Mark 3 bob
1 İysa ja'ne ma'jilisxanag'a kirdi. Ol jerde qolı la'n' bir adam bar edi.
2 Geybirewler İysanı ayıplamaqshı bolıp, dem alıs ku'ni* sol adamg'a shıpa bermes pe eken dep, Onı an'lıdı.
3 İysa qolı la'n' adamg'a: – Ortag'a shıq, – dedi.
4 Son'ınan olardan: – Nızam boyınsha dem alıs ku'ni ne islegen durıs: jaqsılıq pa yamasa jamanlıq pa? Adamnın' janın qutqarıw ma yamasa nabıt qılıw ma? – dep soradı. Biraq olar u'ndemedi.
5 İysa olarg'a ashıwlı na'zer taslap, olardın' tas bawırlıg'ına qıynaldı ha'm sol adamg'a: – Qolın'dı soz, – dedi.
6 Biraq pariseyler sırtqa shıg'ıp, İysanı joq qılıw tuwralı Hirodtın' adamları menen da'rriw til biriktire basladı.
7 İysa O'z sha'kirtleri menen ten'izdin' jag'asına shıqtı. Og'an Galiladan ko'p xalıq erip ju'rdi.
8 Yahudiyadan, Erusalimnen, İdumeyadan, İordannın' arg'ı jag'asınan ha'm Tir menen Sidon a'tirapınan ju'da' ko'p adamlar Onın' islegen isleri haqqında esitip, Og'an keldi.
9 Xalıq ko'p jıynalg'anlıqtan, O'zin tıg'ılıstırmasın dep, İysa sha'kirtlerine qayıq tayarlawdı tapsırdı.
10 Sebebi Ol ko'p adamlarg'a shıpa bergenlikten, awırıw adamlardın' ha'mmesi Og'an qolların tiygizbekshi bolıp, a'tirapına tıg'ılıstı.
11 Ha'r qashan jawız ruwxlar İysanı ko'rgende, Onın' aldına jıg'ılıp: – Sen – Qudaydın' Ulısan'! – dep baqırısatug'ın edi.
12 Biraq Ol O'zinin' kim ekenligin ashıq aytıwdı olarg'a qatan' qadag'an etetug'ın edi.
13 İysa tawg'a shıg'ıp, O'zi qa'legen adamlardı shaqırg'anda, olar Onın' qasına keldi.
14 O'zi menen birge bolıw ushın,
15 Qudaydın' so'zin ja'riyalawg'a jiberiw ushın ha'm jinlerdi quwıp shıg'arıwg'a biylik beriw ushın on ekisin tan'ladı.
16 İysa tayınlag'an on eki elshi mınalar edi: Ol Petr dep atag'an Simon,
17 İysa Boanerges, yag'nıy «gu'ldirmamanın' balaları» dep atag'an Zebedeydin' ulları Yaqıp ha'm Yuxan,
18 Andrey, Filip, Bartolomey, Matta, Tomas, Alpeydin' ulı Yaqıp, Tadey, watansu'yer Simon.
19 ha'm keyin İysag'a satqınlıq islegen Yahuda İsqariot.
20 Son'ınan İysa u'yge kirgende, ja'ne ko'p xalıq jıynalıp, Og'an ha'm sha'kirtlerine awqatlanıwg'a mu'mkinshilik bolmay qaldı.
21 İysanın' u'yishi bunı esitip, Onı alıp ketiw ushın keldi. O'ytkeni adamlar: «Ol esinen awıptı», – degen edi.
22 Erusalimnen kelgen diniy mug'allimler: – Onda Belzebu'l-shaytan bar. Ol jinlerdi jinlerdin' baslıg'ının' ku'shi menen quwıp shıg'arıp ju'r, – desti.
23 Sonda İysa olardı O'zine shaqırıp alıp, olarg'a tımsallar menen so'yley basladı:
24 Eger bir patshalıq o'z ishinen bo'linse, ol qulaydı.
25 Bir u'y o'z ishinen bo'linse, ol qulaydı.
26 Eger shaytan o'zine o'zi qarsı shıg'ıp, o'z ara bo'linse, onda onın' patshalıg'ının' qulap, tamam bolatug'ın waqtının' jetkeni.
27 Hesh kim de ku'shli adamnın' u'yine kirip, mal-mu'lkin tonay almaydı. Tek onı baylag'annan keyin g'ana onın' u'yin tonay aladı-g'o.
28 Sizlerge shının aytıp turman: adamlardın' ha'r qanday gu'nası da, til tiygiziwleri de keshiriledi.
29 Biraq kim de kim Muxaddes Ruwxqa til tiygizse, hesh qashan keshirilmeydi. Ol ma'n'gige gu'nalı boladı.
30 İysa bul so'zlerdi adamlardın': «Onda jawız ruwx bar», – degeni sebepli ayttı.
31 Sonda İysanın' anası ha'm tuwısqanları keldi. Olar u'ydin' sırtında turıp, adam jiberip, Onı shaqırttı.
32 A'tirapında otırg'an alaman İysag'a: – Senin' anan' menen tuwısqanların' kelip, Seni sırtta shaqırıp tur, – desti.
33 İysa olarg'a juwap qaytarıp: – Menin' anam kim, tuwısqanlarım kimler? – dedi de,
34 a'tirapında otırg'anlarg'a qarap: – Mine, Menin' anam ha'm tuwısqanlarım!
35 Kim de kim Qudaydın' erkin orınlasa, Menin' tuwısqanım da, anam da – sol, – dedi.
