Nızamnın' qaytalanıwı 15 bob
1 «Ha'r jetinshi jıldın' aqırında sizlerge qarızdar bolg'anlardı qarızlarınan keship jiberin'ler.
2 Qarızlardı keship jiberiw ushın bılay islen'ler: izraillı bir tuwısqanına qarız bergen ha'r bir adam qarızın keship jibersin ha'm onnan qaytıp talap qılmasın. Sebebi Jaratqan İyenin' O'zi qarızlardı keship jiberiliwdi ja'riyaladı.
3 Jat jerli adamnan qarızın'ızdı sorasan'ız boladı. Biraq izraillı tuwısqanın'a bergen qarızın'nan keship jiberiwin' tiyis.
4 Sizlerdin' aran'ızda hesh qanday jarlı adam bolmasın. Qudayın'ız Jaratqan İye mu'lik etip berip atırg'an elde sizlerge bereket beredi.
5 Tek g'ana Qudayın'ız Jaratqan İyenin' so'zine qulaq salıp, bu'gin men sizlerge jetkerip atırg'an usı buyrıqlardı muqıyatlı tu'rde orınlawın'ız kerek.
6 Qudayın'ız Jaratqan İye O'zi wa'de bergenindey sizlerge bereket beredi. Sonda sizler ko'p xalıqlarg'a qarız beretug'ın bolasız, al o'zlerin'iz qarız almaysız. Ko'p xalıqlardın' u'stinen hu'kimdarlıq qılasız, biraq olar sizlerge hu'kimdarlıq etpeydi.
7 Qudayın'ız Jaratqan İye sizlerge beretug'ın eldegi qalalardın' birinde izraillı tuwısqanın'ızdın' biri jarlı bolsa, ju'reklerin'izdi tas qılmay, ja'rdem qolın'ızdı ayaman'lar.
8 Kerisinshe, sizler ashıq qol bolın'lar ha'm og'an mu'ta'jligine qarap, qarız berin'ler.
9 Saq bolın'lar, qarızlardı keship jiberetug'ın jetinshi jıl jaqınlap qalg'anı ushın, jarlı tuwısqanın'ızg'a ja'rdem beriwden bas tartpan'lar. Kewlin'izde usınday jaman oyg'a jol qoyman'lar. Eger de sonday tuwısqanın'ızg'a ja'rdem beriwden bas tartsan'ız, onda ol Jaratqan İyege nalıydı ha'm o'zlerin'izge gu'na arttırıp alasız.
10 Og'an qıynalmastan ashıq kewlin'iz benen qarız berin'ler. Sonda Qudayın'ız Jaratqan İye sizlerdin' qol urg'an ha'r bir isin'izge bereket beredi.
11 Elin'izde ha'mme waqıtta jarlı adamlar boladı. Sonın' ushın, elin'izdegi ja'rdemge mu'ta'j jarlı tuwısqanların'ızg'a ha'mme waqıtta ja'rdem qolın'ız ashıq bolıwın buyıraman».
12 «Eger evrey tuwısqanın'ızdan bir erkek yamasa hayal sizge o'zin xızmetke satsa, ol altı jıl sag'an xızmet etsin, al jetinshi jılı onı azat qılıwın' tiyis.
13 Onı azat qılg'anın'ızda, qolın bos jibermen'.
14 Og'an su'riwin'izdegi malın'ızdan, da'nin'izden ha'm sharabın'ızdan mol-mol etip berin'. Qudayın'ız Jaratqan İyenin' sizlerge bergen bereketinen, og'an da berin'.
15 Mısırda qul bolg'anın'ızdı ha'm Qudayın'ız Jaratqan İye sol jerden sizlerdi azat etkenin este tutın'lar. Sonın' ushın da, bu'gin men sizlerge usı buyrıqtı berip atırman.
16 Eger qulın'ız sizdi ha'm shan'arag'ın'ızdı jaqsı ko'rip, sizler menen birge qalıwdı qa'lese ha'm „Sizin' qasın'ızdan ketiwdi qa'lemeymen“ dep aytsa,
17 onda onı esigin'izdin' qasına alıp barın'. Keyin onın' qulag'ın esikke qoyıp, biz benen tesin'. Sonda ol o'miri boyı qulın'ız bolıp qaladı. Shorın'ızg'a da solay islewin'iz kerek.
18 Qulın'ızdı azat qılg'anın'ızda o'kinben'. Sebebi sizge xızmet etken sol altı jıl dawamında, ol jallanba xızmetshiden go're eki ese ko'p jumıs isledi. Onı azat qılsan'ız, Qudayın'ız Jaratqan İye sizlerdin' qol urg'an ha'r bir isin'izge bereket beredi».
19 «İri ha'm mayda malların'ızdın' birinshi tuwılg'an ha'r bir erkek to'lin Qudayın'ız Jaratqan İyege bag'ıshlan'lar. Malın'ızdın' birinshi tuwılg'an bug'asın jumısqa qospan', birinshi tuwılg'an mayda malın'ızdın' ju'nin qırqıp alman'.
20 Bulardın' go'shin shan'arag'ın'ız benen birge ha'r jılı Qudayın'ız Jaratqan İyenin' aldında, Onın' tan'lap alatug'ın jerinde jen'ler.
21 Eger de sol mal aqsaq yamasa soqır bolsa yamasa onın' basqa bir kemshiligi bolsa, onı Qudayın'ız Jaratqan İyege qurbanlıqqa bermen'.
22 Bunday mallardı o'z qalan'ızda jesen'iz boladı. Pa'k adam bolsa da, napa'k adam bolsa da, jeyran yamasa suwınnın' go'shindey etip sonday maldın' go'shinen jewine boladı.
23 Biraq onın' go'shin qanı menen birge jemen'ler. Onın' qanın suw sıyaqlı topıraqqa ag'ızıp jiberin'ler».
