Luka 1 bob
1 Aramızda bolıp o'tken belgili waqıyalardı ko'plerdin' a'lle qashan bayan etpekshi bolg'anı bizlerge ma'lim.
2 Olar bul waqıyalarg'a bastanaq gu'wa bolg'anlardın' ha'm Xosh Xabardı ja'riyalawshılardın' bizlerge jetkizgen na'rselerin jazg'an edi.
3 Solay etip, hu'rmetli Teofil, o'zin'izge u'yretilgen bul ta'liymattın' haqıyqıy ekenin siz de biliwin'iz ushın, men de bastan-ayaq ha'mmesin muqıyatlap u'yrenip shıg'ıp,
4 barlıq waqıyalardı izbe-izlik penen sizge jazıwdı maqul taptım.
5 Yahudiya elinde, patsha Hirod zamanında, Abiya toparınan Zekeriya atlı bir ruwxaniy bar edi. Onın' hayalı Xaron a'wladınan shıqqan bolıp, atı Elizabeta edi.
6 Olardın' ekewi de Quday aldında haq adamlar bolıp, Jaratqan İyemizdin' barlıq buyrıq ha'm qag'ıydaların buljıtpay orınlap jasaytug'ın edi.
7 Elizabeta na'silsiz bolg'anlıqtan, olar biyperzent edi. Ja'ne ekewi de qartayg'an edi.
8 Ku'nlerdin' birinde o'z toparının' gezegi kelip, Zekeriya Quday aldında ruwxaniylik xızmetin atqarıp turg'anda,
9 ruwxaniylerdin' a'deti boyınsha xosh iyisli zatlardı tu'tetiw ushın, Jaratqan İyemizdin' İbadatxanasındag'ı Muxaddesxanag'a kiriw shegi og'an tu'sti.
10 Xosh iyisli zatlardı tu'tetiw waqtında jıynalg'an xalıqtın' ha'mmesi sırtta duwa etip tur edi.
11 Sonda Jaratqan İyemizdin' bir perishtesi xosh iyisli zatlar tu'tetiletug'ın orınnın' on' ta'repinde payda bolıp, Zekeriyag'a ko'rindi.
12 Onı ko'rgen Zekeriya qorqıp, albırap qaldı.
13 Biraq perishte og'an bılay dedi: – Qorqpa, Zekeriya! Senin' etken duwan' qabıl boldı. Hayalın' Elizabeta sag'an ul tuwıp beredi, onın' atın Yaqıya dep qoyasan'.
14 Ol sag'an quwanısh ha'm shadlıq alıp keledi. Onın' du'nyag'a kelgenine ko'p adamlar quwanadı.
15 Sebebi ol Quday na'zerinde ullı adam bolıp, hesh araq-sharap ishpeydi. Anasının' qursag'ında jatırg'annan baslap, Muxaddes Ruwxqa toladı.
16 Ol İzrail perzentlerinin' ko'bisin olardın' Jaratqan İyesi – Qudayg'a qaytaradı.
17 A'kelerdi balaları menen jarastırıp, boysınbaytug'ınlardı haq adamlardın' danalıq jolına tu'sirip, xalıqtı İyemizdin' keliwine tayarlaw ushın, ol İliyastın' ruwxı ha'm qu'direti menen İyemizdin' aldında ju'rip keledi.
18 Sonda Zekeriya perishtege: – Bulardın' ras ekenin men qayaqtan bilemen? O'ytkeni men g'arrıman, hayalım da qartayg'an-g'o, – dedi.
19 Perishte og'an juwap berip: – Men Quday aldında turıwshı Jabrayılman. Senin' menen so'ylesip, sag'an usı xosh xabardı jetkiziw ushın jiberilgenmen.
20 Biraq, waqtı kelgende orınlanatug'ın so'zlerime isenbegenin' ushın, usılar a'melge aspag'ansha so'yley almay, gu'n' bolıp qalasan', – dedi.
21 Biraq, waqtı kelgende orınlanatug'ın so'zlerime isenbegenin' ushın, usılar a'melge aspag'ansha so'yley almay, gu'n' bolıp qalasan', – dedi.
22 Zekeriya sırtqa shıqqanda, xalıqqa so'yley almay qaldı. Sonda xalıq onın' Muxaddesxanada ayan ko'rgenin tu'sindi. Zekeriya gu'n' bolıp qalıp, xalıq penen ımlasıp so'ylesti.
23 O'zinin' xızmet etetug'ın ku'nleri tamam bolg'annan keyin, Zekeriya u'yine qayttı.
24 Aradan ku'nler o'tkennen son', onın' hayalı Elizabeta ha'mledar bolıp, bes ay jasırınıp ju'rdi.
25 «Jaratqan İyem mag'an na'zer awdarg'an ku'nlerde bul isti islep, adamlar aldındag'ı masqarashılıqtı mennen alıp tasladı», – dedi ol.
26 Elizabetanın' ha'mledar bolg'anına altı ay tolg'anda, Quday Jabrayıl perishteni Galila u'lkesinin' Nasıra dep atalatug'ın qalasına,
27 Dawıt a'wladınan shıqqan Yusup degen jigitke atastırılg'an bir qızg'a jiberdi. Qızdın' atı Ma'riyam edi.
28 Perishte u'yge kirip, og'an: – Sa'lem sag'an, Quday jarılqag'an! Jaratqan İyemiz senin' menen birge, – dedi.
29 Ma'riyam perishtenin' so'zlerine an'-tan' boldı ha'm bul qanday sa'lemlesiw boldı eken dep, oylanıp qaldı.
30 Perishte og'an bılay dedi: – Qorqpa, Ma'riyam, sen Qudaydın' miyrimine eristin'!
31 Mine, sen ha'mledar bolıp, Ul tuwasan' ha'm Onın' atın İysa dep qoyasan'.
32 Ol ullı bolıp, Qu'diretli Qudaydın' Ulı dep ataladı. Jaratqan İyemiz – Quday Og'an babası Dawıttın' taxtın beredi.
33 Ol Yaqıp xalqının' u'stinen ma'n'gige patshalıq etedi ha'm Onın' patshalıg'ının' shegi bolmaydı.
34 Ma'riyam perishteden: – Men er adamg'a jaqınlamag'an bolsam, bul qalay boladı? – dep soradı.
35 Perishte og'an juwap berip: – Senin' u'stin'e Muxaddes Ruwx tu'sedi ha'm Qu'diretli Qudaydın' ku'shi sag'an sayasın saladı. Sonlıqtan da, sennen tuwılajaq Muxaddes Bala – Qudaydın' Ulı dep ataladı.
36 Mine, na'silsiz dep sanalg'an senin' ag'ayin apan' Elizabeta da qartayg'anda ul balag'a ha'mledar boldı. Onın' ha'mledar bolg'anına altı ay toldı.
37 Sebebi Qudaydın' qolınan kelmeytug'ın na'rse joq, – dedi.
38 Sonda Ma'riyam: – Men – Jaratqan İyemnin' bendesimen, aytqanın'day bolsın, – dedi. Sonnan son', perishte onın' janınan ketti.
39 Sol ku'nlerde Ma'riyam jolg'a shıg'ıp, tezlik penen tawlı Yahudiya elindegi bir qalag'a ketti.
40 Ol Zekeriyanın' u'yine kirip, Elizabetag'a sa'lem berdi.
41 Elizabeta Ma'riyamnın' sa'lemin esitkende, onın' ishindegi na'reste tıpırlap ketti. Elizabeta Muxaddes Ruwxqa tolıp,
42 dawıslap bılay dedi: – Hayallar arasında sen jarılqang'ansan', senin' ishin'degi Na'reste de jarılqang'an!
43 İyemnin' anası keletug'ınday, men kimmen?
44 Mine, senin' sa'lem bergen dawısın' qulag'ıma jetkende, ishimdegi na'reste quwanıshtan tıpırlap qoya berdi.
45 İsengen hayal qanday baxıtlı! O'ytkeni Jaratqan İyemnin' og'an aytqanları orınlanadı.
46 Sonda Ma'riyam bılay dedi: «Janım Jaratqan İyemdi alg'ıslar.
47 Qutqarıwshım Qudayg'a ruwxım shadlanar.
48 Sebebi Ol O'zinin' arzımas bendesine na'zerin awdardı. Endi meni barlıq a'wladlar „baxıtlı“ dep ataydı.
49 O'ytkeni Qu'diretli Quday mag'an ullı isler isledi. Onın' atı muxaddes.
50 Ol a'wladtan-a'wladqa, O'zinen qorqqanlarg'a miyrim-sha'pa'a'tin beredi.
51 O'z qolı menen qu'diretin ko'rsetip, Kewillerinde menmen oyları bar adamlardı pıtırattı.
52 Hu'kimdarlardı taxttan tu'sirip, G'a'rip-qa'serlerdi joqarı ko'terdi.
53 Ash bolg'anlardı iygilik berip toydırıp, Bay bolg'anlardı qurı qol qaytardı.
54 Ata-babamızg'a bergen wa'desi boyınsha, İbrayımg'a ha'm onın' urpag'ına miyrim-sha'pa'a't etiwdi ma'n'gi este tutıp,
55 Xızmetshisi İzrailg'a ja'rdem etti».
56 Ma'riyam Elizabeta menen u'sh ayday birge bolıp, son'ınan u'yine qaytıp ketti.
57 Elizabetanın' bosanatug'ın waqtı kelip, ol ul tuwdı.
58 Qon'sıları menen ag'ayinleri Jaratqan İyemizdin' og'an u'lken miyrim-sha'pa'a't ko'rsetkenin esitip, onın' quwanıshın bo'listi.
59 Olar segizinshi ku'ni balanı su'nnetlewge* alıp bardı ha'm og'an Zekeriya dep, a'kesinin' atın qoymaqshı boldı.
60 Biraq balanın' anası: – Yaq, onın' atı Yaqıya bolsın, – dedi.
61 Olar Elizabetag'a: – Ag'ayin-tuwg'anların'nın' arasında bunday at hesh kimde joq-g'o, – dep,
62 a'kesinen balag'a qanday at qoymaqshı ekenin ımlap soradı.
63 Zekeriya jazıw taxtayshasın talap qıldı da: «Onın' atı Yaqıya bolsın», – dep jazdı. Bug'an ha'mme an'-tan' bolıstı.
64 Sol waqıtta-aq Zekeriya tilge kirip, Qudaydı alg'ıslap so'yley basladı.
65 A'tirapında jasawshılardı qorqınısh biyledi ha'm pu'tkil tawlı Yahudiya eli boylap usılar haqqında so'z tarqadı.
66 Esitkenlerdin' ha'mmesi bunı kewillerinde saqlap: «Bul na'reste kim bolar eken?» – deytug'ın edi. Sebebi Jaratqan İyemizdin' qu'direti onın' menen birge edi.
67 Na'restenin' a'kesi Zekeriya Muxaddes Ruwxqa tolıp, payg'ambarshılıq etip bılay dedi:
68 «İzraildın' Jaratqan İyesi – Quday alg'ıslansın! O'ytkeni Ol kelip, O'z xalqı ushın to'lem to'lep, onı qutqardı.
69 O'zinin' muxaddes payg'ambarları arqalı a'yyemnen aytqanınday,
70 Ol bizler ushın O'z xızmetshisi Dawıttın' urpag'ınan shıqqan qu'diretli Qutqarıwshını berdi.
71 Quday bizlerdi dushpanlarımızdan ha'm bizlerdi jek ko'riwshilerdin' qolınan qutqardı.
72 Bizlerdin' ata-babalarımızg'a wa'de etken miyrimliligin ko'rsetip, O'z muxaddes kelisimin,
73 babamız İbrayımg'a bergen antın eske aldı.
74 Ol bizlerdi dushpanlarımızdın' qolınan qutqarıp, qorqpastan, o'mir boyı Onın' aldında muxaddes ha'm haq bolıp,
75 Og'an xızmet qılıwımızg'a mu'mkinshilik berdi.
76 Al sen, balam, Qu'diretli Qudaydın' payg'ambarı dep atalasan'. Sebebi sen İyemizdin' aldınan ju'rip, Onın' jolın tayarlaysan'.
77 Onın' xalqına gu'nalarının' keshirilip, qutqarılatug'ının ja'riyalaysan'.
78 Qaran'g'ıda ha'm o'lim sayasında jasap atırg'anlarg'a nur tu'siriw ushın ha'm bizlerge tınıshlıqqa qaray jol ko'rsetiw ushın,
79 Qudaydın' ullı miyrim-sha'pa'a'ti aspannan tan' bolıp atadı»
80 Al na'reste o'sip, ruwxıy ku'shke tolıp bardı ha'm İzrail xalqının' aldında ko'rinetug'ın ku'nge deyin sho'l dalada jasadı.
