Luka 18 bob
1 İysa sha'kirtlerine ba'rqulla duwa etip, u'mit u'zbew kerekligin bildiriw ushın bir tımsal aytıp berdi.
2 Ol bılay dedi: – Bir qalada Qudaydan da qorqpaytug'ın, adamlardan da uyalmaytug'ın bir qazı bolıptı.
3 Sol qalada bir jesir hayal da turadı eken. Hayal og'an qayta-qayta kelip: «Menin' huqıqımdı dawlasımnan qorg'an'», – dep o'tine beredi eken.
4 Biraq qazı ko'p waqıtqa deyin bunı islegisi kelmepti. Son'ınan o'z o'zine: «Men Qudaydan da qorqpayman, adamlardan da uyalmayman.
5 Biraq, mına jesir hayal mag'an tınıshlıq bermey atırg'anı ushın onın' huqıqın qorg'ay qoyayın. Bolmasa, ol qaytaqayta kelip, menin' mazamdı alar», – depti.
6 İyemiz İysa so'zin dawam etip bılay dedi: – A'dilsiz qazının' so'zlerine qulaq salın'lar.
7 Quday O'zine ku'ni-tu'ni jalbarınıp atırg'an, O'zi tan'lap alg'an adamlardın' huqıqın qorg'amay ma? Olardı ko'p ku'ttirip qoya ma?
8 Sizlerge aytatug'ınım: ko'p keshikpey olardın' huqıqın qorg'aydı. Biraq Adam Ulı kelgende, jer ju'zinde isenim tabar ma eken?
9 O'zlerinin' haqlıg'ına isenip, basqalardı kemsitetug'ın ayırım adamlarg'a İysa mına tımsaldı da aytıp berdi:
10 – Eki adam duwa etiw ushın İbadatxanag'a kiripti. Olardın' birewi parisey, ekinshisi salıqshı eken.
11 Parisey turıp alıp mınaday dep duwa etipti: «O, Qudayım! Men basqa adamlarday tonawshı, nahaq, neke hadallıg'ın buzıwshı yamasa, ha'tte, mına salıqshı sıyaqlı bolmag'anım ushın, Sag'an shu'kirlik etemen.
12 Ha'ptesine eki ma'rte oraza tutaman. Barlıq tapqan tabısımnın' onnan birin beremen».
13 Al salıqshı alısta turıp, ko'zin aspang'a ko'teriwge de batılı barmay, qattı o'kinip: «O, Qudayım! Mendey gu'nakarg'a rehim et!» – depti.
14 Sizlerge aytatug'ınım: parisey emes, al usı adam aqlanıp u'yine qaytıptı. Sebebi o'zin joqarı tutqan ha'r bir adam pa'sletiledi, al o'zin pa's tutqan adam joqarı boladı.
15 Qolın tiygizsin dep, adamlar İysag'a bo'beklerin alıp keldi. Sha'kirtleri bunı ko'rip, olarg'a keyidi.
16 Biraq İysa olardı qasına shaqırıp alıp, sha'kirtlerine: – Balalardın' Mag'an keliwine ruxsat berin'ler, olarg'a tosqınlıq jasaman'lar. O'ytkeni Quday Patshalıg'ı usındaylardiki.
17 Sizlerge shının aytaman: kim de kim Quday Patshalıg'ın kishkene bala sıyaqlı qabıl etpese, ol og'an kire almaydı, – dedi.
18 Bir basshı İysadan: – İygilikli Ustaz! Ma'n'gilik o'mirdi alıwım ushın ne islewim kerek? – dep soradı.
19 İysa og'an: – Sen nege Meni iygilikli dep atap atırsan'? Jalg'ız Qudaydan basqa hesh kim iygilikli emes.
20 Onın' buyrıqların bilesen'-g'o: «Neke hadallıg'ın buzba, adam o'ltirme, urlıq isleme, jalg'an gu'walıq berme, ata-anan'dı hu'rmetle», – dedi.
21 Biraq ol: – Bulardın' ha'mmesin men bala waqtımnan beri orınlap kiyatırman, – dedi.
22 Bunı esitken İysa og'an: – Sag'an ja'ne bir na'rse jetispeydi. Barlıq mal-mu'lkin'di satıp, aqshasın jarlılarg'a u'lestirip ber. Sonda senin' g'a'ziynen' aspanda boladı. Son'ınan kelip, Menin' izime er, – dedi.
23 Basshı bunı esitip, qattı qapa boldı. Sebebi ol ju'da' bay edi.
24 İysa onın' qapa bolg'anın ko'rip: – Baylıg'ı barlardın' Quday Patshalıg'ına kiriwi qanday qıyın!
25 Bay adamnın' Quday Patshalıg'ına kiriwinen go're, tu'yege iynenin' ko'zinen o'tiw an'satıraq, – dedi.
26 Bunı esitkenler: – Olay bolsa, kim qutqarıla aladı? – dep soradı.
27 – Adamlardın' qolınan kelmegen na'rse Qudaydın' qolınan keledi, – dedi İysa.
28 Sonda Petr: – Minekey, bizler ha'mme na'rsemizdi taslap, Senin' izin'e erdik, – dedi.
29 İysa sha'kirtlerine: – Sizlerge shının aytaman: Quday Patshalıg'ı ushın ya u'yin, ya hayalın, ya tuwısqanların, ya ata-anasın, ya balaların qaldırıp ketken ha'r bir adam
30 bul du'nyada neshe ese artıg'ı menen aladı ha'm keleshekte ma'n'gilik o'mirge iye boladı, – dedi.
31 İysa on eki sha'kirtin qasına shaqırıp alıp, olarg'a bılay dedi: – Minekey, bizler endi Erusalimge qaray ko'terilip baratırmız. Sol jerde payg'ambarlardın' Adam Ulı tuwralı jazg'anlarının' ha'mmesi orınlanadı.
32 Ol basqa millet adamlarına uslap beriledi. Olar Onın' u'stinen ku'ledi, masqaralaydı, betine tu'kiredi
33 ha'm qamshılap sabap, o'ltiredi. Al Ol u'shinshi ku'ni qayta tiriledi.
34 Biraq sha'kirtleri bul so'zlerden hesh na'rse tu'sinbedi. Bul so'zler olarg'a jasırın bolıp, aytılg'anlardın' ma'nisin an'lamadı.
35 İysa Erixo qalasına jaqınlag'anda, joldın' shetinde tilenshilik etip, bir soqır adam otır edi.
36 Qasınan adamlardın' o'tip baratırg'anın esitken ol: – Ne bolıp atır? – dep soradı.
37 – Nasıralı İysa o'tip baratır, – desti adamlar og'an.
38 Sonda ol: – Dawıttın' Urpag'ı İysa! Mag'an rehim ete go'r! – dep baqırıp jiberdi.
39 Aldında ketip baratırg'anlar u'nin shıg'armawdı aytıp, og'an keyidi. Biraq ol onnan da beter qattı baqırıp: – Dawıttın' Urpag'ı! Mag'an rehim ete go'r! – dedi.
40 Sonda İysa toqtap, soqır adamdı qasına alıp keliwdi buyırdı. Soqır adam jaqınlag'anda, İysa onnan:
41 – Sen ushın ne islewimdi qa'leysen'? – dep soradı. – İyem, ko'zlerim ko'retug'ın bolsın, – dedi ol.
42 İysa og'an: – Ko'zlerin' ko'retug'ın bolsın, isenimin' seni qutqardı, – dedi.
43 Sol waqıtta-aq soqır adamnın' ko'zleri ko're basladı ha'm Qudaydı alg'ıslap, İysanın' izine erdi. Bunı ko'rgen pu'tkil xalıq ta Qudaydı maqtadı.
