Nızamnın' qaytalanıwı 17 bob

Patsha haqqında qag'ıydalar(14-20).

¹ «Ha'r qanday kemshiligi bar iri mal yamasa mayda maldı Qudayın'ız Jaratqan İyege arnap qurbanlıq qılman'lar. Qudayın'ız Jaratqan İye bunnan jerkenedi.

² Qudayın'ız Jaratqan İyenin' sizlerge berip atırg'an qalalarının' birinde Onın' na'zerinde jawızlıq bolg'an is qılıp, kelisimine qıyanet etetug'ın bir erkek yamasa hayal shıqsa

³ ha'm buyrıqlarıma qaramastan, basqa qudaylarg'a xızmet etse, sol qudaylarg'a, quyashqa ha'm ayg'a yamasa basqa da aspan denelerine tabınsa,

⁴ keyin bul haqqında sizlerge xabar jetse, esitkenlerin'izdi jaqsılap tekserin'ler. Eger de İzrail xalqının' arasında shınında da sonday jerkenishli is islengeni da'lillense,

⁵ onda sol erkekti yamasa hayaldı qala da'rwazasının' sırtına alıp shıg'ıp, tas boran qılıp o'ltirin'ler.

⁶ Degen menen, o'limge hu'kim etilgen adam eki yamasa u'sh adamnın' gu'walıg'ı menen o'ltiriliwi tiyis, biraq bir adamnın' gu'walıg'ına tiykarlanıp o'ltirilmesin.

⁷ Sol gu'na islegen adamg'a birinshi bolıp gu'walar tas ılaqtırsın, sonnan keyin pu'tkil xalıq tas boran qılsın. Solay etip, aran'ızdag'ı jawızlıqtı joq qılın'lar.

⁸ Eger qalan'ızda abaysızdan yamasa qastan adam o'ltiriwshilik, huqıq talasıw ha'm bir-birewge zorlıq qılıw tuwrısındag'ı dawlardı sheshiwin'iz qıyın bolsa, Qudayın'ız Jaratqan İyenin' tan'laytug'ın jerine barın'lar.

⁹ Sol jerde sizler lebiyli ruwxaniyler ha'm sol waqıtta xızmet etip atırg'an qazılar menen ma'sla'ha'tlesin'ler. Olar hu'kim shıg'arıp, o'z qararın sizlerge ma'lim qıladı.

¹⁰ Jaratqan İyenin' tan'lag'an jerinen olardın' sizlerge aytatug'ın qararın muqıyatlı tu'rde orınlan'lar.

¹¹ Olar tu'sindirip bergen nızamdı ha'm shıg'arg'an hu'kimdi tolıg'ı menen orınlawın'ız tiyis. Olar ja'riyalag'an qarardan on'g'a da, solg'a da shıg'ıp ketpen'ler.

¹² Kim de kim o'z basımshılıq qılıp, Qudayın'ız Jaratqan İyenin' aldında xızmet etip atırg'an ruwxaniyge ha'm qazıg'a qulaq salmasa, ol adam o'ltirilsin. Usılay etip, İzraildan jawızlıqtı joq qılın'lar.

¹³ Pu'tkil xalıq bul waqıyanı esitip qorqadı ha'm ja'ne o'z basımshılıq qılmaytug'ın boladı».

¹⁴ «Qudayın'ız Jaratqan İye sizlerge beretug'ın elge barıp, ol jerdi mu'lik etip, jaylasıp alg'annan keyin: „A'tirapımızdag'ı xalıqlar sıyaqlı bizler de o'zlerimizge patsha saylayıq“, – dep aytarsız.

¹⁵ Sonda sizler saylaytug'ın patsha Qudayın'ız Jaratqan İye ta'repinen tan'lanatug'ın adam bolıwı tiyis. Saylaytug'ın patshan'ız İzrail xalqınan bolsın. O'z xalqın'ızdan bolmag'an jat jerli adamdı patsha qılıp qoyman'lar.

¹⁶ Patshanın' ko'p atı bolmasın, ja'ne de at satıp alıw ushın adamlardı Mısırg'a jibermesin. O'ytkeni Jaratqan İye sizlerge: „Ol jerge qaytıp barman'lar“, – degen edi.

¹⁷ Saylaytug'ın patshan'ız ko'p hayal almasın, bolmasa, ol Jaratqan İyeden ju'z burıp ketedi. Ja'ne de, ol o'zi ushın ko'p mug'darda gu'mis ha'm altın jıynamasın.

¹⁸ Ol patshalıq taxtqa otırg'anda, lebiyli ruwxaniyler saqlap qoyg'an usı Nızamnan bir ko'shirmeni o'zi ushın jazdırıp alsın.

¹⁹ Sol Nızamnın' ko'shirmesi ha'mme waqıtta patshanın' qasında bolsın. Patsha onı ha'r ku'ni o'miri dawamında oqısın. Solay etip, ol Qudayı Jaratqan İyeden qorqıp, usı Nızamnın' barlıq so'zlerine ha'm qag'ıydalarına a'mel qılıwdı u'yrensin.

²⁰ Ol o'zin tuwısqanlarınan joqarı sanamasın ha'm Jaratqan İyenin' buyrıqlarınan on'g'a da, solg'a da burılmasın. Sonda o'zi de, urpag'ı da İzraildın' u'stinen uzaq jıllar dawamında patshalıq etedi».