Yaqıp 1 bob
1 Men, Qudaydın' ha'm İyemiz İysa Masixtın' qulı Yaqıptan, jer ju'zine tarqalıp ketken Qudaydın' xalqına sa'lem!
2 Ha'y, tuwısqanlarım, tu'rli sınawlarg'a ushırag'anın'ızda onı u'lken quwanısh penen qabıl etin'ler.
3 Sebebi isenimin'izdin' sınalıwınan sabırlıq payda bolatug'ının bilesizler.
4 Hesh bir kemshiliksiz, jetilisken ha'm minsiz adamlar bolıwın'ız ushın tolıq sabırlıq etin'ler.
5 Eger aran'ızdag'ı birin'izdin' danalıg'ı kem bolsa, ha'mmege saqıylıq penen, ayıplamay beretug'ın Qudaydan sorasın. Quday og'an beredi.
6 Biraq hesh gu'manlanbastan, isenim menen sorasın. O'ytkeni gu'manlang'an adam samal menen shayqatılıp tınıshsızlang'an ten'iz tolqınına uqsaydı.
7 O'zinin' pu'tkil jollarında turaqsız bolg'an,
8 bunday eki oylı adam İyemizden bir na'rse alaman, dep oylamasın
9 To'men jasaytug'ın tuwısqan Qudaydın' o'zine bergen ma'rtebesi menen maqtansın.
10 Al bay tuwısqan o'z pa'sligi menen maqtansın. Sebebi bay adam daladag'ı gu'l sıyaqlı solıp qaladı.
11 Quyash shıg'ıp, ja'ziyrama ıssısı menen sho'pti quwratıp taslaydı. Onın' gu'li to'gilip, ko'rkinin' go'zzallıg'ı jog'aladı. Bay adam da usılay o'z isleri menen solıp joq boladı.
12 Sınawg'a shıdag'an adam baxıtlı! O'ytkeni ol sınawdan o'tkennen son', Qudaydın' O'zin su'yetug'ınlarg'a wa'de etken o'mir tajın aladı.
13 Azg'ırılıwg'a tu'skende hesh kim: «Men Quday ta'repinen azg'ırılıp atırman», – demesin. Sebebi Quday jamanlıq penen azg'ırıla almaydı ha'm Onın' O'zi de hesh kimdi azg'ırmaydı.
14 Biraq ha'r kim o'zinin' jaman qa'lewlerine berilip, aldanıp azg'ırıladı.
15 Keyin sol qa'lew ha'mledar bolıp, gu'nanı tuwadı. Al gu'na jetilisip, o'limdi tuwadı.
16 Ha'y, su'yikli tuwısqanlarım, aldanban'lar!
17 Ha'r qanday jaqsı ha'm minsiz sıy joqarıdan, nurlar A'kesi bolg'an Qudaydan keledi. Onda hesh qanday o'zgeris yamasa o'zgeriwshi ko'len'ke joq.
18 nın' jaratqanlarının' arasında birinshi miyweleri bolıwımız ushın, Ol O'z qa'lewi boyınsha bizlerdi haqıyqat so'zi menen o'mirge eristirdi.
19 Su'yikli tuwısqanlarım, mınanı este saqlan'lar: ha'r bir adam esitiwde shaqqan, so'ylewde aqırın, g'a'zepleniwde de aqırın bolsın.
20 O'ytkeni adamnın' g'a'zebi Qudaydın' talap etken haqlıg'ın iske asıra almaydı.
21 Sonlıqtan ha'r qanday iplaslıqtı ha'm ha'mme jerdi jaylap ketken jamanlıqtı taslap, o'zlerin'izde egilgen, janların'ızdı qutqara alatug'ın Qudaydın' so'zin kishipeyillik penen qabıl etin'ler.
22 So'zdi tek tın'lawshılar bolıp, o'z-o'zin'izdi aldaman'lar, onı orınlawshılar bolın'lar.
23 Eger kim de kim so'zdi tın'lap, onı orınlamasa, ol o'z ta'biyg'ıy kelbetin aynada ko'rgen adamg'a uqsaydı.
24 Sebebi ol o'zin ko'rip bolıp, ketip qaladı ha'm qanday ekenin da'rhal umıtadı.
25 Biraq azatlıq beriwshi minsiz nızamg'a anıqlap qaraytug'ın ha'm ol boyınsha jasaytug'ın adam umıtshaq tın'lawshı bolmay, onı is ju'zinde qollanadı. Bunday adam o'z isleri menen baxıtlı boladı.
26 O'zin dinshil dep esaplap, tilin tıymag'an adam o'zin o'zi aldag'an boladı. Onın' dinshilligi bos.
27 A'kemiz Qudaydın' aldında pa'k ha'm qa'tesiz dinshillik bul – jetim-jesirlerge qıyın ku'nlerinde ja'rdem etip, o'zin du'nyanın' napa'kliklerinen saqlaw.
