Nızamnın' qaytalanıwı 19 bob
1 «Qudayın'ız Jaratqan İye jerlerin sizlerge berip atırg'an xalıqlardı joq qılg'anda, sizler sol jerlerdi mu'lik etip alıp, qalalarına ha'm u'ylerine jaylasıp alasız.
2 Sonda eldi u'sh bo'limge bo'lin'ler. Ha'r bir bo'limnen bir pana qaladan ajıratın'lar.
3 Sol qalalarg'a baratug'ın jollar salın'lar, solay etip, adam o'ltirip qoyg'an adam sol qalalardın' birine qashıp, panalasın.
4 Sonday jag'day basına tu'sken adamg'a baylanıslı qag'ıyda mınaday: eger bir adam aldınnan jawızlıq qılıw niyeti bolmay, abaysızda birewdi o'ltirip qoysa, onda ol sol jerge qashıp qutılıwı mu'mkin.
5 Mısalı: bir adam birew menen birge ag'ash tayarlawg'a tog'ayg'a barıp, ag'ash shabıw ushın baltasın ko'tergende, baltanın' temiri sabınan shıg'ıp ketse ha'm qasındag'ı adamg'a tiyip ketip, onı o'ltirip alsa, onda usınday abaysızda adam o'ltirip qoyg'an adam sol pana qalalardın' birine qashıp, janın qutqarıp qalsın.
6 Bolmasa, o'lgen adamnın' o'shin alıwshı a'menger ashıwlanıp, qanxordın' izinen quwıwı mu'mkin ha'm pana qalag'a baratug'ın jol uzaq bolg'anı ushın, og'an jetip alıp, onı o'ltiriwi mu'mkin. Degen menen, o'ltirgen adam o'limge ılayıqlı emes, sebebi o'lgen adamg'a onın' aldın ala qaslıg'ı bolmag'an.
7 Sizlerge u'sh qalanı o'zlerin'iz ushın ayırıp qoyın'lar, dep buyırg'anımnın' sebebi usı edi.
8 Qudayın'ız Jaratqan İyeni su'yip, ha'mme waqıtta Onın' jollarınan ju'rin', dep sizlerge buyrıq berdim.
9 Eger de, sizler usı buyrıqlardın' birewin de qaldırmay orınlasan'ız, Qudayın'ız Jaratqan İye ata-babaların'ızg'a ishken antı boyınsha jer shegaraların'ızdı ken'eytedi ha'm wa'de qılg'an pu'tkil eldi sizlerge beredi. Sonda sizler ayırıp qoyg'an u'sh qalan'ızg'a ja'ne u'sh pana qala qosın'lar.
10 Solay etip, Qudayın'ız Jaratqan İye sizlerge mu'lik etip beretug'ın elde ayıpsız adamnın' qanı to'gilmesin. Ayıpsız adamnın' to'gilgen qanı ushın ayıplı bolıp qalman'lar
11 Biraq bir adam birewge qaslıq etip, buqqıda jatsa ha'm hu'jim etip, onı o'ltirse, keyin ol sol qalalardın' birewine qashıp barsa,
12 onda sol jınayatshı jasag'an qaladag'ı aqsaqallar onın' izinen adam jiberip, onı qaytarıp alıp kelsin. Jınayatshı o'lgen adam ushın o'shin alıwshının' qolına tapsırılsın. Solay etip, ol o'ltiriliwi kerek.
13 Onday adamdı ayap otırman'lar. Ayıpsız qandı to'giw gu'nasınan İzraildı tazalan'lar. Sonda abadan turmıs keshiresiz.
14 Qudayın'ız Jaratqan İye sizlerge mu'lik etip berip atırg'an elde qon'sın'ızdın' burınnan belgilengen jer shegarasın jıljıtıwshı bolman'lar».
15 «Birewdi qanday da jınayat yamasa gu'na islegen, dep ayıplaw ushın bir gu'wa jeterli emes. Bul eki yamasa u'sh adamnın' gu'walıg'ı menen tastıyıqlanıwı kerek.
16 Eger de bir adam jalg'an gu'walıq berip, birewdi jawız niyette ayıplasa,
17 onda ekewi de Jaratqan İyenin' aldına, sol waqıtta xızmet etip atırg'an ruwxaniylerdin' ha'm qazılardın' aldına kelsin.
18 Qazılar sol ma'seleni jaqsılap tekserip shıqsın. Eger sol gu'wanın' tuwısqanına qarsı jalg'an gu'walıq berip atırg'anı anıqlansa,
19 tuwısqanına qarsı oylag'an jawız niyetin o'zine qaytarın'lar. Solay etip, aran'ızdag'ı jawızlıqtı joq qılın'lar.
20 Basqalar usı bolg'an waqıyanı esitip, qorqadı ha'm usınday jawızlıqtı hesh kim islemeytug'ın boladı.
21 Jalg'an gu'walıq bergen adamdı ayap otırman'lar: jang'a jan, ko'zge ko'z, tiske tis, qolg'a qol ha'm ayaqqa ayaq».
