Nızamnın' qaytalanıwı 20 bob
1 «Sizler dushpanların'ızg'a qarsı sawashqa shıg'ıw ushın barg'anın'ızda, olardın' atları, sawash arbaları ha'm sizlerden go're ko'p a'skerleri bar ekenin ko'rsen'iz, olardan qorqpan'lar. O'ytkeni sizlerdi Mısırdan alıp shıqqan Qudayın'ız Jaratqan İye sizlerge yar boladı.
2 Sawash baslamasın'ızdan aldın ruwxaniy kelip, a'skerlerdin' aldına shıg'ıp, so'z so'ylep,
3 olarg'a bılay dep aytsın: „Ha'y, izraillılar, qulaq salın'lar! Bu'gin sizler dushpanların'ızg'a qarsı sawashqa baratırsız. Ruwxın'ız tu'spesin, qorqpan'lar. Qa'weterge tu'sip, olardan seskenben'ler.
4 Qudayın'ız Jaratqan İyenin' O'zi sizler menen birge urısqa baradı! Ol sizler ushın dushpanların'ızg'a qarsı urısıp, sizlerge jen'is beredi!“
5 Qadag'alawshılar a'skerlerge bılay dep aytsın: „Aran'ızda taza u'y qurg'an ha'm og'an ko'ship barıp, qollanıwg'a u'lgermegen adam bar ma? Eger bar bolsa, u'yine qaytsın. Ol urısta qaytıs bolsa, onın' u'yine basqa birew ko'ship barıp, jasaydı.
6 Ju'zimzar egip, onın' miywesinen tatpag'an adam bar ma? Eger bar bolsa, u'yine qaytsın. Ol urısta qaytıs bolsa, onın' ju'zimin basqa birew terip aladı.
7 Bir qız benen atastırılıp bolıp, u'ylenbegen adam bar ma? Eger bar bolsa, u'yine qaytsın. Ol urısta qaytıs bolsa, sol qızg'a basqa birew u'ylenip ketedi“.
8 Qadag'alawshılar ja'ne bılay dep aytsın: „Aran'ızda qorqıp, ruwxı tu'sken adam bar ma? Bar bolsa, u'yine qaytsın. Bolmasa, tuwısqanları da og'an uqsap qorqısıp qaladı“.
9 Qadag'alawshılar a'skerlerge usı so'zlerdi aytıp bolg'annan son', a'skerbasılar a'skerlerdin' u'stinen basshılıq etsin.
10 Bir qalag'a qarsı hu'jim etiw ushın, og'an jaqınlasqanın'ızda, qala xalqına tınıshlıq jolı menen ta'slim bolıwın usının'lar.
11 Eger de olar usı tınıshlıq usınısın'ızdı qabıllap, da'rwazaların sizlerge ashıp berse, onda qalada jasaytug'ınlardın' ha'mmesi erksiz xızmetshige aylanıp, sizler ushın jumıs isleydi.
12 Biraq tınıshlıq usınısın'ızdı qala xalqı qabıllamay, sizler menen urısıwdı qa'lese, onda qalanı qorshap alın'lar.
13 Qudayın'ız Jaratqan İye qalanı sizlerge ta'slim qılg'anda, ol jerde jasap atırg'an barlıq erkeklerdi qılısh ju'zinen o'tkizin'ler.
14 Hayallardı, balalardı, haywanlardı ha'm qaladag'ı ha'r bir na'rseni o'zlerin'izge olja etip alın'lar. Qudayın'ız Jaratqan İyenin' sizlerge bergen dushpanın'ızdın' mal-mu'liklerin qollanıwın'ızg'a boladı.
15 Sizler iyelep alatug'ın elin'izden uzaqta jaylasqan qalalarg'a usılay islen'ler.
16 Biraq Qudayın'ız Jaratqan İye sizlerge mu'lik etip berip atırg'an jerdegi qalalarda hesh bir tiri jan qaldırman'lar.
17 Qudayın'ız Jaratqan İyenin' sizlerge buyırg'anınday, xet, amor, qanan, periz, xiw ha'm ebus xalıqların pu'tkilley qırıp taslan'lar.
18 Bolmasa, olar o'zlerinin' qudaylarına tabınıp, isleytug'ın jerkenishli islerin sizlerge u'yretedi ha'm sizler de Qudayın'ız Jaratqan İyege qarsı gu'na isleysiz.
19 Eger de bir qalanı qolg'a alıw ushın, uzaq waqıt qorshap tursan'ız, onın' do'geregindegi miywe ag'ashlardı shawıp, joq qılman'lar. Olardın' miywelerin jewin'izge boladı, biraq shawıp taslaman'lar. O'ytkeni daladag'ı miywe ag'ashlar qorg'annın' ishine qashıp ketetug'ınday adam emes-g'o.
20 Tek g'ana miywe bermeytug'ın tereklerdi shawıp, joq qılıwın'ızg'a boladı. Qalanı qolg'a alaman degenshe, qamal qılatug'ın u'skeneler sog'ıw ushın, sol tereklerden paydalanıwın'ızg'a boladı».
