1 Petr 5 bob

Ja'ma'a't aqsaqalları ha'm jasları (1-11),Son'g'ı sa'lemnama (12-14).

¹ Aran'ızdag'ı ja'ma'a't aqsaqallarına olarday ja'ma'a't aqsaqalı bolg'an men, Masixtın' shekken azaplarının' gu'wası ha'm Ol qaytıp kelgende ashıq ko'rinetug'ın saltanatının' sheriklesi sıpatında mınalardı o'tinish etemen:

² Qudaydın' sizlerge tapsırg'an su'riwin ma'jbu'riy tu'rde emes, al shın kewilden, Qudaydın' erkine say qılıp bag'ın'lar. Bunı aqsha ushın paydaku'nemlik penen emes, al o'z qa'lewin'iz benen islen'ler.

³ O'zlerin'izge tapsırılg'an adamlarg'a u'stemlik etpey, su'riwge u'lgi bolın'lar.

⁴ Solay etsen'iz, bas Shopan kelgende, ma'n'gi ullılıqtın' tajın alasızlar.

⁵ Ha'y jaslar, sol sıyaqlı sizler de aqsaqallarg'a boysının'lar. Ha'mmen'iz bir-birin'iz benen kishipeyil qatnasta bolın'lar. Sebebi: «Quday menmenlerge qarsı turadı, Biraq kishipeyillilerge O'z miyrimin beredi».

⁶ Sonlıqtan o'zlerin'izdi Qudaydın' qu'diretli qolı astında pa's tutın'lar. Sonda belgilengen waqıt kelgende, Ol sizlerdi ma'rtebeli etedi.

⁷ Barlıq g'am-ta'shiwishlerin'izdi Og'an tapsırın'lar. O'ytkeni Ol sizlerge g'amxorlıq qıladı.

⁸ Saq ha'm sergek bolın'lar. Dushpanın'ız shaytan kimdi jutsam eken dep, aqırg'an arıslanday bolıp gezip ju'r.

⁹ İsenimde bekkem bolıp, shaytang'a qarsı turın'lar. Sebebi du'nyanın' basqa jerlerindegi tuwısqanların'ızdın' birdey azap shegip atırg'anınan xabarın'ız bar.

¹⁰ Pu'tkil miyrimnin' tiykarı bolg'an Quday sizlerdi İysa Masix arqalı O'zinin' ma'n'gilik saltanatına shaqırdı. Qısqa waqıt azap shekkenin'izden son', Ol sizlerdi O'zi jetilistiredi, bekkemleydi, ku'sh-quwat beredi ha'm tıyanaqlı qıladı.

¹¹ Qu'diret ma'n'gige Onıki bolsın! Awmiyin.

¹² Men sizlerge usı qısqasha xatımdı o'zim isenimli tuwısqanım dep esaplaytug'ın Silag'a jazdırıp atırman. Sizlerdi jigerlendirip, bul xatta aytqanlarımnın' Qudaydın' haqıyqıy miyrimi ekeni haqqında gu'walıq beremen. Usı miyrim menen bekkem turın'lar.

¹³ Sizler menen birge tan'lang'an Babilondag'ı iseniwshiler ja'ma'a'ti ha'm tutıng'an ulım Mark sizlerge sa'lem aytıp atır.

¹⁴ Bir-birin'izdi su'yispenshilik penen su'yip, sa'lemlesin'ler. Masixqa tiyisli bolg'an sizlerdin' ha'mmen'izge tınıshlıq yar bolsın!