Yuxan 16 bob
1 – Men bulardı sizlerge isenimnen qaytpawın'ız ushın ayttım.
2 Sizlerdi ma'jilisxanadan quwıp jiberedi. Ha'tte, sizlerdi o'ltirip atırg'an ha'r bir adam bunın' menen Qudayg'a xızmet etip atırman, dep oylaytug'ın waqıt keledi.
3 Bulardı A'kemdi de, Meni de bilmegenlikten isleydi.
4 Sol waqıt kelgende bulardı sizlerge aytqanımdı eske tu'siriwin'iz ushın sizlerge bildirgen edim. A'welden sizlerge bulardı aytqan joqpan, sebebi Men sizler menen birge edim.
5 – Endi bolsa, Meni Jibergennin' janına baratırman. Degen menen, aran'ızda hesh kim Mennen: «Qayaqqa baratırsan'?» – dep sorap atırg'an joq.
6 Biraq sizlerge bulardı aytqanım ushın, ju'regin'iz qayg'ıg'a toldı.
7 Sog'an qaramastan, Men sizlerge haqıyqatın aytaman: Menin' ketkenim sizler ushın jaqsıraq. Eger Men ketpesem, sizlerge Jubatıwshı kelmeydi. Eger ketsem, Onı sizlerge jiberemen.
8 Ol kelgende, gu'na haqqında, haqlıq haqqında ha'm hu'kim haqqında du'nyanın' aljasqanın a'shkaralaydı.
9 Gu'na sonnan ibarat: adamlar Mag'an isenbeydi.
10 Haqlıq sonnan ibarat: Men A'kemnin' janına ketip baratırman ha'm endi qaytıp Meni ko'rmeysizler.
11 Hu'kim sonnan ibarat: bul du'nyanın' ha'kimi hu'kim etildi.
12 Sizlerge ja'ne de aytatug'ınlarım ko'p, biraq ha'zir sizler ko'tere almaysızlar.
13 Biraq Ol, yag'nıy Haqıyqat Ruwxı kelgende, sizlerdi tolıq haqıyqatqa qaray jeteleydi. Ol O'zliginen so'ylemeydi, tek neni esitse, sonı so'yleydi ha'm keleshekte ne bolatug'ının sizlerge bildiredi.
14 Ol Meni ullılaydı. O'ytkeni Ol Menikinen alıp, sizlerge bildiredi.
15 A'kemde ne bar bolsa, ha'mmesi Meniki. Sonlıqtan: «Ol Menikinen alıp, sizlerge bildiredi», – degen edim.
16 Birazdan son', sizler Meni qaytıp ko'rmeysizler. Ja'ne birazdan son', Meni ko'resizler.
17 Sonda sha'kirtlerdin' geybirewleri bir-birine: – «Birazdan son', sizler Meni ko'rmeysizler, ja'ne birazdan son', Meni ko'resizler» ha'm «Sebebi A'keme ketip baratırman», – dep aytıp, Ol bizlerge ne demekshi?
18 «Birazdan son'» degeni ne? Ne aytqanına tu'sinbey atırmız-g'o, – dedi
19 İysa olardın' O'zine bir soraw bermekshi bolg'anın bilip, olarg'a bılay dedi: – «Birazdan son', Meni ko'rmeysizler, ja'ne birazdan son', Meni ko'resizler», – degenim haqqında bir-birin'izden sorap tursızlar ma?
20 Sizlerge shının, haqıyqatın aytaman: sizler jılap, aza tutasızlar, al du'nya quwanadı. Sizler qayg'ırasızlar, biraq qayg'ın'ız quwanıshqa aylanadı.
21 Hayal bala tuwg'anda azap shegedi, o'ytkeni onın' waqtı keldi. Biraq balasın tuwg'annan son', du'nyag'a adam kelgenlikten quwanıp, shekken azabın umıtıp ketedi.
22 Sol sıyaqlı, sizler de ha'zir qayg'ırıp atırsızlar. Biraq Men sizlerdi ja'ne ko'remen ha'm ju'regin'iz quwanıshqa toladı. Bul quwanıshtı sizlerden hesh kim tartıp ala almaydı.
23 Sol ku'ni Mennen hesh na'rse soramaysızlar. Sizlerge shının, haqıyqatın aytaman: Menin' atım menen A'kemnen ne sorasan'lar da sizlerge beredi.
24 Ha'zirge deyin sizler Menin' atım menen hesh na'rse soramadın'lar. Soran'lar, alasızlar, sonda quwanıshın'ız tolı boladı.
25 Sizlerge bulardı tımsallar menen ayttım. Biraq Men sizlerge tımsallar menen so'ylemeytug'ın waqıt keledi, sonda A'kem haqqında sizlerge ashıqtan-ashıq aytaman.
26 Sol ku'ni Menin' atım menen A'kemnen soraysızlar. Sizler ushın A'kemnen Men sorayman, dep atırg'anım joq.
27 A'kemnin' O'zi sizlerdi su'yedi, sebebi sizler Meni su'yip, Menin' A'kemnen kelgenime isendin'ler.
28 Men A'kemnen shıg'ıp, du'nyag'a keldim. Endi du'nyanı qaldırıp, A'keme qaytıp baratırman.
29 Sha'kirtleri İysag'a: – Mine, endi ashıq aytıp tursan', hesh tımsal qollanıp atırg'an joqsan'.
30 Senin' ha'mme na'rseni biletug'ının'dı endi bilemiz. Hesh kimnin' Sag'an soraw beriwinin' ha'jeti joq. Sol sebepli, Senin' Qudaydan kelgenin'e isenemiz, – dedi.
31 İysa olarg'a juwap berip bılay dedi: – Endi isenesizler me?
32 Mine, ha'mmen'iz u'ylerin'izge tarqap ketip, Meni jalg'ız qaldıratug'ın waqtın'ız keledi, ol kelip qaldı da. Biraq Men jalg'ız emespen, o'ytkeni A'kem Menin' menen birge.
33 Bulardı sizlerge Mende bolıp, tınıshlıq alıwın'ız ushın ayttım. Bul du'nyada qıyınshılıq ko'resizler, biraq ma'rt bolın'lar, Men du'nyanı jen'dim!
