Nızamnın' qaytalanıwı 11 bob

Jaratqan İyenin' buyrıqları (1-7), Wa'de etilgen eldin' bereketleri (8-32).

¹ «Qudayın'ız Jaratqan İyeni su'yin'ler. Onın' tapsırmalarına, qag'ıydalarına, nızamlarına ha'm buyrıqlarına ha'mme waqıtta a'mel qılın'lar.

² Bu'gin mınanı esin'izde tutın'lar: Qudayın'ız Jaratqan İyenin' ta'rbiyasın alıp jasag'an balaların'ız emes, al sizler bolasız. Sizler Onın' ullılıg'ın, ku'shli qolın sozg'anın, qu'diretin,

³ Mısırda faraon ha'm onın' pu'tkil eline islegen ka'ramatların ha'm belgilerin,

⁴ Mısır la'shkerlerine, atlarına, sawash arbalarına neler islegenin, mısırlılar sizlerdin' izin'izden quwg'anda, olardı Qamıs ten'izinin' astına qalay mantıqtırıp, olardı qalayınsha tolıg'ı menen joq qılg'anın ko'rdin'iz.

⁵ Usı jerge jetip kelemen degenshe, Jaratqan İye sizler ushın sho'lde ne islegenin,

⁶ Ruben urıwınan Eliabtın' ulları Datan menen Abiramg'a ne islegenin bilesiz. Pu'tkil İzrail xalqının' ko'z aldında jer ashılıp, olardı, shan'araqların, shatırların ha'm olarg'a tiyisli bolg'anlar menen barlıq janıwarların jutıp jiberdi.

⁷ Jaratqan İyenin' islegen barlıq ullı islerin o'z ko'zin'iz benen ko'rdin'iz».

⁸ «Sonlıqtan bu'gin men sizlerge jetkerip atırg'an buyrıqlardın' ha'mmesine a'mel qılın'lar. Sonda sizler ku'shli bolasız ha'm İordan da'ryasınan o'tip, mu'lik etip alatug'ın eldi qolg'a kirgizesiz.

⁹ Jaratqan İyenin' ata-babaların'ızg'a ha'm olardın' urpaqları bolg'an sizlerge beremen dep ant ishken su't ha'm pal ag'ıp turg'an elde uzaq o'mir su'resiz.

¹⁰ Sizler mu'lik etip, iyelew ushın baratırg'an el, o'zlerin'iz shıg'ıp kelgen Mısır elindey emes. Palız atızın ta'rbiyalag'anday, Mısırda tuqım egip, awır miynet penen eginlerin'izdi suwg'arar edin'ler.

¹¹ Biraq sizler mu'lik etip, iyelew ushın baratırg'an el taw ha'm oypatlıqlardan ibarat bolıp, onın' jeri jawın menen suwg'arıladı.

¹² Bul jerge Qudayın'ız Jaratqan İyenin' O'zi g'amxorlıq qılıp, jıl basınan aqırına deyin ol jerdi O'zi gu'zetip turadı.

¹³ Qudayın'ız Jaratqan İyeni su'yip, shın ju'regin'iz ha'm jan-ta'nin'iz benen Og'an xızmet etiw ushın, bu'gin men sizlerge jetkerip atırg'an buyrıqlarg'a jaqsılap qulaq salsan'ız,

¹⁴ Jaratqan İye jerin'izge gu'z ha'm ba'ha'r jawınların o'z waqtında jawdıradı. Solay etip, da'nin'izdi, taza sharabın'ızdı ha'm za'ytu'n mayın'ızdı jıynap alasız.

¹⁵ Jaratqan İye atızların'ızda malların'ız ushın ot-sho'p o'siredi, sizlerdin' nanın'ız mol boladı.

¹⁶ Biraq abaylı bolın'lar! Ja'ne, azg'ırılıp joldan adaspan'lar. Basqa qudaylarg'a xızmet etip, olarg'a tabınban'lar.

¹⁷ Bolmasa, Jaratqan İye sizlerge g'a'zeplenip, aspandı jawıp taslaydı ha'm jawın jawmay, jer o'z o'nimin bermey qaladı. Na'tiyjede, Jaratqan İye sizlerge berip atırg'an jaqsı elde tez qırılıp, joq bolıp ketesiz.

¹⁸ Menin' usı so'zlerimdi aqıl-oyın'ız benen ju'regin'izde saqlan'lar ha'm qolın'ızg'a belgi qılıp baylap, man'layın'ızg'a nıshan qılıp tag'ıp qoyın'lar.

¹⁹ Bulardı balaların'ızg'a u'yretin'. U'yde otırg'anda da, jolda ju'rgende de, jatqanda da, turg'anda da usılar tuwralı aytıp berin'.

²⁰ Esiklerin'izdin' jaqlawlarına, qalaların'ızdın' da'rwazalarına jazıp qoyın'.

²¹ Solay etip, Jaratqan İyenin' ata-babaların'ızg'a beremen, dep ant ishken elde sizlerdin' de, balaların'ızdın' da o'miri uzaq bolsın ha'm jerdin' u'stinde aspan qansha tursa, sol jerde sonsha jasan'lar.

²² Men bu'gin sizlerge jetkerip atırg'an bul buyrıqlardın' ha'mmesin muqıyatlı tu'rde orınlasan'ız, Qudayın'ız Jaratqan İyeni su'yip, Onın' jollarınan ju'rsen'iz ha'm Og'an sadıq bolsan'ız,

²³ Jaratqan İye bul xalıqlardın' barlıg'ın sizlerdin' aldın'ızdan quwıp jiberedi. Sizler o'zlerin'izden go're, ko'birek ha'm ku'shlirek bolg'an xalıqlardın' jerlerin mu'lik etip, iyelep alasız.

²⁴ Ayag'ın'ız tiygen ha'r bir jer sizlerdiki boladı. Sizlerdin' jer shegaraların'ız qubladag'ı sho'lden arqadag'ı Lebanon tawlarına, shıg'ıstag'ı Evfrat da'ryasınan batıstag'ı ten'izge deyin sozıladı.

²⁵ Sizlerge hesh kim qarsı tura almaydı. Sebebi Qudayın'ız Jaratqan İye sizlerge wa'de bergenindey, ayag'ın'ızdı basqan ha'r bir jerdegi adamlardı sizlerden qorqıp, titireytug'ın qıladı.

²⁶ Mine, bu'gin men sizlerge tan'lawın'ız ushın, jarılqaw menen na'letti usınıp atırman.

²⁷ Eger de bu'gin men sizlerge jetkerip atırg'an Qudayın'ız Jaratqan İyenin' buyrıqlarına boysınsan'ız, onda jarılqaw alasız.

²⁸ Biraq eger de Qudayın'ız Jaratqan İyenin' buyrıqlarına qulaq salmay, o'zlerin'iz tanımaytug'ın basqa qudaylardın' izinen ketip, sizlerge bu'gin buyırg'an joldan azg'ırılsan'ız, onda na'letke ushıraysız.

²⁹ Qudayın'ız Jaratqan İye mu'lik etip berip atırg'an elge sizlerdi alıp kirgennen keyin, Gerizzim tawında jarılqawlardı, Ebal tawında na'letlerdi ja'riyalan'lar.

³⁰ Bul eki taw İordan da'ryasının' batıs ta'repinde, usı da'ryanın' tegisliginde jasaytug'ın qananlılardın' jerinde jaylasqan. Olar Gilgalg'a jaqın More terebinf terekligi qasında.

³¹ Sizler tez arada Qudayın'ız Jaratqan İye sizlerge beretug'ın eldi mu'lik etip, iyelew ushın, İordan da'ryasınan o'tesiz. Ol jerdi qolg'a kirgizip, jaylasıp alg'annan keyin,

³² men bu'gin sizlerge jetkerip atırg'an qag'ıydalardın' ha'm nızamlardın' birewin de qaldırmay orınlan'lar».