Yuxan 13 bob
1 Qutqarılıw bayramının' aldın'g'ı ku'ni İysa O'zinin' bul du'nyadan A'kesinin' janına baratug'ın waqtı kelgenin bildi. Ol bul du'nyadag'ı O'zine tiyisli adamlardı su'yetug'ın edi. Olardı aqırına deyin su'ydi.
2 İysa sha'kirtleri menen keshki awqatqa otırdı. Shaytan a'lle qashan Simon ulı Yahuda İsqariottın' kewline İysag'a satqınlıq qılıw niyetin salg'an edi.
3 İysa A'kesinin' ha'mme na'rseni Onın' qolına bergenin, O'zinin' Qudaydan kelgenin ha'm Qudayg'a qaytıp baratırg'anın bilip,
4 dasturxan basınan turdı. Sırtqı kiyimin sheshti de, bir su'lgini alıp beline bayladı.
5 İysa Simon Petrdin' qasına kelgende, Petr Og'an: – İyem, menin' ayaqlarımdı Sen juwajaqsan' ba? – dedi..
6 İysa Simon Petrdin' qasına kelgende, Petr Og'an: – İyem, menin' ayaqlarımdı Sen juwajaqsan' ba? – dedi.
7 İysa og'an juwap berip: – Menin' ne islep atırg'anımdı sen ha'zir tu'sinbeysen'. Biraq son'ınan tu'sinip alasan', – dedi.
8 – Menin' ayaqlarımdı Sen hesh qashan juwmaysan'! – dedi ol. – Eger Men senin' ayaqların'dı juwmasam, Menin' menen qatnasta bolmaysan', – dedi İysa.
9 Simon Petr İysag'a: – İyem, onda tek ayaqlarımdı emes, qollarımdı da, basımdı da juwa go'r! – dedi.
10 İysa og'an: – Shomılg'an adam pu'tkilley taza. Onın' tek ayaqların g'ana juwıw kerek. Sizler de tazasızlar, biraq ha'mmen'iz emes, – dedi.
11 İysa O'zine kimnin' satqınlıq qılatug'ının biletug'ın edi. Sonlıqtan: «Biraq ha'mmen'iz emes» degen edi.
12 Sha'kirtlerinin' ayaqların juwıp bolg'annan son', İysa kiyimlerin kiyip, jambaslap jattı da, olarg'a bılay dedi: – Menin' sizlerge ne islegenimdi tu'sinesizler me?
13 Sizler Meni Ustaz ha'm İyem dep ataysızlar. Durıs aytasızlar, sebebi Men Solman.
14 Men sizlerdin' İyen'iz ha'm Ustazın'ız bola tura, ayaqların'ızdı juwg'an bolsam, sizler de bir-birin'izdin' ayaqların'ızdı juwıwın'ız tiyis.
15 Men sizlerge ne islegen bolsam, sizler de sonı islewin'iz ushın, Men sizlerge o'rnek ko'rsettim.
16 Sizlerge shının, haqıyqatın aytaman: xızmetshi xojasınan ullı emes. Elshi de o'zin jibergennen ullı emes.
17 Eger sizler bulardı bilip orınlasan'ız, baxıtlı bolasızlar!
18 – Men ha'mmen'iz tuwralı aytıp atırg'an joqpan. Men O'zimnin' tan'lap alg'anlarımdı bilemen. Biraq Muxaddes Jazıwdag'ı: «Menin' nanımdı jegen Mag'an qarsı qol ko'terdi», – degen so'zler orınlanıwı kerek.
19 Bul ju'z bergende, Menin' Sol ekenime iseniwin'iz ushın, Men sizlerge ha'zir, bul bolmastan burın aytıp atırman.
20 Sizlerge shının, haqıyqatın aytaman: kim de kim Men jibergen adamdı qabıl alsa, Onın' Meni qabıl alg'anı boladı. Kim de kim Meni qabıl alsa, Onın' Meni Jibergendi qabıl alg'anı boladı.
21 İysa bulardı aytqannan son', ruwxıy qıynalıp, ashıq so'ylep bılay dedi: – Sizlerge shının, haqıyqatın aytaman: aran'ızdag'ı birin'iz Mag'an satqınlıq isleydi.
22 Sha'kirtleri Onın' kimdi na'zerde tutıp atırg'anın tu'sinbey, bir-birine qarastı.
23 Sha'kirtler arasında biri Onın' ko'kiregine su'yenip jatırg'an edi. İysa onı su'yetug'ın edi.
24 Simon Petr sol sha'kirtke: «Ol kim tuwralı aytıp atır, sora», – dep ımladı.
25 İysanın' ko'kiregine su'yenip jatırg'an sol sha'kirt Onnan: – İyem, ol kim? – dep soradı.
26 İysa juwap berip: – Men mına bir bo'lek nandı malıp, kimge bersem, ol – sol, – dedi de, bir bo'lek nandı malıp, Simon ulı Yahuda İsqariotqa berdi.
27 Yahuda nandı alıwdan-aq, onın' ishine shaytan kirdi. İysa og'an: – Qılajaq isin'di tezirek qıl, – dedi.
28 Dasturxan a'tirapında otırg'anlardın' hesh qaysısı İysanın' bul so'zlerdi Yahudag'a ne ushın aytqanın tu'sinbedi.
29 Aqsha qutısı Yahudada bolg'anlıqtan, İysa og'an: «Bayram ushın bizlerge kerekli zatlardı satıp al» yamasa «Jarlılarg'a bir na'rse ber», – dep atırg'an shıg'ar, dep oyladı geybirewleri.
30 Al Yahuda bir bo'lek nandı alıwdan-aq, sırtqa shıg'ıp ketti. Tu'n bolg'an edi.
31 Yahuda sırtqa shıg'ıp ketkennen son', İysa bılay dedi: – Ha'zir Adam Ulı ullılandı. Ol arqalı Quday da ullılandı.
32 Quday Ol arqalı ullılang'anlıqtan, Qudaydın' O'zi de Onı ullılaydı. Onı tez arada ullılaydı.
33 Balalarım! Endi Men sizler menen birge uzaq waqıt bolmayman. Meni izleysizler, biraq yahudiy basshılarına aytqanımday, sizlerge de aytatug'ınım: Men baratug'ın jerge sizler bara almaysızlar.
34 Sizlerge jan'a buyrıq berip atırman: bir-birin'izdi su'yin'ler! Menin' sizlerdi su'ygenim sıyaqlı, sizler de bir-birin'izdi su'yin'ler.
35 Eger birbirin'izdi su'ysen'ler, sizlerdin' Menin' sha'kirtlerim ekenin'izdi ha'mme usı arqalı bilip aladı.
36 Simon Petr İysag'a: – İyem, Sen qayaqqa baratırsan'? – dedi. İysa: – Men baratug'ın jerge sen ha'zir izimnen erip bara almaysan'. Biraq son'ınan izimnen kelesen', – dep juwap berdi.
37 Petr Og'an: – İyem, ne ushın Senin' izin'nen ha'zir bara almayman? Men Sen ushın janımdı beremen! – dedi.
38 İysa og'an bılay dep juwap berdi: – Men ushın janın'dı bermekshimisen'? Sag'an shının, haqıyqatın aytaman: qoraz shaqırmastan burın sen Mennen u'sh ret tanasan'.
