1 Petr 1 bob
1 İysa Masixtın' elshisi Petrden, Pont, Galatiya, Kapadokiya, Aziya ha'm Bitiniya u'lkelerine tarqalıp ketken, sol u'lkelerde jat jerli bolıp jasag'an, Quday ta'repinen tan'lap alıng'anlarg'a sa'lem!
2 İysa Masixqa boysınıp, Onın' qanı u'stilerin'izge sebilip tazalanıwın'ız ushın, Quday A'ke sizlerdi a'zelden-aq tan'lap aldı ha'm Muxaddes Ruwx sizlerdi muxaddes qıldı. Sizlerge miyrim ha'm tınıshlıq mol-mol etip berilsin!
3 İyemiz İysa Masixtın' A'kesi – Qudayg'a alg'ıslar bolsın! Sebebi Ol O'zinin' sheksiz miyrim-sha'pa'a'ti menen bizlerdi jan'adan tuwıldırdı. Sonlıqtan İysa Masixtın' o'limnen tiriliwi arqalı bizlerge jog'almaytug'ın u'mit berdi.
4 ha'm shirimeytug'ın, pa'k ha'm eskirmeytug'ın bir miyrasqa eristirdi. Usı miyras sizler ushın aspanda saqlawlı tur.
5 Zamannın' aqırında ayan bolıwg'a tayar turg'an qutqarılıwg'a erisiwin'iz ushın, sizler isenimin'iz arqalı Qudaydın' qu'direti menen qorg'almaqtasız.
6 Usı sebepli quwanıp, shadlanın'lar. Ha'zir qısqa bir waqıt ha'r tu'rli sınawlarg'a ushırag'anın'ızda azap shegiwge tuwra kelse de,
7 bul isenimin'izdin' taza bolıwı ushın paydalı. O'ytkeni ot penen tazalang'anda joq bolıp ketetug'ın altınnan qımbatlıraq bolg'an isenimin'iz sınawdan o'tip, sizler İysa Masix kelgende, maqtaw, dan'q ha'm hu'rmetke sazıwar bolasızlar.
8 Sizler Masixtı ko'rmegen bolsan'ız da, Onı su'yesizler. Ha'zir Onı ko're almasan'ız da, Og'an isenip, so'z benen aytıp jetkiziwge qıyın bolg'an bir a'jayıp ha'm ullı quwanısh penen shadlanbaqtasızlar.
9 Sebebi isenimin'izdin' na'tiyjesine, yag'nıy janların'ızdın' qutqarılıwına erisesizler.
10 Sizlerge beriletug'ın miyrim haqqında payg'ambarshılıq etip aytqan payg'ambarlar bul qutqarılıw tuwralı muqıyatlap izlenip izertledi.
11 Olardın' ishinde bolg'an Masixtın' Ruwxı Masixtın' shegetug'ın azapları ha'm sol azaplardan son' keletug'ın ullılıq haqqında aldın ala bildirgende, olar bulardın' qay waqıtta ha'm qalay bolatug'ının izertledi.
12 Olardın' izertlep aytqanlarının' o'zlerinin' zamanında emes, al sizlerdin' zamanın'ızda bolatug'ının Quday olarg'a ashıq bildirdi. Bulardı, yag'nıy Xosh Xabardı aspannan jiberilgen Muxaddes Ruwxtın' qu'direti menen ja'riyalawshılar sizlerge ha'zir ja'riyaladı. Ha'tte, perishteler de bulardı biliwdi qattı qa'leydi.
13 Solay etip, aqıl-oyın'ızdı is-ha'reketke tayarlap, sergek bolın'lar. İysa Masix kelgende sizlerge beriletug'ın miyrimnen tolıq u'mit etin'ler.
14 Til alg'ısh balalar sıyaqlı bolıp, Qudaydı bilmegen o'tken o'mirin'izdegi jaman qa'lewlerin'iz boyınsha jasaman'lar.
15 Kerisinshe, sizlerdi shaqırg'an Quday muxaddes bolg'anı sıyaqlı, sizler de ha'r bir is-ha'reketin'izde muxaddes bolın'lar.
16 O'ytkeni bılay dep jazılg'an: «Muxaddes bolın'lar, sebebi Men muxaddespen» .
17 Hesh kimnin' bet-ju'zine qaramay, ha'r bir adamdı islerine qaray hu'kim etetug'ın Qudaydı «A'ke» dep shaqıratug'ın bolsan'ız, jat jerli bolıp jasaytug'ın bul du'nyadag'ı o'mirin'izde Qudaydan qorqıp jasan'lar.
18 Xabarın'ız bar, ata-babaların'ızdan qalg'an paydasız o'mir ta'rizinen gu'mis yamasa altın sıyaqlı o'tkinshi na'rseler menen satıp alınbadın'lar.
19 Al Qudaydın' minsiz ha'm kemshiliksiz Qozısı bolg'an Masixtın' biybaha qanı menen satıp alınıp qutqarıldın'lar.
20 Quday du'nyanı jaratpastan burın usı maqset penen Masixtı tan'lap alıp, Onı bul aqırg'ı ku'nlerde sizler ushın jiberdi.
21 Onı o'limnen tiriltip, dan'qqa eristirgen Qudayg'a Ol arqalı isenesiz. Sol sebepli isenimin'iz ha'm u'mitin'iz Qudayg'a qaratılg'an.
22 Haqıyqatqa boysınıw arqalı o'z janların'ızdı gu'nadan tazalag'anlıqtan, tuwısqanların'ızdı tuwısqanlıq su'yispenshilik penen su'yesizler. Solay etip, bir-birin'izdi shın ju'rekten su'yin'ler.
23 3Sizler o'letug'ın na'sil arqalı emes, al o'lmeytug'ın na'sil arqalı, yag'nıy Qudaydın' tiri ha'm ma'n'gilik so'zi arqalı jan'adan tuwıldın'ız.
24 O'ytkeni: «Pu'tkil adamzat sho'pke uqsaydı, Onın' barlıq sa'n-saltanatı da dala gu'lindey, Sho'p quwrap qalar, gu'ller to'giler.
25 Biraq, Qudaydın' so'zi ma'n'gi saqlanar» . Usı so'z – sizlerge ja'riyalang'an Xosh Xabar.
