Mark 4 bob
1 İysa ja'ne ten'iz jag'asında ta'lim bere basladı. A'tirapına ju'da' ko'p xalıq jıynalg'anlıqtan, ten'izdegi qayıqqa minip otırdı, al xalıq ten'izdin' jag'asında, jerde boldı.
2 Ol xalıqqa tımsallar menen ko'p na'rselerdi u'yretip, bılay dedi:
3 – Tın'lan'lar: bir tuqım sebiwshi tuqım sebiwge shıg'ıptı.
4 Ol sepkende, tuqımlardın' geybirewleri jol shetine tu'sipti. Quslar ushıp kelip, olardı shoqıp jep qoyıptı.
5 Geybirewleri topırag'ı az bolg'an taslaqqa tu'sip, jer teren' bolmag'anlıqtan tez ko'gerip shıg'ıptı.
6 Biraq ku'n shıqqannan son' solıp, tamırsız bolg'anlıqtan, quwrap qalıptı.
7 Geybirewleri tikenler arasına tu'sipti. Tikenler o'skennen son', olardı tunshıqtırıp taslaptı ha'm olar zu'ra'a't bermepti.
8 Al basqaları o'nimli jerge tu'sip, ko'gerip o'sip shıg'ıptı ha'm geybirewi otız, geybirewi alpıs, geybirewi ju'z eseden zu'ra'a't beripti.
9 Qulag'ı bar jaqsılap esitip alsın!
10 İysa jalg'ız qalg'anda, on eki sha'kirti ha'm basqalar Onnan tımsallar haqqında soradı.
11 İysa olarg'a bılay dedi: – Quday Patshalıg'ının' sırın biliw sizlerge berilgen. Al sırttag'ı basqa adamlarg'a ha'mmesi tımsallap aytıladı.
12 Solay etip: «Olar qarasa da ko'rmeydi, Esitse de tu'sinbeydi, Qaytıp kelip, keshirilmeydi»
13 İysa olarg'a bılay dedi: – Sizler bul tımsaldı tu'sinbeysizler me? Onda basqa barlıq tımsallardı qalay tu'sinesizler?
14 Tuqım sebiwshi Qudaydın' so'zin sebedi.
15 Geybir adamlar jol shetine sebilgen tuqımlarg'a uqsaydı, olar Qudaydın' so'zin esitiwden-aq, shaytan kelip, olardın' kewline sebilgen so'zdi alıp ketedi.
16 Bazılar taslaq jerge sebilgen tuqımlarg'a uqsaydı. Olar so'zdi esitken waqıtta-aq onı quwanısh penen qabıl etedi.
17 Biraq tamırsız bolg'anlıqtan turaqsızlıq etip, so'z ushın azap shegiwge yamasa quwdalanıwg'a tuwra kelgende, tez isenimnen qaytadı.
18 Ayırımlar tikenler arasına sebilgen tuqımlarg'a uqsaydı.
19 Olar so'zdi esitse de, bul du'nyanın' ta'shiwishleri, baylıqqa aldanıw ha'm basqa da ha'wes bolıwlar so'zdi tunshıqtıradı, sonlıqtan olar zu'ra'a't bermeydi.
20 Al basqaları o'nimli jerge sebilgen tuqımlarg'a uqsaydı. Olar so'zdi esitip, onı qabıl etedi ha'm zu'ra'a't beredi: birewleri otız, birewleri alpıs, birewleri ju'z eseden beredi.
21 İysa olarg'a ja'ne bılay dedi: – Kim shıranı ıdıstın' yamasa ka'ttin' astına qoyıw ushın a'keledi?
22 Sebebi ashılmaytug'ın hesh qanday sır, bilinbeytug'ın hesh qanday jasırın na'rse joq.
23 Esitiwge qulag'ı bar esitsin!
24 İysa dawam etip, olarg'a bılay dedi: – Esitkenlerin'izge kewil awdarın'lar! Sizler qanday o'lshem menen o'lshep bersen'ler, Quday da sizlerge sonday o'lshem menen o'lshep beredi. Ha'tte, sizlerge qosımsha etip te beredi.
25 Kimde bar bolsa, og'an qosımsha etip beriledi, al kimde joq bolsa, onın' barı da tartıp alınadı.
26 Son' İysa: – Aspan Patshalıg'ı mınag'an uqsaydı: bir adam jerge tuqım sewipti.
27 Ol tu'n bolg'anda uyıqlaptı, ku'ndiz bolg'anda oyanıptı: biraq tuqımnın' qalay ko'gerip o'skenin bilmepti.
28 O'ytkeni jer o'z-o'zinen zu'ra'a't beredi: da'slep ko'k shıg'ıp, son'ınan masaq, al onnan son' masaq ishinde da'n o'nedi.
29 Al egin pisip jetiliskende, sol adam da'rriw orıwg'a kirisedi, sebebi orıw ma'ha'li keldi, – dedi.
30 İysa tag'ı bılay dedi: – Quday Patshalıg'ın nege uqsatayıq? Onı qanday tımsal menen tu'sindiriwge boladı?
31 Ol qıshqıl tuqımg'a uqsaydı. Jerge sebilgende, bul tuqım jer ju'zindegi barlıq tuqımlardın' en' kishisi boladı.
32 Biraq ol sebilgennen son' o'sip, shaqaları jayılıp, barlıq sho'plerden u'lken boladı ha'm og'an aspan qusları ushıp kelip, sayalı shaqalarına uya saladı.
33 İysa usınday ko'p tımsallar menen xalıqqa tu'sine alg'anınsha so'z ayttı.
34 Olarg'a tımsalsız hesh na'rse aytpadı, al sha'kirtlerine awlaqta ha'mmesin tu'sindirdi.
35 Sol ku'ni keshte İysa sha'kirtlerine: – Ten'izdin' arg'ı jag'asına o'teyik, – dedi.
36 Olar xalıqtı qaldırıp, İysanı otırg'an qayıg'ı menen alıp ketti. Onın' menen birge basqa qayıqlar da bar edi.
37 Sonda ku'shli dawıl ko'terilip, tolqınlar qayıqtı soqqılag'anda, qayıq suwg'a tola basladı.
38 Al İysa qayıqtın' artqı jag'ında basına dastıq salıp, uyıqlap atır edi. Sha'kirtleri Onı oyatıp: – Ustaz! Bizler o'letug'ın boldıq-g'o, bul Sag'an ba'ri bir me? – dedi.
39 Sonda Ol turdı da, samalg'a tıyım salıp, ten'izge: – Toqta! Tınıshlan! – dep buyırdı. Sonda samal toqtap, awır tınıshlıq ornadı.
40 İysa olarg'a: – Nege bunshama qorqasızlar? Ele isenimlerin'iz joq pa? – dedi.
41 Biraq olar qattı qorqısıp, bir-birine: – Samaldı da, ten'izdi de O'zine boysındıratug'ın bul kim? – desti.
