Nızamnın' qaytalanıwı 18 bob

Ruwxaniylerdin' u'lesi(1-8),Basqa xalıqlardın' jerkenishli u'rp-a'detlerinen saqlanıw(9-13),Payg'ambar jiberiw haqqında(14-22).

¹ «Lebiyli ruwxaniyler, pu'tkil Lebiy urıwı menen birge basqa izraillılar sıyaqlı u'les te, mu'lik te almaydı. Olarg'a tiyisetug'ın u'les Jaratqan İyege beriletug'ın sıylar bolıp, olar solardan jeydi.

² Tuwısqanları arasında olardın' mu'lki bolmaydı. Jaratqan İyenin' lebiylilerge wa'de bergenindey, Onın' O'zi olardın' ırısqı-nesiybesin beredi.

³ Mal yamasa qoy qurbanlıq etilgende, ruwxaniylerge tiyisli pay mınalardan ibarat: maldın' aldıng'ı san jiligi, jag'ı ha'm asqazanı.

⁴ Da'nin'izdin', taza sharabın'ızdın', za'ytu'n mayın'ızdın' birinshi o'nimin ha'm qoyların'ızdın' birinshi qırqılg'an ju'nlerin ruwxaniyge berin'.

⁵ O'ytkeni Qudayın'ız Jaratqan İye Lebiy urıwı O'zinin' aldında turıp, Jaratqan İyenin' atı menen ma'n'gi xızmet etiwi ushın, olardı pu'tkil urıwların'ızdın' ishinen tan'lap aldı.

⁶ Eger bir lebiyli İzraildag'ı o'zi jasap atırg'an qaladan Jaratqan İyenin' tan'laytug'ın jerine o'z qa'lewi menen barsa,

⁷ sol jerde Jaratqan İyenin' aldında xızmet etip atırg'an lebiyli tuwısqanları sıyaqlı ol da Qudayı Jaratqan İyenin' atı menen xızmet etiwine boladı.

⁸ Ol ata-babalarının' miyrasınan qalg'an zattı satıp, o'z paydasına alg'an bolsa da, basqa lebiyliler menen birdey o'zine tiyisli u'lesin alıwı kerek».

⁹ «Qudayın'ız Jaratqan İyenin' sizlerge berip atırg'an jerine kirgenin'izde, ol jerdegi xalıqlardın' jerkenishli islerin u'yrenben'ler.

¹⁰ Sizlerdin' aran'ızda o'z ulın yamasa qızın otta qurbanlıq qılatug'ın, pal ashatug'ın, adamnın' keleshegin boljaytug'ın, belgilerdi jorıytug'ın, sıyqırshılıq qılatug'ın,

¹¹ zikir salatug'ın, a'rwaqlardı ha'm ruwxlardı shaqıratug'ın yamasa o'liler menen tillesip, ma'sla'ha't alatug'ın birde bir adam bolmasın.

¹² Sebebi Jaratqan İye sonday isleytug'ınlardan jerkenedi. Qudayın'ız Jaratqan İye usınday jerkenishli isleri sebepli sol xalıqlardı sizlerdin' aldın'ızdan quwıp shıg'arıp atır.

¹³ Qudayın'ız Jaratqan İyenin' aldında minsiz bolın'lar».

¹⁴ «Sizler elin alıp atırg'an sol xalıqlar boljawshılar menen palkerlerdin' u'git-na'siyatına qulaq saladı. Biraq Qudayın'ız Jaratqan İye sizlerdin' bulay islewin'izge ruxsat bermeydi.

¹⁵ Qudayın'ız Jaratqan İye sizler ushın aran'ızdan, o'z tuwısqanların'ızdan men sıyaqlı bir payg'ambar shıg'aradı. Og'an qulaq salın'lar.

¹⁶ Sizler Xoreb tawında jıynalg'an ku'ni Qudayın'ız Jaratqan İyeden o'zlerin'iz mınaday dep tilegen edin'iz: „Qudayımız Jaratqan İyenin' dawısın ekinshi ma'rte esitpeyik, sol ullı ottı da basqa ko'rmeyik, bolmasa o'lip qalamız“.

¹⁷ Sonda Jaratqan İye mag'an bılay dedi: „Olardın' aytqanları durıs.

¹⁸ Olar ushın o'zlerinin' arasınan sen sıyaqlı bir payg'ambar shıg'araman. Men onın' awzına O'z so'zlerimdi salaman ha'm ol Men ayt dep buyırg'anlarımnın' ha'mmesin olarg'a jetkeredi.

¹⁹ Ol Menin' atımnan so'yleydi, og'an qulaq salmag'an adamdı Men O'zim juwapkershilikke tartaman.

²⁰ Biraq bir payg'ambar Men buyırmag'an so'zdi Menin' atımnan so'ylewge ju'reksinse yamasa basqa qudaylardın' atınan so'ylese, ol o'liwi tiyis“.

²¹ Sizler: „Jaratqan İyenin' aytqanın yamasa aytpag'anın qayaqtan bilemiz?“ – dep oylawın'ız mu'mkin.

²² Eger de bir payg'ambar Jaratqan İyenin' atınan so'ylese, biraq aytqan so'zleri orınlanbasa yamasa a'melge aspasa, onda sol so'zdi Jaratqan İye aytpag'an boladı. Payg'ambar o'z atınan so'ylegen, onnan qorqpan'lar».