Nızamnın' qaytalanıwı 1 bob
1 Muwsa İordan da'ryasının' shıg'ıs jag'asındag'ı sho'lde izraillılarg'a to'mendegi so'zlerdi ayttı. Bul sho'l Suftın' qaramaqarsısındag'ı İordan tegisliginin' bir bo'leginde, Paran menen Tofel, Laban, Xaserot ha'm Diy-Zahab arasında jaylasqan edi.
2 Xorebten tawlı Seir jerine alıp baratug'ın jol menen ju'rgende, Qadesh-Barniyag'a deyin on bir ku'nlik jol edi.
3 zrail xalqı Mısırdan shıqqannan keyin, qırqınshı jıldın' on birinshi ayının' birinshi ku'ni Muwsa olarg'a Jaratqan İyenin' buyırg'an so'zlerin ja'riyaladı.
4 Bunnan aldın Muwsa Xeshbonda hu'kimdarlıq qılg'an amor xalqının' patshası Sixondı, Ashtarotta ha'm Edreyde hu'kimdarlıq qılg'an Bashan patshası Ogtı jen'iliske ushıratqan edi.
5 Muwsa İordan da'ryasının' shıg'ıs jag'asındag'ı Moab jerinde Jaratqan İyenin' nızamın bılay dep tu'sindire basladı:
6 «Qudayımız Jaratqan İye Xorebte bizlerge bılay dedi: „Bul tawda uzaq waqıt turıp qaldın'ız.
7 Qa'nekey, jolg'a shıg'ın'lar. Amor xalqının' tawlı jerine ha'm sol jerge qon'sılas bolg'an barlıq ellerge: İordan tegisligine, tawlı u'lkege, batıstag'ı taw eteklerine, Negebke ha'm Jer Orta ten'izinin' boylarına kirip barın'lar. Yag'nıy, pu'tkil Qanan eli menen Lebanong'a, ja'ne de, ullı Evfrat da'ryasına deyin barın'lar.
8 Sol jerlerdi sizlerge berip atırman. Barın'lar, ata-babaların'ızg'a – İbrayımg'a, Isaqqa, Yaqıpqa ha'm olardın' a'wladlarına beremen dep ant ishken jerlerdi mu'lik etip alın'lar“».
9 «Sol waqıtta sizlerge bılay dep ayttım: „Sizlerdi bir o'zim jetelep alıp ju're almayman, sebebi sizler men ushın awır ju'k bolasızlar.
10 Qudayın'ız Jaratqan İye sizlerdi ko'beytti. Mine, bu'ginlikte aspandag'ı juldızlar sıyaqlı sansız bolıp, ko'beydin'iz.
11 Ata-babaların'ızdın' Qudayı Jaratqan İye wa'de bergenindey, sizlerdi ele de mın' ese ko'beytsin ha'm jarılqasın!
12 Biraq sizlerdin' awır ju'klerin'iz benen dawların'ızdı bir o'zim qalayınsha ko'teremen?
13 Endi ha'r bir urıwdan dana, aqıllı ha'm ta'jiriybeli adamlardı tan'lap alın'lar. Olardı sizlerge basshı etip tayınlayman“.
14 Sizler de bunı jaqsı dep maqulladın'ız.
15 Sonda urıwların'ızdan dana ha'm ta'jiriybeli bolg'an adamlardı sizlerge mın'bası, ju'zbası, eliwbası, onbası ha'm bazıların ja'miyettin' qadag'alawshıları etip tayınladım+.
16 Sol waqıtta tayınlang'an qazılarg'a bılay dep buyırg'an edim: „Tuwısqanların'ızdın' arasındag'ı dawlarg'a qulaq salın'. Bir adamnın' izraillı tuwısqanı menen yamasa kelgindi bir adam menen bolg'an dawların a'dillik penen sheshin'.
17 Hu'kim waqtında bir ta'replilik qılman', bay adamg'a da, jarlı adamg'a da qulaq salın'. Hesh kimnen qorqpan', o'ytkeni hu'kim Qudaydandur. O'zlerin'iz sheshe almag'an bir ma'sele bolsa, mag'an alıp kelin', onı o'zim sheshemen“.
18 Sol waqıtta sizlerge islewin'iz kerek bolg'an ha'r bir isti tapsırg'an edim».
19 «Sonnan keyin, Qudayımız Jaratqan İyenin' bizlerge buyırg'anınday, bizler Xoreb tawınan shıg'ıp, amor xalqının' tawlı jerine baratug'ın joldan ju'rip, o'zlerin'iz ko'rgen ken' ha'm qorqınıshlı sho'l arqalı Qadesh-Barniyag'a bardıq.
20 Sol jerde men sizlerge: „Mine, Qudayımız Jaratqan İye bizlerge berip atırg'an amor xalqının' tawlı jerine jetip keldik.
21 Qaran'lar, Qudayın'ız Jaratqan İye usı jerlerdi sizlerge berdi. Qa'ne, ata-babaların'ızdın' Qudayı Jaratqan İyenin' sizlerge aytqanınday, barıp ol jerdi mu'lik etip alın'lar. Qorqpan'lar, qa'weterge tu'spen'ler“, – dedim
22 Al sizler ha'mmen'iz mag'an kelip, bılay dedin'ler: „Eldi aralap, ko'zden o'tkerip shıg'ıw ushın, aldımızdan jansızlardı jibereyik. Olar qaysı joldan baratug'ınımızdı ha'm baratug'ın sol qalalar haqqında xabar alıp kelsin“.
23 Bul pikir mag'an da maqul boldı. Solay etip, aran'ızdan on eki adamdı, ha'r bir urıwdan bir adamnan tan'lap aldım.
24 Olar tawlı u'lkege ko'terildi ha'm Eshkol sayına barıp, eldi aralap shıqtı.
25 Qaytıp kiyatırıp, sol jerdin' jetistirgen miywelerinen alıp keldi. Olar: „Qudayımız Jaratqan İyenin' bizlerge berip atırg'an jeri jaqsı eken“, – dedi.
26 Degen menen, sizler Qudayın'ız Jaratqan İyenin' buyrıg'ına qarsı shıg'ıp, ol jerge barıwdı qa'lemedin'iz.
27 Sonda o'z shatırların'ızda ton'qıldap, bılay dedin'iz: „Jaratqan İye bizlerdi jek ko'redi. Ol bizlerdi amorlarg'a ta'slim qılıp, joq etiw ushın Mısırdan alıp shıqtı.
28 Ol jerge ne ushın baratırmız? Tuwısqanlarımız ol jerdegi xalıqtın' bizlerden go're ju'da' ku'shli ha'm boyları da ba'lent ekenin aytıp, ruwxımızdı tu'sirip jiberdi. Olardın' u'lken qalaları aspang'a tiyer diywallar menen qorshalg'an, ha'tteki, ol jerde Anaq a'wladınan shıqqan da'w adamlardı da ko'rgen eken“.
29 Sonda men sizlerge bılay dedim: „Olardan qorqpan'lar, qa'weterge de tu'spen'ler.
30 Aldın'ızda baratırg'an Qudayın'ız Jaratqan İye Mısırda urısqanday, sizler ushın urısadı.
31 Qudayın'ız Jaratqan İye sho'lde sizlerge g'amxorlıq qılıp keldi. Ol a'kenin' o'z balasın alıp ju'rgenindey, sizlerdi usı jerge deyin jol boyı ko'terip keldi.
32 Sonda da sizler Qudayın'ız Jaratqan İyege isenbey atırsız.
33 Al Ol bolsa, shatırların'ızdı qurıwg'a jer izlew ushın, ju'retug'ın jolın'ızdı ko'rsetip tu'nde ot, ku'ndiz bult ishinde aldın'ızda ju'rip keldi“».
34 «Jaratqan İye sizlerdin' so'zlerin'izdi esitip, g'a'zeplendi ha'm ant iship bılay dedi: 3
35 „Ata-babaların'ızg'a beremen dep ant ishken sol jaqsı jerdi usı jaman a'wladtın' hesh biri ko'rmeydi.
36 Sol jerdi tek g'ana Efunne ulı Kaleb ko'redi. Ayaq basqan jerlerin og'an ha'm onın' a'wladına beremen. O'ytkeni ol pu'tkil ju'regi menen Jaratqan İyege, yag'nıy Mag'an sadıq qaldı“.
37 Jaratqan İye sizler sebepli mag'an da g'a'zeplenip, bılay dedi: „Sen de sol jerge kirmeysen'.
38 Biraq ja'rdemshin' Nun ulı Eshua ol jerge kiredi. Onı jigerlendir. İzraillılarg'a jerdi mu'lik etip, alıp beretug'ın adam Eshua boladı.
39 Sonda sizler balalarımız tutqın boladı dep, aytqan edin'iz. Bu'ginlikte sol aq penen qaranı ayıra almaytug'ın balaların'ız sol elge kiredi. Eldi olarg'a beremen, sol jerdi olar mu'lik etip, iyeleydi.
40 Al sizler artın'ızg'a qaytın'lar, Qamıs ten'izine baratug'ın joldan sho'lge ketin'ler“.
41 Sonda sizler mag'an: „Bizler Jaratqan İyege qarsı gu'na isledik. Qudayımız Jaratqan İyenin' buyrıg'ı boyınsha barıp urısamız“, – dedin'iz. Sizler sol tawlı u'lkeni basıp alıw an'sat boladı, dep oylap, ha'r birin'iz quralların'ızdı aldın'ız.
42 Biraq Jaratqan İye mag'an bılay dedi: „Olarg'a ayt, urısıwg'a shıqpasın. Sebebi Men sizler menen birge emespen. Dushpanın'ızdan jen'ilip qalasız“.
43 Sizlerdi eskertken edim, biraq qulaq salmadın'ız. Jaratqan İyenin' buyrıg'ına qarsı shıqtın'ız. Sizler menmenlikke berilip, urısıw ushın tawlı u'lkege shıqtın'ız.
44 Tawlı u'lkede jasaytug'ın amorlar sizlerge qarsı shıg'ıp, olar pal ha'rrelerindey bolıp, izin'izden quwdı. Olar Seirden Xorma qalasına deyin sizlerdin' izin'izden quwıp qıyrattı.
45 Aman qalg'anların'ız qaytıp kelip, Jaratqan İyenin' aldında jıladın'ız. Biraq Jaratqan İye dadın'ızg'a qulaq salmadı, sizlerge itibar da bermedi.
46 Solay etip, uzaq waqıtqa deyin Qadeshte qaldın'ız».
