Mark 2 bob
1 Bir neshe ku'nnen keyin, İysa ja'ne Kaparnahumg'a qaytıp kelgende, adamlar Onın' u'yde ekenin esitti.
2 Ko'p adam jıynalg'anlıqtan, esik aldında da orın qalmadı. İysa olarg'a Qudaydın' so'zin ayttı.
3 Sonda Og'an to'rt adam bir la'n' adamdı ko'terip alıp keldi.
4 Biraq adam ko'p bolg'anlıqtan, İysag'a jaqınlasa almadı. Sonlıqtan olar İysa bolg'an u'ydin' to'besin ashıp, la'n' adamdı to'segi menen to'menge tu'sirdi.
5 İysa olardın' isenimin ko'rip, la'n' adamg'a: – Balam, gu'naların' keshirildi! – dedi.
6 Sol jerde bir neshe diniy mug'allimler otırg'an edi, olar ishlerinen:
7 «Ol nege Qudayg'a til tiygizip tur? Gu'nalardı jalg'ız Qudaydan basqa kim keshire aladı?» – dep oyladı.
8 İysa olardın' ne oylag'anın da'rriw bilip: – İshlerin'izden nege bunday na'rselerdi oylap tursızlar?
9 La'n' adamg'a neni aytıw an'satıraq: «Gu'naların' keshirildi», – dew me yamasa «Ornın'nan turıp, to'segin'di alıp ju'r», – dew me?
10 Biraq, Adam Ulının'* jer betinde gu'nalardı keshiriwge biyligi bar ekenin bilip qoyın'lar, – dedi de, la'n' adamg'a:
11 – Sag'an aytaman: ornın'nan tur da, to'segin'di alıp, u'yin'e bar! – dedi.
12 Adam ornınan turdı da, da'rriw to'segin alıp, adamlardın' ko'z aldında shıg'ıp ketti. Ha'mme tan' qalıstı ha'm Qudaydı maqtap: – Bizler hesh qashan bunday na'rseni ko'rgen joqpız, – desti.
13 İysa ja'ne ten'iz jag'asına barg'anda, xalıq Onın' qasına keldi ha'm Ol adamlarg'a ta'lim berdi.
14 İysa ketip baratırıp, salıq ken'sesinde otırg'an Alpeydin' ulı Lebiydi ko'rdi de, og'an: – Menin' izime er! – dedi. Ol ornınan turıp, İysanın' izine erdi.
15 İysa Lebiydin' u'yinde dasturxan basında otırg'anda, ko'p salıqshılar menen gu'nakarlar Ol ha'm Onın' sha'kirtleri menen birge awqat jedi. O'ytkeni Onın' izine eriwshi bunday adamlar ko'p edi.
16 Pariseyler arasındag'ı diniy mug'allimler Onın' gu'nakarlar ha'm salıqshılar menen birge as iship otırg'anın ko'rip, Onın' sha'kirtlerine: – Ol nege salıqshılar ha'm gu'nakarlar menen birge as iship otır? – dedi.
17 Bunı esitken İysa: – Shıpakerge deni sawlar emes, al awırıwlar mu'ta'j. Men haq adamlardı emes, al gu'nakarlardı shaqırıw ushın keldim, – dedi.
18 Yaqıyanın' ha'm pariseylerdin' sha'kirtleri oraza tutatug'ın edi. Ayırım adamlar İysag'a kelip: – Yaqıyanın' ha'm pariseylerdin' sha'kirtleri oraza tutadı, al Senin' sha'kirtlerin' nege oraza tutpaydı? – dep soradı.
19 İysa olarg'a: – Toyg'a kelgenler ku'yew olar menen birge bolg'an waqıtta oraza tuta ala ma? Ku'yew o'zleri menen birge bolsa, olar oraza tuta almaydı.
20 Biraq, olardan ku'yewdi tartıp alıp ketiletug'ın ku'nler keledi, olar sonda, sol ku'nleri oraza tutadı.
21 Hesh kim eski kiyimge jan'a tawardan jamaw jamamaydı. Olay etse, jan'a jamaw eski kiyimnen jırtılıp qalıp, jırtıq burıng'ısınan beter boladı.
22 Hesh kim jan'a sharaptı eski meske quymaydı. Olay etse, jan'a sharap eski mesti jarıp, sharap ta ag'ıp ketedi, mes te buzıladı. Jan'a sharap jan'a meske quyılıwı tiyis, – dedi.
23 Bir dem alıs ku'ni İysa biyday atızının' arasınan o'tip baratırg'anda, sha'kirtleri jol boyı biydaydın' masaqların u'ze basladı.
24 Pariseyler İysag'a: – Qara, olar ne ushın dem alıs ku'ninde islewge bolmaytug'ın isti islep atır, – dedi.
25 İysa olarg'a: – O'zi de, qasındag'ılar da awqatqa mu'ta'j bolıp ash qalg'anda, Dawıttın' ne islegenin sizler hesh oqımag'ansızlar ma?
26 Ol bas ruwxaniy Abiyatardın' zamanında Qudaydın' U'yine kirip, tek ruwxaniylerge g'ana jewge bolatug'ın, Qudayg'a arnalg'an nanlardı o'zi de jegen, qasındag'ılarg'a da bergen emes pe? – dedi.
27 Ol ja'ne: – Adam dem alıs ku'ni ushın emes, al dem alıs ku'ni adam ushın jaratılg'an.
28 Sonlıqtan Adam Ulı dem alıs ku'ninin' de iyesi, – dedi.
