Nızamnın' qaytalanıwı 16 bob

Qutqarılıw ası(1-8),Ha'pteler bayramı(9-12),Qos bayramı(13-17),A'dil hu'kim haqqında(18_22).

¹ «Abib ayında Qudayın'ız Jaratqan İyege arnalg'an Qutqarılıw bayramın bayramlan'lar.

² Qudayın'ız Jaratqan İyenin' O'z atın ornalastırıw ushın tan'laytug'ın jerinde mayda ha'm iri malların'ızdan Qutqarılıw qurbanlıqların shalın'lar.

³ Qurbanlıqtın' go'shi menen birge ashıtqı salıng'an nan jemen'ler. Jeti ku'n dawamında ashıtqısız nan, yag'nıy qıyın ku'nlerde jeytug'ın nan jewin'iz kerek. Sebebi sizler Mısırdan asıg'ıp shıg'ıp ketkenin'izde, ashıtqısız nan jegen edin'ler. Usı nandı jep, o'mirin'iz dawamında Mısırdan shıqqan ku'nin'izdi eslep ju'resizler.

⁴ Jeti ku'n dawamında elin'izdin' hesh bir jerinde ashıtqı bolmasın. Bayramnın' birinshi ku'ni keshte qurbanlıq qılg'an malların'ızdın' go'shinen tan'g'a deyin awısıp qalmasın.

⁵ Qutqarılıw qurbanlıqların Qudayın'ız Jaratqan İye sizlerge beretug'ın qalalardın' ha'mmesinde soyman'lar.

⁶ Al onı tek g'ana Qudayın'ız Jaratqan İye O'z atın ornalastırıw ushın tan'laytug'ın jerinde soyın'lar. Bunı ku'n batatug'ın waqıtta, Mısırdan shıqqan mezgilde soyın'lar.

⁷ Onın' go'shin Qudayın'ız Jaratqan İyenin' tan'laytug'ın jerinde pisirip jen'ler ha'm tan' atqanda o'z shatırların'ızg'a qaytın'lar.

⁸ Altı ku'n ashıtqısız nan jen'ler. Jetinshi ku'ni Qudayın'ız Jaratqan İyege arnap, saltanatlı jıynalıs qılın'lar. Sol ku'ni hesh qanday jumıs islemen'ler».

⁹ «Egindi orıp baslag'an waqıttan baslap, jeti ha'pte sanan'lar

¹⁰ Keyin Qudayın'ız Jaratqan İyege arnalg'an Ha'pteler bayramın bayramlan'lar ha'm sol waqıtta Onın' sizlerge bergen bereketine jarasa, ıqtıyarlı sadaqaların'ızdı berin'ler.

¹¹ Sizler ul-qızların'ız, qul ha'm shorıların'ız, qalaların'ızda jasaytug'ın lebiyliler, aran'ızda jasaytug'ın kelgindiler ha'm jetim-jesirler menen birge O'z atın ornalastırıw ushın tan'laytug'ın jerinde, Qudayın'ız Jaratqan İyenin' aldında shadlanın'lar.

¹² Mısırda qul bolg'anın'ızdı umıtpan'lar ha'm usı qag'ıydalardın' birewin de qaldırmay orınlan'lar».

¹³ «Qırmanın'ızdan da'nin'izdi jıynap, ju'zimin'izdi sıg'ıp sharabın alg'annan keyin, jeti ku'n dawamında Qos bayramın bayramlan'lar.

¹⁴ Sizler ul-qızların'ız, qul ha'm shorıların'ız, qalaların'ızda jasaytug'ın lebiyliler, kelgindiler ha'm jetim-jesirler menen birge usı bayramda shadlanın'lar.

¹⁵ Qudayın'ız Jaratqan İyenin' tan'laytug'ın jerinde jeti ku'n dawamında Og'an arnap bayram o'tkerin'ler. Qudayın'ız Jaratqan İye zu'ra'a'tin'izdin' barlıg'ın ha'm qol urg'an ha'r bir isin'izdi bereketleydi. Sonlıqtan, u'lken quwanıshqa bo'lenin'ler.

¹⁶ Solay etip, barlıq erkeklerin'iz jılına u'sh ma'rte: Ashıtqısız nan bayramında, Ha'pteler bayramında ha'm Qos bayramında Qudayın'ız Jaratqan İyenin' aldında bolıwı ushın, Onın' tan'laytug'ın jerine kelsin. Hesh kim Jaratqan İyenin' aldına qurı qol kelmesin.

¹⁷ Ha'r birin'iz Qudayın'ız Jaratqan İyenin' o'zlerin'izdi bereketlegenine jarasa sıylar alıp kelin'ler».

¹⁸ «Qudayın'ız Jaratqan İye sizlerge beretug'ın qalalarında ha'r bir urıw ushın qazılar ha'm qadag'alawshılardı tayınlan'lar. Olar xalıqtı a'dillik penen hu'kim etsin.

¹⁹ Olar hu'kim etkende, a'dillikti burmalamasın, eki ju'zlilik qılmasın ha'm para almasın. Sebebi para dana adamnın' ko'zin soqır qılıp qoyadı ha'm haqtı nahaqqa shıg'aradı.

²⁰ O'mir su'riwin'iz ushın ha'm Qudayın'ız Jaratqan İye sizlerge berip atırg'an eldi mu'lik etip alıwın'ız ushın a'dillikke, tek g'ana a'dillikke umtılın'lar.

²¹ Qudayın'ız Jaratqan İye ushın quratug'ın qurbanlıq orınnın' qasına kiyeli ag'ash ornatpan'lar!

²² Kiyeli tas ta ornatpan'lar! O'ytkeni Qudayın'ız Jaratqan İye bulardan jerkenedi».