelerin olar sheshedi.
6 O'li dene tabılg'an jerge en' jaqın bolg'an qalanın' aqsaqalları sayda moynı sındırılg'an qashardın' u'stine qolların juwıp,
7 bılay dep aytsın: „Bul adamnın' qanın to'kken bizlerdin' qollarımız emes, bunı kimnin' qılg'anın da ko'rmedik.
8 Jaratqan İye, O'zin' Mısırdan azat etken xalqın' izraillılardı keshire go'r. Xalqın' İzraildı ayıpsız to'gilgen qang'a juwapker qılma“. Sonnan keyin, olar to'gilgen qannın' juwapkershiliginen azat boladı.
9 Sonda Jaratqan İyenin' na'zerinde tuwrı islerdi qılg'an bolasız, aran'ızdag'ı ayıpsız qandı to'giw gu'nasınan o'zlerin'izdi tazalaysız».
10 «Qudayın'ız Jaratqan İye sawashta dushpanların'ızdı sizlerge ta'slim qılg'anda ha'm sizler olardı tutqın qılg'anın'ızda,
11 olardın' arasınan sulıw bir qızdı ko'rip, unatıp qalsan'ız, onda og'an u'yleniwin'izge boladı.
12 Sol qızdı u'yin'izge a'kelin'. Qız shashın qırqıp, tırnaqların alıp taslasın.
13 Ol u'stindegi tutqınlıq kiyimin almastırsın ha'm bir ay dawamında a'kesheshesin joqlap, u'yin'izde jasasın. Keyin jigit qızg'a jaqınlap, og'an ku'yew, qız onın' hayalı boladı.
14 Eger keyinirek qız jigitke unamay qalsa, onı azat qılıp jibersin. Sol qızdı hayal bolıwg'a ma'jbu'rlegeni ushın, onı pulg'a satpasın ha'm og'an qul sıpatında qatnas jasamasın».
15 «Eger bir adamnın' eki hayalı bolsa, ol birewin su'yip, ekinshisin jaqsı ko'rmese, ekewi de og'an bir uldan tuwıp berse, tun'g'ısh ulı jaqsı ko'rmeytug'ın hayalının' balası bolsa,
16 onda ol adam mal-mu'lkin ullarına miyras etip bo'listirgen ku'ni jaqsı ko'rgen hayalının' balasın u'stin qoyıp, og'an tun'g'ıshlıq huqıqın bermesin.
17 Jaqsı ko'rmeytug'ın hayalının' balasın tun'g'ısh ul dep ta'n alsın ha'm og'an barlıq mal-mu'lkinen eki ese etip miyras bersin. O'ytkeni sol ul a'kesinin' belindegi ku'shtin' birinshi jemisi boladı. Tun'g'ıshlıq huqıq og'an tiyisli».
18 «Eger de bir adamnın' tentek, qaysar, ata-anasına boysınbaytug'ın, onı qansha jazalasa da, tın'lamaytug'ın bir ulı bolsa,
19 onda ata-anası onı uslap, qala da'rwazasında ma'sele sheshetug'ın qala aqsaqallarının' aldına alıp kelsin.
20 Balanın' ata-anası olarg'a bılay dep aytsın: „Ulımız tentek ha'm boysınbaydı. Bizlerdin' so'zlerimizge qulaq salmaydı. Ol tamaqsaw ha'm ma'sku'nem“.
21 Sonnan keyin, qalanın' barlıq adamları sol balanı tas boran qılıp o'ltirsin. Solay etip, aran'ızdag'ı jawızlıqtı joq qılın'lar. Pu'tkil İzrail xalqı bul haqqında esitip, qorqatug'ın boladı».
22 «Eger bir adam o'lim jazasına tartılatug'ın gu'na islese, sizler onı o'ltirip, ag'ashqa asıp qoysan'ız,
23 o'li deneni tu'n boyı ag'ashta asıwlı qaldırman'. Onı sol ku'ni jerlen'ler. O'ytkeni ag'ashqa asılg'an adam Quday ta'repinen na'letlengendur. Qudayın'ız Jaratqan İye sizlerge mu'lik etip berip atırg'an eldi haramlaman'lar».
