Elshiler 1 bob
1 Hu'rmetli Teofil! Men birinshi kitabımda İysanın' islewge ha'm u'yretiwge kiriskeninen baslap,
2 O'zi tan'lag'an elshilerine Muxaddes Ruwx arqalı buyrıqlar bergennen son', aspang'a alıng'an ku'nine deyin bolg'an waqıyalardın' ha'mmesin jazg'an edim.
3 Ol azap shegip o'lgennen keyin, ko'p isenimli da'liller menen elshilerge O'zinin' qayta tirilgenin ko'rsetti. Qırıq ku'n dawamında olarg'a ko'rinip, Qudaydın' Patshalıg'ına baylanıslı na'rseler haqqında ayttı.
4 Olar menen birge bolg'anda* mına buyrıqtı berdi: – Erusalimnen ketip qalman'lar. Al o'zlerin'iz Mennen esitken A'kemnin' wa'desinin' orınlanıwın ku'tin'ler.
5 Sebebi Yaqıya suw menen shomıldırg'an edi, biraq sizler ko'p ku'n o'tpey Muxaddes Ruwx penen shomıldırılasızlar.
6 Elshiler birge jıynalg'anda, İysadan bılay dep soradı: – İyem, İzrailg'a patshalıqtı ha'zir qaytarıp berejaqsan' ba?
7 İysa olarg'a: – A'kenin' O'z biyligi menen belgilep qoyg'an waqıt-ma'ha'llerin biliw sizlerge berilmegen.
8 Biraq sizlerge Muxaddes Ruwx tu'skende ku'shquwat alasızlar ha'm Erusalimde, pu'tkil Yahudiyada, Samariyada, ha'tte, du'nyanın' shetine deyin Menin' gu'walarım bolasızlar, – dedi.
9 İysa usılardı aytıp bolıp, olardın' ko'z aldında aspang'a alındı. Onı bir bult qaplap, olardın' na'zerinen uzaqlastırdı
10 İysa ko'terilip baratırg'anda, olar ko'zlerin aspang'a tigip turg'an edi. Birden olardın' qasında aq kiyimli eki adam payda bolıp:
11 – Ha'y, galilalılar, nege aspang'a qarap tursızlar? Sizlerden aspang'a alıng'an bul İysanın' qalay ko'terilgenin ko'rgenin'izdey, Ol anıq solay qaytıp keledi, – dedi.
12 Bunnan son', elshiler Za'ytu'n tawı dep atalg'an tawdan Erusalimge qaytıp keldi. Bul taw Erusalimge jaqın bolıp, bir shaqırımday jerde jaylasqan edi.
13 Qalag'a kirip, o'zleri bolıp atırg'an u'ydin' joqarg'ı qabatına ko'terildi. Olar: Petr, Yuxan, Yaqıp, Andrey, Filip, Tomas, Bartolomey, Matta, Alpeydin' ulı Yaqıp, watansu'yer Simon ha'm Yaqıp ulı Yahuda edi.
14 Bulardın' ha'mmesi hayal-qızlar, İysanın' anası Ma'riyam ha'm Onın' tuwısqanları menen birlikte u'zliksiz duwa etetug'ın edi.
15 Sol ku'nlerdin' birinde jıynalg'an bir ju'z jigirmag'a shamalas iseniwshilerdin' arasınan Petr ornınan turıp bılay dedi:
16 – Tuwısqanlarım! Muxaddes Ruwxtın' İysanı uslap alg'anlarg'a jolbasshılıq etken Yahuda haqqında Dawıt arqalı a'welden bildirgen Muxaddes Jazıwı orınlanıwı kerek edi.
17 Yahuda da bizlerdin' aramızda biri bolıp, usı xızmetten u'lesin alg'an edi.
18 Bul adam o'z qılmısının' haqısına bir egislik jer satıp aldı. Ol sol jerde et-betinen jıg'ılıp, qarnı jarıldı ha'm barlıq ishekleri aqtarıldı.
19 Bul waqıya Erusalim turg'ınlarının' ha'mmesine ma'lim boldı. Sonlıqtan sol egislik jer olardın' tilinde «Xakeldama» dep atalıp, «Qan jeri» degen ma'nisti an'latadı.
20 O'ytkeni Zaburda: «Onın' ma'kanı qan'ırap qalsın, Onda jasawshı bolmasın». Ja'ne de: «Onın' ornın basqa birew iyelesin», – dep jazılg'an.
21 Sonlıqtan İyemiz İysa bizler menen birge bolg'anda, yag'nıy Yaqıyanın' suwg'a shomıldırıwınan baslap, İysanın' aspang'a alıng'an ku'nine deyin,
22 ba'rqulla bizlerdin' aramızda bolg'an adamlardın' biri Onın' qayta tirilgenine bizler menen birge gu'wa bolıwı tiyis.
23 Solay etip, eki adam: laqabı Yustus bolg'an Barsaba dep atalatug'ın Yusup ha'm Matiyas usınıldı.
24 Son'ınan olar bılay dep duwa etti: – O, İyemiz, Sen ha'r bir adamnın' kewlin bilesen'.
25 Usı eki adamnın' qaysısın elshilik xızmetine tan'lag'anın'dı bizlerge ko'rset. Al Yahuda bul xızmetti taslap, o'zine ılayıqlı jerge ketti.
26 Olar ekewine shek taslag'anda, shek Matiyasqa tu'sti. Solay etip, ol on bir elshinin' qatarına qosıldı.
