Mark 8 bob
1 Sol ku'nleri ko'p xalıq jıynaldı. Olardın' jeytug'ın hesh na'rsesi bolmag'anlıqtan, İysa sha'kirtlerin qasına shaqırıp alıp:
2 – Xalıqqa janım ashıp tur. Olar u'sh ku'nnen beri Menin' qasımda bolıp, jeytug'ın hesh na'rsesi joq.
3 Eger olardı ash halında u'ylerine jibersem, jolda ha'lsirep qaladı. Ja'ne de, olardın' geybirewleri uzaqtan kelgen-g'o, – dedi.
4 Sha'kirtleri Og'an juwap berip: – Kim usınday bir elsiz jerde sonshelli adamdı toydırıw ushın nan taba aladı? – dedi.
5 İysa olardan: – Neshe nanın'ız bar? – dep soradı. Olar: – Jetew, – dep juwap berdi.
6 Sonda İysa xalıqqa jerge otırıwdı buyırdı. Jeti nandı alıp, Qudayg'a shu'kirlik etti ha'm tarqatıw ushın, sha'kirtlerine sındırıp berdi. Sha'kirtleri xalıqqa tarqattı.
7 Olarda ja'ne bir neshe kishi balıq ta bar edi. İysa Qudayg'a shu'kirlik etip, olardı da tarqatıwdı buyırdı.
8 Xalıq jep toydı ha'm awısıp qalg'an bo'leklerdi jıynap, jeti sebet toltırdı.
9 Ol jerde to'rt mın'g'a shamalas adam bar edi. İysa adamlardı tarqatıp jiberdi.
10 ha'm sha'kirtleri menen da'rriw qayıqqa minip, Dalmanuta u'lkesine ketti.
11 Pariseyler İysag'a kelip, Onın' menen tartısa basladı ha'm Onı sınap ko'riw ushın, aspannan ka'ramatlı belgi ko'rsetiwin talap etti.
12 İysa awır gu'rsinip: – Nege bul a'wlad ka'ramatlı belgi talap etip atır? Shının aytıp turman: bul a'wladqa hesh qanday ka'ramatlı belgi ko'rsetilmeydi, – dedi.
13 Son'ınan olardı qaldırıp, ja'ne qayıqqa mindi de, arg'ı jag'ag'a ketti.
14 Sha'kirtleri o'zleri menen birge nan alıwdı umıtıp ketip, qayıqta tek g'ana bir nan bar edi.
15 İysa olardı eskertip: – Abaylan'lar, pariseylerdin' ha'm Hirodtın' ashıtqısınan saq bolın'lar! – dedi.
16 Olar: – Nanımız joq bolg'anlıqtan usılay dedi, – dep, o'z ara so'ylese basladı.
17 İysa bunı bilip, olardan: – Nege sizler nanın'ızdın' joqlıg'ın aytısıp tursızlar? Elege deyin ko'rmey ha'm tu'sinbey tursızlar ma? Elege deyin kewillerin'iz soqır ma+?
18 Nege ko'zlerin'iz bola tura ko'rmeysizler, qulaqların'ız bola tura esitpeysizler? Eslerin'izde joq pa?
19 Men bes nandı bes mın' adamg'a sındırıp bergenimde, awısqan bo'leklerdi jıynap neshe sebet toltırdın'lar? – dep soradı. – On eki, – dep juwap berdi olar.
20 İysa ja'ne: – Men jeti nandı sındırıp, to'rt mın' adamg'a bo'listirgenimde, awısqan bo'leklerdi jıynap neshe sebet toltırdın'lar? – dep soradı. – Jeti, – dep juwap berdi olar.
21 İysa olarg'a: – Sonda ele de tu'sinbedin'ler me? – dedi.
22 İysa sha'kirtleri menen Betsaydag'a kelgende, adamlar İysag'a bir soqır adamdı a'kelip, og'an qolın tiygiziwin o'tindi.
23 İysa soqır adamnın' qolınan uslap, onı awıldın' sırtına alıp shıqtı. Onın' ko'zlerine tu'kirip, onın' u'stine qolların qoydı da: – Bir na'rse ko'rip tursan' ba? – dep soradı.
24 Ol qarap: – Adamlardı ko'rip turman. Olar ju'rip baratırg'an tereklerge uqsaydı, – dedi.
25 Sonda İysa onın' ko'zlerine ja'ne qolların qoyg'anda, ol tigilip qaradı da, shıpa tawıp, ha'mmesin anıq ko're basladı.
26 İysa onı u'yine jiberip, og'an: – Awılg'a barma! – dedi.
27 İysa O'z sha'kirtleri menen Filip Kesariyasındag'ı awıllarg'a ketti. Jol boyı sha'kirtlerinen: – Meni adamlar kim dep sanaydı? – dep soradı.
28 Olar juwap berip: – Birewler Shomıldırıwshı Yaqıya, ekinshiler İliyas, tag'ı basqalar payg'ambarlardın' biri desedi, – dedi.
29 İysa olardan: – Al sizler Meni kim dep sanaysızlar? – dep soradı. Petr juwap berip: – Sen – Masixsan', – dedi.
30 Sonda İysa olarg'a O'zi haqqında hesh kimge aytpawdı eskertti.
31 İysa Adam Ulının' ko'p azap shegip, aqsaqallar, bas ruwxaniyler ha'm diniy mug'allimler ta'repinen qabıl alınbay o'ltiriletug'ının ha'm u'shinshi ku'ni qayta tiriliwi tiyis ekenligin olarg'a u'yrete basladı.
32 Ol bul haqqında ashıq-aydın ayttı. Biraq Petr Onı shetke shaqırıp alıp, qarsı so'yley basladı.
33 İysa burılıp, O'zinin' basqa sha'kirtlerine qaradı da, Petrge qatan' juwap berip: – Joq bol ko'zimnen, shaytan! Sen Qudaydın' emes, al adamnın' islerin oylap tursan', – dedi.
34 Son'ınan İysa sha'kirtleri menen xalıqtı O'zine shaqırıp alıp: – Kim de kim Mag'an ergisi kelse, o'zinen keshsin ha'm o'z atanaq ag'ashın arqalap, Menin' izime ersin.
35 Sebebi kim de kim o'z janın saqlamaqshı bolsa, onı jog'altadı. Al kim de kim o'z janın Men ha'm Xosh Xabar ushın jog'altsa, onı saqlap qaladı.
36 Adam pu'tkil du'nyanı iyelep alıp, biraq o'z janın jog'altsa, bunnan og'an ne payda?
37 Ol o'z janı ushın qanday to'lem bere aladı?
38 Eger kim de kim usı opasız ha'm gu'nakar a'wladta Mennen ha'm Menin' so'zlerimnen arlansa, Adam Ulı da A'kesinin' saltanatında O'zinin' muxaddes perishteleri menen kelgende, onnan arlanadı, – dedi.
