2 Yuxan 1 bob
1 Men, Yuxan aqsaqaldan, Quday ta'repinen tan'lang'an xanımg'a ha'm onın' balalarına sa'lem! Men sizlerdi shın ju'rekten su'yemen. Tek men emes, al haqıyqattı bilgenlerdin' ha'mmesi de sizlerdi su'yedi.
2 Sebebi bizlerde haqıyqat bar ha'm ol bizler menen ma'n'gi birge boladı.
3 A'kemiz Qudaydan ha'm A'kenin' Ulı İysa Masixtan kelgen miyrim, rehim ha'm tınıshlıq, bizlerde haqıyqatlıq ha'm su'yispenshilik arqalı birge bolsın.
4 Senin' balaların'nın' arasındag'ı geybirewlerinin' A'kemizden alg'an buyrıq boyınsha haqıyqat jolı menen ju'rgenin bilip, qattı quwandım.
5 Endi sennen o'tinemen, qımbatlı xanım, ha'mmemiz bir-birimizdi su'yeyik. Men sag'an jan'a buyrıqtı emes, bizler a'wel bastan qabıl etken buyrıqtı jazıp atırman.
6 Su'yispenshilik – bul Qudaydın' buyrıqları boyınsha jasaw. A'wel bastan esitkenin'iz sıyaqlı, Onın' buyrıg'ı – su'yispenshilik penen jasawdan ibarat.
7 Du'nya ju'zinde İysa Masixtın' adam denesinde kelgenin ta'n almaytug'ın ko'plegen aldawshılar payda boldı. Bunday adam – aldawshı ha'm Masixqa qarsı turıwshı.
8 Miynetimizdin' jemisin joytpay, ılayıqlı sıylıq alıwın'ız ushın o'zlerin'izge saq bolın'lar.
9 Masixtın' ta'liymatı menen jasamay, shekten shıg'ıp ketken adamda Quday joq. Onın' ta'liymatı menen jasaytug'ın adamda ha'm A'ke, ha'm Ul bar.
10 Eger kim de kim sizlerge kelip, bul ta'liymattı a'kelmese, onı u'ylerin'izge qabıl alman'lar, og'an sa'lem de bermen'ler.
11 O'ytkeni og'an sa'lem bergen adam onın' jaman islerine sherik bolg'an boladı.
12 Sizlerge jazatug'ın ko'p na'rselerim bar, biraq olardı qag'az betine sıya menen jazıwdı qa'lemeymen. Quwanıshımız tolı bolıwı ushın janın'ızg'a kelip, ju'zbe-ju'z so'ylesemen degen u'mittemen.
13 Quday tan'lag'an sin'lin'nin' balaları sag'an sa'lem aytıp atır.
- 1
