1 «Eger sizlerdin' aran'ızdan bir payg'ambar yamasa tu'sinde ayan ko'retug'ın birew payda bolıp, ol: „Bir nıshan yamasa ka'ramat ko'rsetemen“, – dep aytsa,
2 usı aytqan nıshan ha'm ka'ramatlardı islep, keyin ol adam: „Kelin'ler, sizler tanımag'an basqa qudaylardın' izine erip, olarg'a xızmet qılayıq“, – dese,
3 sizler sol payg'ambardın' yamasa tu'sinde ayan ko'riwshinin' so'zlerine qulaq salman'lar. Qudayın'ız Jaratqan İye O'zin shın ju'regin'iz ha'm jan-ta'nin'iz benen sizlerdin' su'yetug'ının'ız yamasa su'ymeytug'ının'ızdı biliw ushın, sınap atırg'an boladı.
4 Sizler tek g'ana Qudayın'ız Jaratqan İyenin' izinen ju'rip, Onnan qorqın'lar. Onın' buyrıqlarına boysınıp, so'zlerine qulaq salın'lar. Jaratqan İyege xızmet etip, Og'an sadıq qalın'lar.
5 Al sol payg'ambar yamasa tu'sinde ayan ko'retug'ın adam o'ltiriliwi tiyis. Sebebi ol u'gitlep, Mısır elinen alıp shıqqan, Mısırdag'ı qullıqtan azat etken Qudayın'ız Jaratqan İyege sizlerdi qarsı qoymaqshı boldı. Qudayın'ız Jaratqan İyenin' buyırg'an jolınan shıg'arıp, azg'ırmaqshı boldı. Solay etip, aran'ızdag'ı jawızlıqtı joq qılın'lar.
6 Ha'tteki, bir anadan tuwılg'an tuwısqanın'ız yamasa ul-qızın'ız, su'ygen hayalın'ız yamasa en' jaqın dostın'ız sizlerdi o'zin'iz de, atababaların'ız da tanımag'an basqa qudaylarg'a tabınıwg'a qupıya tu'rde u'gitlewi mu'mkin.
7 Olardın' biri sizlerdi a'tirapın'ızdag'ı alıs-jaqın jerde jasap atırg'an, du'nyanın' bir shetinen ekinshi shetine deyin jasaytug'ın xalıqlardın' qudaylarına sıyınıwdı u'gitlewi mu'mkin.
8 Biraq sizler bug'an ırazı bolıp, og'an qulaq salman'lar. Onday adamg'a rehimlilik ko'rsetpen'ler, onı qorg'aman'lar.
9 Onday adamdı so'zsiz o'ltirip taslan'lar. Onı o'ltiriw ushın birinshi bolıp sen qolın'dı ko'ter, keyin pu'tkil xalıq qol ko'tersin.
10 Onı tas boran qılıp o'ltirin'ler. Sebebi ol sizlerdi Mısır elindegi qullıqtan alıp shıqqan Qudayın'ız Jaratqan İyeden ju'z burdırıp, azg'ırıwg'a ha'reket etti.
11 Sonda pu'tkil İzrail xalqı bul haqqında esitip, qorqadı. Bunnan keyin, aran'ızda hesh kim usıg'an uqsag'an jawız is qılmaytug'ın boladı.
12 Eger de Qudayın'ız Jaratqan İyenin' sizlerge jasawın'ız ushın berip atırg'an qalalardın' birinde,
13 jaman adamlar shıg'ıp: „Ju'rin'ler, o'zlerin'iz tanımaytug'ın basqa qudaylarg'a tabınayıq“, – dep qala turg'ınların azg'ırg'anın esitsen'iz,
14 onda olar haqqında sorastırıp, jaqsılap tekserin'. Eger sol jerkenishli waqıya shınında da ju'z bergen bolsa, esitkenlerin'iz da'lillense,
15 sol qalanın' pu'tkil turg'ınlarınan baslap, haywanlarına deyin qılıshtan o'tkizin'ler. Sol qalanı ha'm ondag'ı barlıq zatlardı pu'tkilley joq qılın'lar.
16 Qaladan alıng'an oljalardın' barlıg'ın qala maydanına jıynan'lar. Qalanı ha'm sol jerdegi barlıq oljanı Qudayın'ız Jaratqan İyege tolıg'ı menen jandırılatug'ın qurbanlıq etip jag'ıp jiberin'ler. Sol qala ma'n'gige qarabaqanag'a aylang'an halında qalsın, ol hesh qashan qayta tiklenbesin.
17 Joq qılınatug'ın zatlardan hesh birewin de o'zlerin'izge alman'lar. Sonda Jaratqan İyenin' lawlag'an g'a'zebi qaytıp, Ol ata-babaların'ızg'a ant ishkenindey, sizlerge miyrim-sha'pa'a't, rehim ko'rsetip, sizlerdi ko'beytedi.
18 Sonın' ushın, sizler Qudayın'ız Jaratqan İyege qulaq salın'lar, bu'gin men sizlerge jetkerip atırg'an buyrıqlarg'a boysınıp, Onın' na'zerinde durıs bolg'an islerdi islen'ler».
