Mark 9 bob
1 İysa olarg'a ja'ne: – Sizlerge shının aytıp turman: bul jerde turg'anlardın' geybirewleri Quday Patshalıg'ının' O'z qu'direti menen kelgenin ko'rmegenshe, o'lmeydi, – dedi.
2 Aradan altı ku'n o'tkennen son', İysa tek Petr, Yaqıp ha'm Yuxandı alıp, ba'lent bir tawg'a shıqtı. Sonda olardın' aldında İysanın' tu'r-tu'si o'zgerdi.
3 Onın' kiyimi jarqırap ketip, qarday appaq tu'ske endi. Jer ju'zinde hesh bir kir juwıwshı bunday qılıp ag'arta almas edi.
4 Sonda olarg'a İliyas ha'm Muwsa payg'ambarlar ko'rinip, İysa menen so'ylesip turdı.
5 Petr İysag'a: – Ustaz, bizlerdin' bul jerde bolg'anımız qanday jaqsı! Bizler u'sh qos qurayıq: birewin Sag'an, birewin Muwsag'a, birewin İliyasqa, – dedi.
6 Petr bul so'zlerdi ne aytarın bilmegenlikten ayttı, o'ytkeni sha'kirtler qattı qorqısıp qalg'an edi.
7 Sol waqıtta bir bult payda bolıp, olardı qapladı. Bulttan: – Bul – Menin' su'yikli Ulım! Onın' aytqanın tın'lan'lar! – degen saza esitildi.
8 Sha'kirtleri birden ja'n-jag'ına qarag'anda, o'zlerinin' qasında İysadan basqa hesh kimdi ko'rmedi.
9 Tawdan to'men tu'sip baratırg'anda, İysa olarg'a: – Adam Ulı o'limnen qayta tirilgenshe, bul ko'rgenlerin'izdi hesh kimge aytpan'lar, – dep buyırdı.
10 Olar bul waqıyanı sır saqlap, «o'limnen qayta tiriliw» degennin' ne ekenligi haqqında bir-birinen soraytug'ın edi.
11 Sha'kirtleri İysadan: – Nege diniy mug'allimler aldı menen İliyas keliwi sha'rt deydi? – dep soradı.
12 İysa olarg'a juwap berip: – Durıs, aldı menen İliyas kelip, ha'mmesin du'zetedi. Biraq nege Adam Ulı ko'p azap shegip, qabıllanbawı sha'rt, dep jazılg'an?
13 Sizlerge aytatug'ınım: İliyas kelgen edi. Biraq ol haqqında jazılg'anday, adamlar og'an qa'legenin islep, jaman qatnasta boldı, – dedi.
14 Olar basqa sha'kirtlerine qaytıp kelgende, sha'kirtlerdi qorshag'an ko'p xalıqtı ha'm olar menen tartısıp turg'an diniy mug'allimlerdi ko'rdi.
15 Pu'tkil xalıq İysanı ko'riwden tan' qalıstı ha'm juwırısıp kelip, Og'an sa'lem berdi.
16 İysa olardan: – Olar menen ne haqqında tartısıp tursızlar? – dep soradı.
17 Xalıq arasınan bir adam Og'an juwap berip: – Ustaz! Men Sag'an tilsiz ruwx urg'anlıqtan gu'n'elek bolıp qalg'an balamdı alıp keldim.
18 Balamdı ruwx tutqanda, jerge jıg'adı. Onın' awzında ko'bik payda boladı ha'm ol tislerin qayrap, qatıp qaladı. Men Senin' sha'kirtlerin'nen ruwxtı quwıp shıg'arıwın o'tingen edim, biraq olardın' qollarınan kelmedi, – dedi.
19 Sonda İysa olarg'a: – Ha'y, isenbeytug'ın a'wlad! Men qashang'a deyin sizler menen birge bolaman? Qashang'a deyin sizlerge shıdayman? Balanı Mag'an alıp kelin'ler, – dedi.
20 Olar balanı İysag'a alıp keldi. İysanı ko'riwden, ruwx balanı da'rriw qaltırattı. Bala jerge jıg'ıldı da, awzınan ko'bik shıg'ıp, awnap jattı.
21 Sonda İysa balanın' a'kesinen: – Bunday bolg'anına qansha waqıt boldı? – dep soradı. A'kesi: – Kishkene bala waqtınan usınday.
22 Ruwx onı o'ltirmekshi bolıp, neshe ma'rte otqa da, suwg'a da tasladı. Eger qolın'nan kelse, bizlerdi ayap, ja'rdem ete go'r, – dedi.
23 İysa og'an: – Eger qolın'nan kelse, deysen' be? İsenetug'ın adamg'a ha'mme na'rse mu'mkin, – dedi.
24 Balanın' a'kesi da'rhal jılap jiberip: – Men isenemen: az isenimimnin' bekkem bolıwına ja'rdem et! – dep baqırdı.
25 Xalıqtın' juwırıp kiyatırg'anın ko'rgende İysa jawız ruwxqa keyip: – Ha'y, tilsiz ha'm geren' ruwx! Buyıraman: onnan shıg'ıp ket ha'm qaytıp og'an kiriwshi bolma, – dedi.
26 Sonda ruwx shın'g'ırıp, balanı qattı qaltırattı da, onnan shıg'ıp ketti. Bala o'lidey bolıp jatırg'anlıqtan, adamlardın' ko'bisi: – Ol o'lip qaldı, – desti.
27 Biraq İysa onı qolınan uslap turg'ızg'anda, ol ornınan turdı.
28 İysa u'yge kirgennen keyin, sha'kirtleri awlaqta Onnan: – Bizler nege jawız ruwxtı quwıp shıg'ara almadıq? – dep soradı.
29 İysa olarg'a juwap berip: – Jinlerdin' bunday tu'rin tek duwa etiw arqalı quwıp shıg'arıwg'a boladı, – dedi.
30 Sol jerden shıg'ıp, olar Galila arqalı o'tti. İysa bunı hesh kimnin' bilmewin qa'ledi.
31 Sebebi Ol sha'kirtlerine ta'lim berip: – Adam Ulı adamlardın' qolına uslap beriledi, olar Onı o'ltiredi ha'm o'ltirilgennen keyin, Ol u'shinshi ku'ni qayta tiriledi, – dedi.
32 Biraq sha'kirtleri bul so'zlerdin' ma'nisin tu'sinbedi, al sorayın dese qorqtı.
33 Olar Kaparnahumg'a keldi. İysa u'yde bolg'anda, sha'kirtlerinen: – Jol boyı ne haqqında tartıstın'lar? – dep soradı.
34 Biraq olar u'ndemedi. O'ytkeni olar jol boyı arasında kimnin' en' ullı ekenligi haqqında tartısqan edi.
35 İysa otırıp, on eki sha'kirtin shaqırıp aldı da, olarg'a: – Eger kim de kim birinshi bolg'ısı kelse, sol en' son'g'ı bolıp, ha'mmege xızmet etiwi sha'rt, – dedi.
36 Son' kishkene bir balanı alıp, olardın' ortasına turg'ızdı da, onı qushaqlap:
37 – Kim de kim mınaday kishkene bir balanı Menin' atım ushın qabıl etse, onın' Meni qabıl etkeni boladı. Al kim de kim Meni qabıl etse, onın' tek Meni emes, al Meni Jibergendi qabıl etkeni boladı, – dedi.
38 Yuxan İysag'a: – Ustaz! Senin' atın' menen jinlerdi quwıp shıg'arıp ju'rgen bir adamdı ko'rdik. Biraq ol bizlerge erip ju'rmegenlikten, og'an tıyım saldıq, – dedi.
39 Al İysa bılay dedi: – Og'an tıyım salman'lar, sebebi Menin' atım menen ka'ramat ko'rsetkennin' hesh qaysısı da Men tuwralı jaqın arada jaman so'z ayta almaydı.
40 O'ytkeni kim de kim bizlerge qarsı bolmasa, ol bizlerdin' ta'repdarımız.
41 Sizlerge shının aytıp turman: kim de kim Masixqa tiyisli bolg'anın'ız sebepli, Menin' atım ushın sizlerge bir kese suw ishkizse, ol sıysız qalmaydı.
42 – Ja'ne de, kim de kim Mag'an isenetug'ın mına kishkenelerdin' birewin azg'ırsa, onın' moynına u'lken digirman tası baylanıp ten'izge taslang'anı og'an jaqsıraq boladı.
43 Eger seni qolın' azg'ırsa, onı shawıp tasla.
44 Eki qolın' menen dozaqqa, so'nbes otqa barg'anın'nan go're, sholaq bolıp ma'n'gilik o'mirge eriskenin' jaqsıraq.
45 Eger seni ayag'ın' azg'ırsa, onı shawıp tasla.
46 Eki ayag'ın' menen dozaqqa taslang'anın'nan go're, sholaq bolıp ma'n'gilik o'mirge eriskenin' jaqsıraq.
47 Eger seni ko'zin' azg'ırsa, onı oyıp tasla. Eki ko'zin' menen dozaqqa taslang'anın'nan go're, jalg'ız ko'zin' menen Qudaydın' Patshalıg'ına kirgenin' jaqsıraq.
48 «Dozaqta olardın' qurtı da o'lmeydi, otı da o'shpeydi».
49 Sebebi ha'r bir adam ot penen duzlanadı.
50 Duz – jaqsı na'rse. Biraq duz o'z ku'shin joytsa, onı qalay ja'ne shorlı qılıwg'a boladı? O'zlerin'izde duz bolıp, bir-birin'iz benen tatıwlıqta jasan'lar, – dedi.
