Nızamnın' qaytalanıwı 14 bob

Aza tutıw haqqında(1-2),Hadal ha'm haram haywanlar(3-21),Onnan biri haqqında nızam(22-29).

¹ «Sizler – Qudayın'ız Jaratqan İyenin' balalarısız. Marhumg'a aza tutqanın'ızda, denelerin'izdi tilip, shashın'ızdın' aldın qıydırman'lar.

² Sizler Qudayın'ız Jaratqan İyenin' muxaddes xalqısız. Jaratqan İye jer ju'zindegi barlıq xalıqlardın' arasınan sizlerdi O'z g'a'ziynesi sıpatında tan'lap aldı».

³ «Sizler jerkenishli sanalatug'ın haywanlardın' go'shin jemen'ler.

⁴ Mına haywanlardın' go'shin jewin'izge boladı: sıyır, qoy, eshki,

⁵ suwın, jeyran, qızıl antilopa, taw eshkisi, jabayı o'giz, aq antilopa ha'm taw qoshqarı.

⁶ Tuyaqları teren' etip ekige ayırılg'an asha tuyaqlı ha'm gu'yis qaytaratug'ın haywanlardın' ha'mmesin jewin'izge boladı.

⁷ Biraq bul haywanlardan tek mınalardın' go'shin jewin'izge bolmaydı: tu'ye, qoyan ha'm daman. Bular gu'yis qaytaradı, biraq asha tuyag'ı joq. Sonlıqtan olar sizler ushın haram boladı.

⁸ Shoshqa asha tuyaqlı bolg'anı menen, ol gu'yis qaytarmaydı. Sonlıqtan ol sizler ushın haram boladı. Usı haywanlardın' go'shin jemen'ler ha'm olardın' o'ligine de qol tiygizben'ler.

⁹ Suwda jasaytug'ın qalashlı ha'm qabırshaqlı janıwardın' go'shin jewin'izge boladı.

¹⁰ Biraq qalashsız ha'm qabırshaqsız haywanlardın' hesh birin jemen'ler. Bular sizler ushın haram sanaladı.

¹¹ Hadal sanalatug'ın barlıq quslardı jewin'izge boladı.

¹² Go'shin jewge bolmaytug'ın quslar mınalar: bu'rkit, ku'shegen, qara qus,

¹³ shayqus, lashın ha'm onın' tu'rleri,

¹⁴ g'arg'anın' barlıq tu'rleri,

¹⁵ u'ki, batpaq bayıwlısı, shag'ala ha'm qarshıg'anın' tu'rleri,

¹⁶ u'y bayıwlısı, qulaqlı japalaq, aq quw,

¹⁷ uzaqsha, sipa, qarabay,

¹⁸ la'ylek ha'm qutannın' tu'rleri, o'pepek ha'm jarg'anat.

¹⁹ Qanatlı shıbın-shirkeyler sizler ushın haram sanaladı. Olardın' hesh birin jemen'ler.

²⁰ Biraq qanatlı shıbın-shirkeylerdin' bazıları hadal bolıp, olardı jewin'izge boladı.

²¹ Haram o'lip qalg'an haywannın' go'shin jemen'ler. Onday o'li haywandı jewi ushın qalan'ızda jasap atırg'an kelgindi birewge beriwin'izge yamasa basqa bir jat jerli adamg'a satıwın'ızg'a boladı. Sizler Qudayın'ız Jaratqan İyenin' muxaddes xalqısız. Ilaqtı o'z anasının' su'tine pisirmen'ler».

²² «Ha'r jılı atızların'ızda jetistiriletug'ın barlıq o'nimlerdin' onnan birin ayırıp qoyın'lar.

²³ Da'nin'izdin', taza sharabın'ızdın', za'ytu'n mayın'ızdın' onnan birin, iri ha'm mayda malların'ızdın' birinshi tuwılg'an to'llerin Qudayın'ız Jaratqan İyenin' O'z atın ornalastırıw ushın tan'laytug'ın jerinde, Onın' aldında jen'ler. Solay islep, ha'mme waqıtta Onnan qorqıwdı u'yrenesiz.

²⁴ Al eger de, Qudayın'ız Jaratqan İyenin' O'z atın ornatıw ushın tan'laytug'ın jeri uzaq bolıp, Qudayın'ız Jaratqan İye bereketlep bergen o'niminen onnan birin sol jerge alıp barıwg'a mu'mkinshiligin'iz bolmasa,

²⁵ onda sol zatlardı gu'miske almastırın'lar. Gu'misti Qudayın'ız Jaratqan İyenin' tan'laytug'ın jerine alıp barın'lar.

²⁶ Sol gu'miske qa'legen na'rseni: iri yamasa mayda mal, sharap, o'tkir ishimlik yamasa kewlin'iz ku'segen basqa bir na'rse satıp alıp, o'z shan'arag'ın'ız benen birge Qudayın'ız Jaratqan İyenin' aldında iship-jep, shadlanın'lar.

²⁷ Qalaların'ızda jasap atırg'an lebiylilerdi umıtıp qaldırman'lar. Sebebi olardın' o'zlerine tiyisli u'les jeri joq.

²⁸ Ha'r u'shinshi jıldın' aqırında, sol jılı alg'an o'nimin'izdin' barlıq onnan bir bo'legin alıp, o'z qalan'ızg'a jıynap, saqlap qoyın'lar.

²⁹ Solay etip, u'les jeri bolmag'an lebiyliler, ja'ne de, qalaların'ızda jasap atırg'an kelgindiler, jetim ha'm jesirler kelip, sonnan iship-jep toysın. Sonda Qudayın'ız Jaratqan İye sizlerdin' qol urg'an ha'r bir isin'izge bereket beredi».