Elshiler 20 bob
1 Efestegi topalan' basılg'annan keyin, Pavel sha'kirtlerdi shaqırtıp jigerlendirdi. Son'ınan olar menen xoshlasıp, Makedoniyag'a ketiw ushın jolg'a shıqtı.
2 Ol jol-jo'nekey u'lkelerdi aralag'anda, iseniwshilerdi ko'p so'zler menen jigerlendirip, Gretsiyag'a keldi.
3 Ol jerde u'sh ay qaldı. Keme menen Siriyag'a ketpekshi bolg'anda, yahudiyler o'zine qarsı til biriktirgenlikten, Makedoniya arqalı izine qaytıwg'a qarar etti.
4 Pir ulı veriyalı Sopater, salonikalılardan Aristarx penen Sekundus, derbeli Gayus ha'm Timofey, Aziya u'lkesinen Tixik penen Trofim onın' menen birge ketti.
5 Bular burın ketip, bizlerdi Troas qalasında ku'tip turdı.
6 Al bizler Ashıtqısız nan bayramınan son', Filipten keme menen jolg'a shıg'ıp, bes ku'nde olarg'a, Troasqa jetip keldik. Ol jerde jeti ku'n boldıq.
7 Ha'ptenin' birinshi ku'ni nan sındırıw ushın bir jerge jıynalg'anımızda, Pavel iseniwshilerge so'z so'yledi. Erten'ine ketetug'ın bolg'anlıqtan, onın' wazı yarım aqshamg'a deyin sozıldı.
8 Bizler jıynalg'an joqarg'ı qabattag'ı bo'lmede ko'p shıralar janıp turg'an edi.
9 Evtix atlı bir jas jigit a'ynekke minip otır edi. Paveldin' so'zi sozılıp ketkenlikten, Evtixtı uyqı bastı. Ol uyıqlap ketip, u'shinshi qabattan qulap tu'sti. Onı jerden ko'terip alg'anda, ol o'lip qalg'an edi.
10 Pavel to'menge tu'sip, jigittin' u'stine en'keydi de, onın' en'sesinen ko'terip: «Uwayımlamay-aq qoyın', onın' janı bar!» – dedi.
11 Son'ınan joqarıg'a ko'terilip, nan sındırıp jedi. Olar menen tan' atqansha ko'p so'yleskennen son', jolg'a shıqtı.
12 Jigitti u'yine tiri aparıp, iseniwshiler u'lken jubanısh aldı.
13 Bizler burınıraq keme menen ketip, Asos qalasına bardıq. Ol jerden Paveldi mingizip alıwımız kerek edi. O'ytkeni onın' o'zi piyada ju'rgisi kelgenlikten, bizlerge usılay tapsırg'an edi.
14 Pavel menen Asosta ushırasıp, onı kemege mingizdik te, Mitilina qalasına bardıq.
15 Ol jerden keme menen jolg'a shıg'ıp, erten'ine Xios atawının' qarsısına keldik. Bir ku'nnen son' Samos atawına, onın' erten'ine Milit qalasına bardıq.
16 Aziya u'lkesinde waqıttı bosqa jibermew ushın, Pavel Efeske barmay o'tiwdi uyg'ardı. Eger mu'mkin bolsa, ol Eliwinshi ku'ni bayramında Erusalimde bolıwg'a asıqpaqta edi.
17 Pavel Militten Efeske adam jiberip, iseniwshiler ja'ma'a'tinin' aqsaqalların janına shaqırttı.
18 Olar janına kelgende, Pavel bılay dedi: – Aziya u'lkesine qa'dem basqan da'slepki ku'nimnen baslap, sizler menen birge bolg'an waqtımnın' ha'mmesinde qalay jasag'anımdı bilesizler.
19 Yahudiylerdin' qastıyanshılıqları sebepli basımnan o'tken qıyınshılıqlarg'a qaramastan, İyemizge tolıq kishipeyillik penen, sizler ushın ko'z jaslarımdı to'gip xızmet ettim.
20 Ja'ne de, paydalı bolg'an ha'r qanday na'rseni qaldırmay, sizlerge xalıq aldında ha'm u'ylerde ta'lim beriwdi toqtatpadım.
21 Yahudiylerge de, greklerge de ta'wbe etip Qudayg'a qaytıwdı ha'm İyemiz İysag'a iseniwdi ja'riyaladım.
22 Al endi bolsa, Muxaddes Ruwxtın' jetelewi menen Erusalimge baratırman. Ol jerde mag'an ne bolatug'ının bilmeymen.
23 Biraq Muxaddes Ruwx meni qamaq ha'm qıyınshılıqlar ku'tip turg'anın mag'an ha'r bir qalada bildirip atır+.
24 Bug'an qaramastan, men o'z janımdı ayamayman. Tek o'z ba'ygimdi basıp o'tip, Qudaydın' miyriminin' Xosh Xabarı tuwralı gu'walıq beriwdi, yag'nıy İyemiz İysanın' mag'an tapsırg'an isin juwmaqlasam bolg'anı.
25 Men aran'ızda ju'rip, Qudaydın' Patshalıg'ı haqqında ja'riyaladım. Endi bolsa, sizlerdin' hesh qaysısın'ızdın' menin' ju'zimdi qaytıp ko'rmeytug'ının bilemen.
26 Sonlıqtan bu'gin sizlerge mınanı ashıq aytaman, kim de kim aran'ızda qutqarılmasa, men ol ushın juwapker emespen.
27 Sebebi sizlerge Qudaydın' pu'tkil erkin tolıq ja'riyaladım.
28 O'zlerin'izge ha'm Muxaddes Ruwx sizlerdi bag'ıwshı qılıp qoyg'an pu'tkil su'riwge ko'z-qulaq bolın'lar! Qudaydın' O'z Ulının' qanı menen satıp alg'an iseniwshiler ja'ma'a'tin bag'ın'lar!
29 Men ketkennen son', su'riwdi ayamaytug'ın jırtqısh qasqırlardın' aran'ızg'a kiretug'ının bilemen.
30 Ha'tte, aran'ızdan sha'kirtlerdi joldan azg'ırıp, o'zlerinin' izlerine ertiw ushın, haqıyqattı burmalawshı adamlar shıg'adı.
31 Sonlıqtan sergek bolın'lar! U'sh jıl boyı, ku'n-tu'n demey ko'z jaslarımdı to'gip, ha'r birin'izge u'zliksiz aqıl-na'siyat bergenimdi eslerin'izde saqlan'lar!
32 Endi men sizlerdi Qudayg'a ha'm Onın' miyrimin bildiretug'ın so'zge tapsıraman. Bul so'z sizlerdi bekkemlep, Qudaydın' muxaddes bolg'an pu'tkil adamları menen birge sizlerge de miyras beriwge qu'direti jetedi.
33 Men hesh kimnin' gu'misin, altının yamasa kiyimin ku'semedim.
34 O'zimnin' ha'm menin' menen birge bolg'anlardın' mu'ta'jlikleri ushın usı qollarım menen miynet etkenimdi bilesizler.
35 İyemiz İysanın': «Alg'an adamnan go're, bergen adam baxıtlıraq», – degen so'zin umıtpay, usılay miynet etip, ha'lsizlerge ja'rdem beriw kerekligin sizlerge islegen ha'r bir isimde ko'rsettim.
36 Pavel usı so'zlerdi aytıp bolg'annan son', olardın' ha'mmesi menen birge dize bu'gip, duwa etti.
37 Olardın' ha'mmesi qattı jılastı ha'm Paveldin' moynınan qushaqlap, onı su'ydi.
38 A'sirese olardı qattı qapa qılg'an, Paveldin': «Menin' ju'zimdi qaytıp ko'rmeysiz», – degen so'zleri boldı. Son'ınan onı kemege deyin shıg'arıp saldı.
