1 Yuxan 1 bob
1 En' bastan bar bolg'an o'mir So'zi haqqında: Onı esitkenimizdi, o'z ko'zlerimiz benen ko'rgenimizdi ha'm anıqlap ko'rip, Og'an qollarımızdı tiygizgenimizdi sizlerge ja'riyalap atırmız.
2 O'mir ashıq ko'rindi, bizler Onı ko'rdik ha'm Ol tuwralı gu'walıq berip atırmız. A'ke menen birge bolıp, bizlerge ko'ringen ma'n'gilik O'mirdi sizlerge ja'riyalap atırmız.
3 Sizler de bizler menen qarım-qatnasta bolıwın'ız ushın, ko'rgenimizdi ha'm esitkenimizdi sizlerge ja'riyalap atırmız. Bizlerdin' qarım-qatnasımız bolsa, A'ke ha'm Onın' Ulı İysa Masix penen boladı.
4 Bulardı sizlerge quwanıshımız tolı bolıwı ushın jazıp atırmız.
5 İysa Masixtan esitip, sizlerge ja'riyalap atırg'an xabarımız bul: Quday – nur, Onda hesh qanday qaran'g'ılıq joq.
6 Eger Onın' menen qarımqatnastamız dep, qaran'g'ılıqta ju'rgen bolsaq, jalg'an so'ylep, haqıyqat boyınsha jasamag'an bolamız.
7 Biraq Qudaydın' O'zi nurda bolg'anı sıyaqlı, bizler de nurda ju'rsek, bir-birimiz benen qarım-qatnasta bolamız ha'm Onın' Ulı İysanın' qanı bizlerdi ha'r qanday gu'nadan tazalaydı.
8 Gu'namız joq desek, o'z-o'zimizdi aldag'an bolamız ha'm bizlerde haqıyqatlıq bolmaydı.
9 Eger gu'nalarımızdı moyınlasaq, sadıq ha'm haq Quday gu'nalarımızdı keshirip, bizlerdi ha'r qanday jamanlıqtan tazalaydı.
10 Eger gu'na islemedik desek, Qudaydı o'tirikshi qılıp qoyamız ha'm bizlerde Onın' so'zi bolmaydı.
