Yuxan 18 bob
1 İysa duwa etip bolg'annan son', sha'kirtleri menen birge Kidron sayının' arg'ı jag'asına o'tti. Ol jerde bir bag' bar edi. İysa sha'kirtleri menen sol bag'qa kirdi.
2 Og'an satqınlıq qılg'an Yahuda da bul jerdi biletug'ın edi. Sebebi İysa sha'kirtleri menen ol jerde tez-tez ushırasıp turatug'ın edi.
3 Solay etip, Yahuda janına bir topar Rim a'skerleri menen bas ruwxaniyler ha'm pariseyler jibergen saqshılardı alıp, sol jerge keldi. Olardın' qollarında panıs, shom ha'm qurallar bar edi.
4 İysa O'zine bolajaq ha'mme na'rseni bilgenlikten, aldına shıg'ıp, olardan:
5 – Nasıralı İysanı, – dep juwap berdi olar. – Men – Solman, – dedi İysa. İysanın' satqını Yahuda da olar menen birge turg'an edi.
6 İysa: «Men – Solman» dewi menen, olar artqa sheginip, jerge jıg'ıldı.
7 Sonda İysa olardan ja'ne: – Kimdi izlep ju'rsizler? – dep soradı. – Nasıralı İysanı, – desti olar.
8 İysa juwap berip: – Sizlerge ayttım-g'o, Men – Solman. Eger Meni izlep ju'rgen bolsan'lar, bul adamlardı jiberin'ler, ketsin, – dedi.
9 Bul Onın': «Senin' Mag'an bergenlerin'nin' hesh birin joytpadım», – dep burın O'zi aytqan so'zlerinin' orınlanıwı ushın boldı.
10 Sonda Simon Petr janındag'ı qılıshın suwırıp alıp, bas ruwxaniydin' qulının' on' qulag'ın shawıp tasladı. Quldın' atı Malkus edi.
11 İysa Petrge: – Qılıshın'dı qınabına salıp qoy! A'kemnin' Mag'an bergen azap kesesinen ishpeyin be? – dedi.
12 Son'ınan a'skerler toparı menen olardın' basshısı ha'm yahudiylerdin' saqshıları İysanı uslap bayladı.
13 Onı da'slep Xannag'a alıp bardı. Xanna sol jılı bas ruwxaniy bolg'an Kayafanın' qa'yin atası edi.
14 Yahudiy basshılarına: «Xalıq ushın bir adamnın' o'liwi jaqsıraq», – dep ken'es bergen usı Kayafa edi.
15 Simon Petr menen ja'ne basqa sha'kirti İysanın' izine erip bardı. Bul sha'kirt bas ruwxaniyge tanıs bolg'anlıqtan, İysa menen birge bas ruwxaniydin' ha'wlisine kirdi.
16 Al Petr sırtta, qapının' aldında qaldı. Bas ruwxaniydin' tanısı bolg'an sol sha'kirt sırtqa shıg'ıp, qapını qarawıllag'an shorı qız benen so'ylesti de, Petrdi ishke alıp kirdi.
17 Qapını qarawıllag'an shorı qız Petrden: – Sen de bul Adamnın' sha'kirtlerinen emessen' be? – dep soradı. – Yaq, – dep juwap berdi ol.
18 Ku'n suwıq bolg'anlıqtan, xızmetshiler menen saqshılar ko'mir jag'ıp, jılınıp turdı. Petr de olar menen birge turıp jılındı.
19 Bas ruwxaniy İysadan Onın' sha'kirtleri ha'm ta'liymatı haqqında soradı.
20 İysa og'an bılay dep juwap berdi: – Men du'nyag'a ashıq so'yledim. Ha'mme waqıtta yahudiyler jıynalatug'ın ma'jilisxanalarda ha'm İbadatxanada u'yrettim. Jasırın hesh na'rse aytpadım.
21 Nege Mennen sorap atırsan'? So'ylegenlerimdi esitkenlerden sora. Olar ne aytqanımdı biledi.
22 İysa usılardı aytqanda, Og'an jaqın turg'an saqshılardın' biri: – Bas ruwxaniyge de usılay juwap beriwge bola ma? – dep Onın' betine urıp jiberdi.
23 İysa og'an: – Eger Men nadurıs so'ylegen bolsam, nadurıslıg'ımdı da'lille. Biraq durıs so'ylegen bolsam, nege Meni urasan'? – dedi.
24 Xanna İysanı baylawlı halında bas ruwxaniy Kayafag'a jiberdi.
25 Simon Petr ele otqa jılınıp tur edi. – Sen de Onın' sha'kirtlerinen emessen' be? – dep soradı olar. Biraq ol tanıp: – Yaq, – dedi.
26 Bas ruwxaniydin' qullarının' biri, Petr qulag'ın shapqan adamnın' ag'ayini Petrden: – Seni bag'da Onın' menen birge ko'rgen joqpan ba? – dep soradı.
27 Petr ja'ne tandı. Sol waqıtta-aq qoraz shaqırdı.
28 Tan' azanda yahudiy basshıları İysanı Kayafanın' aldınan Rim ha'kimxanasına alıp bardı. Olar Qutqarılıw bayramının' asın haramlanbay jew ushın ha'kimxanag'a kirmedi.
29 Sol sebepten Pilat sırtqa shıg'ıp, olardan: – Bul Adamdı ne na'rsede ayıplap atırsızlar? – dep soradı.
30 Olar juwap berip: – Eger bul Adam jınayatshı bolmag'anda, Onı senin' aldın'a alıp kelmes edik, – dedi.
31 Pilat olarg'a: – Onı o'zlerin'iz alıp ketip, o'z nızamın'ız boyınsha hu'kim etin'ler, – dedi. Yahudiy basshıları: – Bizlerge hesh kimdi o'ltiriwge ruxsat etilmegen, – dedi.
32 İysanın' O'zinin' qanday o'lim menen o'letug'ını haqqında aytqan so'zlerinin' orınlanıwı ushın usılay boldı.
33 Sonda Pilat ja'ne ha'kimxanag'a kirdi ha'm İysanı o'zine shaqırtıp: – Sen Yahudiylerdin' Patshasımısan'? – dep soradı.
34 İysa bılay dep juwap berdi: – Bunı o'zin' aytıp tursan' ba yamasa Men tuwralı sag'an basqalar ayttı ma?
35 Pilat: – Men ne yahudiymen be? Seni mag'an O'z xalqın' menen bas ruwxaniylerin' tapsırdı. Sen ne islep qoydın'? – dedi.
36 İysa juwap berip: – Menin' Patshalıg'ım bul du'nyada emes. Eger Patshalıg'ım bul du'nyada bolg'anda, yahudiy basshılarının' qolına tapsırılmawım ushın, xızmetshilerim gu'reser edi. Biraq Menin' Patshalıg'ım bul jerde emes, – dedi.
37 – Demek, Sen Patsha ekensen'-da'? – dedi Pilat. İysa juwap berip: – O'zin' aytqanday, Men Patshaman. Men haqıyqat haqqında gu'walıq beriw ushın tuwıldım ha'm sonın' ushın du'nyag'a keldim. Kim haqıyqat ta'repinde bolsa, Menin' dawısımdı esitedi, – dedi.
38 Pilat İysag'a: – Haqıyqat degen ne? – dedi. Bunı aytıp bolg'annan son', Pilat ja'ne yahudiylerdin' janına shıg'ıp, olarg'a: – Men Onnan hesh ayıp taba almay atırman.
39 Biraq sizlerde bar bir a'det boyınsha, men ha'r Qutqarılıw bayramında sizler ushın bir tutqındı bosatıp beretug'ın edim. Sizler ushın yahudiylerdin' Patshasın bosatıp beriwimdi qa'leysizler me? – dedi.
40 Biraq olar ja'ne: – Yaq, Onı emes, Barabanı bosat! – dep baqırıstı. Al Baraba qozg'alan'shı edi.
