Luka 16 bob
1 İysa O'z sha'kirtlerine ja'ne bılay dedi: – Bir bay adamnın' u'y basqarıwshısı bar eken. Baydın' qulag'ına: «U'yin'di basqarıwshı mal-mu'lkin'di sarp etip ju'ripti», – degen shag'ım jetipti.
2 Bay onı shaqırıp alıp: – Sen tuwralı esitip atırg'anım ne ga'p? O'z jumısın' boyınsha esap ber. Sen bunnan bılay u'y basqarıwshı bola almaysan', – depti.
3 Sonda u'y basqarıwshı o'z-o'zine: – Ne qılsam eken? Xojayınım meni jumıstan bosatıp atır. Jer qazıwg'a ku'shim jetpeydi, sadaqa sorawg'a uyalaman.
4 Basqarıwshılıqtan bosatılg'anımnan son', adamlar meni u'ylerine qabıl qılıwı ushın ne islesem eken? He, taptım, – depti de,
5 xojayınına qarızdar adamlardı birim-birim shaqırıp alıp, olardın' birinshisinen: – Xojayınımnan qansha qarızın' bar? – dep soraptı.
6 Ol: – Ju'z batpan may, – dep juwap beripti. – Til xatın'dı al da, tez otırıp, eliw batpan dep jaz, – depti basqarıwshı.
7 Son'ınan basqasınan: – Senin' qansha qarızın' bar? – dep soraptı. – Mın' qap biyday, – dep juwap beripti ol. Og'an da: – Til xatın'dı al da, segiz ju'z qap dep jaz, – depti.
8 Xojayını nahaq u'y basqarıwshını aqıllı is qılg'anı ushın maqtaptı. Sebebi bul du'nyanın' adamları o'zi sıyaqlılar arasında Nurdın' balalarınan go're aqıllıraq ha'reket qıladı.
9 Menin' sizlerge aytatug'ınım: bul du'nyanın' baylıg'ınan paydalanıp dos arttırın'lar, bul baylıq tawsılg'anda, olar sizlerdi ma'n'gilik ma'kang'a qabıl qılsın.
10 Kishkene iste isenimli bolg'an adam u'lken iste de isenimli boladı, al kishkene iste sadıq bolmag'an adam u'lken iste de sadıq bolmaydı.
11 Solay etip, eger sizler bul du'nyanın' baylıg'ına sadıq bolmasan'ız, kim sizlerge aspandag'ı haqıyqıy baylıqtı isenip tapsıradı?
12 Eger sizler basqag'a tiyisli na'rsege sadıq bolmasan'ız, kim sizlerge o'zlerin'izdikin beredi?
13 Hesh bir xızmetshi eki xojag'a xızmet ete almaydı. O'ytkeni ol birewin jek ko'rip, ekinshisin jaqsı ko'redi yamasa birewine sadıq bolıp, ekinshisine itibarsız qaraydı. Sizler ha'm Qudayg'a, ha'm baylıqqa birdey xızmet ete almaysızlar.
14 Bulardın' ha'mmesin du'nyaxor pariseyler esitip, İysanı mazaq qıldı.
15 İysa olarg'a bılay dedi: – Sizler o'zlerin'izdi adamlar aldında haq qılıp ko'rsetesizler, biraq Quday kewillerin'izdi biledi. Adamlar qımbat dep sanag'an na'rse Quday aldında jerkenishli.
16 Yaqıyag'a deyin Muxaddes Nızam ha'm payg'ambarlar da'wiri boldı. Sol waqıttan baslap, Quday Patshalıg'ı haqqında Xosh Xabar ja'riyalanıp kiyatır ha'm ha'r bir adam og'an kiriwge ku'sh salıp ju'r.
17 Biraq Muxaddes Nızamnan bir noqat jog'alg'anınan go're, aspan ha'm jerdin' joq bolıp ketiwi an'satıraq.
18 O'z hayalı menen ajırasıp, basqa hayalg'a u'ylengen ha'r bir adam neke hadallıg'ın buzg'an boladı. Ku'yewinen ajırasqan hayalg'a u'ylengen adam da neke hadallıg'ın buzg'an boladı.
19 – Qımbat bahalı sa'nli kiyimler kiyip, ha'r ku'ni u'lken zıyapatlar beretug'ın bir bay adam bolıptı.
20 Baydın' da'rwazası aldında pu'tkil denesin jara basqan Lazar atlı bir tilenshi jatadı eken.
21 Ol baydın' dasturxanınan tu'sken usaqlar menen qarnın toydırıwdı a'rman etipti. İytler de kelip, onın' jaraların jalap ketedi eken.
22 Waqtı kelgende tilenshi qaytıs bolıp, perishteler onı İbrayımnın' janına alıp barıptı. Bay adam da qaytıs bolıp, onı jerlepti.
23 Bay dozaq otında azap shegip atırıp, basın ko'terip qarag'anda, alısta İbrayımdı ha'm onın' qasındag'ı Lazardı ko'ripti.
24 Ol qattı baqırıp: «İbrayım ata, mag'an rehim ete go'r! Lazardı jiber, ol barmag'ının' ushın suwg'a basıp, menin' tilime suw tamızsın. Sebebi men bul ot ishinde qattı qıynalıp atırman», – depti.
25 Biraq İbrayım og'an: «Balam, sen o'mirin'de tek jaqsılıq ko'rgenin'di, al Lazardın' jamanlıq ko'rgenin umıtpa. Endi bolsa, ol bul jerde jubanısh tawıp, al sen qıynalıp atırsan'.
26 Bunın' u'stine, sizler menen bizlerdin' aramızg'a u'lken tun'g'ıyıq ornatılg'an. Sonlıqtan bul jerden sizlerge o'tpekshi bolg'anlar o'te almaydı ha'm ol jerden de bizlerge hesh kim o'te almaydı», – depti.
27 Sonda bay adam: «Ata, olay bolsa, sennen o'tinemen, Lazardı menin' a'kemnin' u'yine jiber.
28 O'ytkeni menin' bes ag'a-inim bar. Olar da bul azap shegetug'ın jerge tu'spewi ushın ol barıp, olardı eskertsin», – depti.
29 Biraq İbrayım og'an: «Olarda Muwsa ha'm basqa payg'ambarlardın' Jazıwları bar-g'o. Olardı tın'lasın», – depti.
30 Al bay adam: «Yaq, İbrayım ata! Biraq eger o'lgenlerdin' birewi tirilip olarg'a barsa, ta'wbe etedi», – depti.
31 Sonda İbrayım og'an: «Eger Muwsa menen payg'ambarlardı tın'lamag'anda, o'lgenlerdin' birewi tirilse de, isenbeydi», – dep juwap beripti.
