Yuxan 14 bob
1 İysa sha'kirtlerine bılay dedi: – Ju'reklerin'iz g'am shekpesin. Qudayg'a isenin'ler, Mag'an da isenin'ler.
2 A'kemnin' u'yinde orın ko'p. Eger olay bolmag'anda, sizlerge aytpas edim. O'ytkeni Men sizler ushın orın tayarlawg'a ketip baratırman.
3 Men barıp, sizler ushın orın tayarlag'anımnan son', sizler de Men bolatug'ın jerde bolıwın'ız ushın, ja'ne kelip, sizlerdi O'z janıma alıp ketemen.
4 Men baratug'ın jerge aparatug'ın joldı sizler bilesizler.
5 Tomas İysag'a: – İyem, Senin' qayaqqa baratug'ının'dı bilmeymiz-g'o. Joldı qalay bile alamız? – dedi.
6 İysa og'an bılay dedi: – Men jol, haqıyqat ha'm o'mirmen. Men arqalı bolmasa, hesh kim A'kege bara almaydı.
7 Eger Meni bilsen'ler, A'kemdi de bilesizler. Ha'zirden baslap Onı bilesizler ha'm Onı ko'rdin'ler.
8 Filip İysag'a: – İyem, bizlerge A'keni ko'rset, bizlerge sonın' o'zi jetkilikli, – dedi.
9 İysa og'an bılay dedi: – Filip, Men sonsha waqıttan beri sizler menen birge bolsam da, Meni ele bilmeysen' be? Meni ko'rgen A'keni ko'rgen boladı-g'o. Sen ne ushın: «Bizlerge A'keni ko'rset», – dep aytıp atırsan'?
10 Menin' A'kede, A'kenin' Mende ekenine isenbeysen' be? Sizlerge aytqan so'zlerimdi O'zligimnen aytıp turg'an joqpan, al Mende jasap atırg'an A'ke O'z islerin islep atır.
11 Menin' A'kede, A'kenin' Mende ekenine isenin'ler. Hesh bolmasa, islegen islerim arqalı Mag'an isenin'ler.
12 Sizlerge shının, haqıyqatın aytaman: Mag'an isengen adamnın' o'zi de Men islegen islerdi isleydi, ha'tte, olardan da u'lkenirek islerdi isleydi. Sebebi Men A'keme baratırman.
13 A'ke Ulı arqalı ullılanıwı ushın, Menin' atım menen ne sorasan'lar da, ha'mmesin orınlayman.
14 Menin' atım menen bir na'rse sorasan'lar, Men onı orınlayman.
15 – Eger Meni su'ysen'ler, Menin' buyrıqlarımdı orınlaysızlar.
16 Men A'kemnen sorayman ha'm Ol sizler menen ma'n'gi birge bolıwı ushın basqa Jubatıwshını jiberedi.
17 Ol – Haqıyqat Ruwxı. Du'nya Onı qabıl ete almaydı. O'ytkeni Onı ko'rmeydi de, tanımaydı da. Biraq sizler Onı bilesizler. Sebebi Ol sizler menen birge jasaydı, Ol ishin'izde boladı.
18 Sizlerdi jetim qılıp qaldırmayman, sizlerge qaytıp kelemen.
19 Birazdan keyin, du'nya Meni qaytıp ko'rmeydi. Biraq sizler Meni ko'resizler. O'ytkeni Men qayta tirilemen, sizler de qayta tirilesizler.
20 Sol ku'ni sizler Menin' A'kemde, sizlerdin' Mende ha'm Menin' sizlerde ekenimdi bilesizler.
21 Menin' buyrıqlarımdı bilip, olardı orınlag'an adam – Meni su'yetug'ın adam. Meni su'ygen adamdı A'kem de su'yedi. Men de onı su'yip, og'an O'zimdi ko'rsetemen.
22 İsqariotlı emes basqa Yahuda İysag'a: – İyem, bul qalay bolg'anı, O'zin'di du'nyag'a emes, bizlerge ko'rsetejaqsan' ba? – dedi.
23 İysa og'an bılay dep juwap berdi: – Kim de kim Meni su'yse, Menin' so'zimdi orınlaydı. A'kem de onı su'yedi. Bizler og'an kelip, onın' menen birge jasaymız.
24 Meni su'ymegen adam so'zlerimdi orınlamaydı. Sizler esitip atırg'an so'zler Meniki emes, al Meni jibergen A'kemdiki.
25 Men ele sizler menen birge bolg'an waqtımda sizlerge bulardı ayttım.
26 A'kemnin' Menin' atımnan jiberetug'ın Jubatıwshısı, Muxaddes Ruwx sizlerge ha'mmesin u'yretedi. Ol Menin' sizlerge aytqanlarımnın' ha'mmesin eslerin'izge tu'siredi.
27 Men sizlerge tınıshlıq qaldıraman. O'z tınıshlıg'ımdı sizlerge beremen. Men beretug'ın tınıshlıq du'nya beretug'ın tınıshlıqqa uqsamaydı. Ju'reklerin'iz g'am shekpesin, qorqpan'lar.
28 Sizler Menin': «Sizlerden ketemen ha'm ja'ne sizlerge qaytıp kelemen», – degenimdi esittin'ler. Eger sizler Meni su'ygenin'izde: «A'kemnin' janına baratırman», – degenime quwanar edin'ler. Sebebi A'kem Mennen ullı.
29 Bular ju'z bergende iseniwin'iz ushın, ele ju'z bermesten burın, sizlerge ha'zirden ayttım.
30 Sizler menen endi ko'p so'ylespeymen. O'ytkeni bul du'nyanın' ha'kimi kiyatır. Onın' Menin' u'stimnen hesh qanday biyligi joq.
31 Biraq bul du'nya Menin' A'kemdi su'yetug'ınımdı ha'm Onın' Mag'an buyırg'anlarının' ha'mmesin orınlaytug'ınımdı biliwi tiyis. Qa'ne turın'lar, bul jerden keteyik.
