Mark 7 bob
1 İysanın' qasına Erusalimnen kelgen pariseyler ha'm ayırım diniy mug'allimler jıynaldı.
2 Olar İysanın' sha'kirtlerinin' ayırımları haram, yag'nıy u'rp-a'det boyınsha juwılmag'an qolları menen awqat jegenin ko'rdi.
3 O'ytkeni pariseyler ha'm barlıq yahudiyler ata-babalarınan qalg'an u'rp-a'detlerin saqlap, qolların jaqsılap juwmay turıp awqat jemeytug'ın
4 ha'm ja'ne de, bazardan kelip, juwınbag'ansha awqatlanbaytug'ın edi. Olar basqa da ko'p da'stu'rlerdi saqlawdı u'rdis etken. Mısalı: kese, gu'ze, mıs qazanlardı juwadı.
5 Sonlıqtan pariseyler menen diniy mug'allimler İysadan: – Nege Senin' sha'kirtlerin' ata-babalardan qalg'an u'rp-a'detlerdi orınlamay, haram qolları menen awqat jeydi? – dep soradı.
6 İysa olarg'a: – Sizler, eki ju'zliler tuwralı İyshaya payg'ambar mınaday dep durıs boljag'an: «Bul xalıq sıylar Meni tili menen, Al kewilleri tur Mennen alıs.
7 Olar Mag'an bosqa sıyınıp, Adam oylap tapqan parızlardı u'yreter».
8 Sizler Qudaydın' buyrıg'ın taslap, adamlardın' da'stu'rlerin orınlap ju'rsizler, – dedi.
9 İysa olarg'a ja'ne: – Sizler o'z da'stu'rlerin'izdi saqlaw ushın, Qudaydın' buyrıg'ın biykarlawdı aqılg'a muwapıq dep esaplaysızlar.
10 Muwsa: «Ata-anan'dı hu'rmetle, kim de kim ata-anasına jaman so'z aytsa, o'ltirilsin», – degen.
11 Biraq sizler: «Kim de kim a'kesine yamasa anasına: „Sag'an beretug'ınımdı Qudayg'a qurban (Qudayg'a arnalg'an sıy) ettim“, dese,
12 sol adam ata-anasına hesh ja'rdem bermese de boladı», – deysizler.
13 Solay etip, sizler o'z u'rp-a'detlerin'iz benen Qudaydın' so'zin biykar etip, basqa da usı sıyaqlı ko'p islerdi isleysizler, – dedi.
14 İysa xalıqtı ja'ne O'zine shaqırıp alıp bılay dedi: – Meni ha'mmen'iz tın'lap, tu'sinip alın'lar.
15 Adamnın' ishine sırttan kiretug'ın hesh na'rse onı haramlay almaydı,
16 al adamdı onın' ishinen shıg'atug'ın na'rse haramlaydı.
17 Ol xalıqtın' qasınan ketip, u'yge kirgende, sha'kirtleri sol tımsal haqqında soradı.
18 İysa olarg'a: – Ele sizler de tu'sinbedin'ler me? Adamnın' ishine sırttan kiretug'ın hesh na'rse onı haramlay almaytug'ının tu'sinbeysizler me?
19 Sebebi ol onın' kewline emes, al qarınına barıp, son'ınan sırtqa shıg'adı, – dedi. Solay etip, İysa ha'r qanday azıq-awqattın' hadal ekenin ayttı.
20 Ol ja'ne: – Adamdı onın' ishinen shıqqan na'rseler haramlaydı.
21 O'ytkeni ishten, adamnın' kewlinen jaman oylar, buzıqshılıq, urlıq islew, adam o'ltiriw,
22 neke hadallıg'ın buzıw, na'psiqawlıq, jawızlıq, aldaw, azg'ınlıq, ku'nshillik, masqaralaw, menmenlik, aqılsızlıq shıg'adı.
23 Bul jamanlıqlardın' barlıg'ı adamnın' ishinen shıg'ıp, onı haramlaydı, – dedi.
24 İysa sol jerden shıg'ıp, Tir u'lkesine keldi. Ol bir u'yge kirdi ha'm bunı hesh kimnin' bilgenin qa'lemedi, biraq jasırına almadı.
25 Kishkene qızı jawız ruwxqa shalıng'an bir hayal İysa haqqında esitip, da'rhal Og'an keldi de, ayag'ına jıg'ıldı.
26 Bul – Sirofinikiya elinde tuwılg'an grek hayalı edi. Ol İysadan qızındag'ı jindi quwıp shıg'arıwdı o'tindi.
27 Al İysa og'an: – Birinshi balalardı toydırıw kerek, balalardın' nanın alıp, iytlerge taslaw durıs emes, – dedi.
28 Hayal juwap berip: – Durıs, İyem. Biraq iytler de dasturxannan tu'sken balalardın' nanının' usaqların jeydi-g'o, – dedi.
29 İysa og'an: – Usı juwabın' ushın u'yin'e qayta ber, qızın'nan jin shıg'ıp ketti, – dedi.
30 Hayal u'yine kelgende, qızının' to'sekte jatırg'anın ha'm onnan jinnin' shıg'ıp ketkenin ko'rdi.
31 İysa Tir u'lkesinen shıg'ıp, Sidon arqalı Dekapolistin' u'sti menen Galila ten'izine qaytıp keldi.
32 Sol jerde adamlar Og'an ha'm geren', ha'm saqaw bolg'an adamdı alıp kelip, onın' u'stine qolın qoyıwın o'tindi.
33 İysa onı shetirek shıg'arıp, qulaqlarına barmaqların tıqtı da, tu'kirip, qolın onın' tiline tiygizdi
34 Aspang'a qarap gu'rsindi de, og'an: – Effata! – dedi. Bul «ashıl» degendi bildiredi.
35 Sol waqıtta-aq adamnın' qulaqları ashıldı ha'm ol tilge kirip, durıs so'yley basladı.
36 İysa adamlarg'a bul haqqında hesh kimge aytpawdı buyırdı. Biraq Ol olarg'a qansha tıyım salsa da, olar ja'ne de ko'birek jaya berdi.
37 Adamlar qattı tan' qalısıp: – Ol ha'mmesin jaqsı isleydi: geren'lerdi esitetug'ın, gu'n'eleklerdi so'yleytug'ın qıladı, – desti.
