Mark 16 bob
1 Dem alıs ku'ni o'tkennen son', magdalalı Ma'riyam, Yaqıptın' anası Ma'riyam ha'm Salomiya İysanın' denesine jag'ıw ushın xosh iyisli may satıp aldı.
2 Olar ha'ptenin' birinshi ku'ni, yag'nıy ekshembi ku'ni quyash shıg'ıwdan tan' azanda qa'birge keldi.
3 O'z ara: – Qa'birdin' awzındag'ı tastı bizlerge kim domalatıp berer eken? – dep so'ylesti.
4 Biraq basların ko'terip qarap, tastın' domalatıp taslang'anın ko'rdi. Tas ju'da' u'lken edi.
5 Qa'birdin' ishine kirgen olar on' ta'repte otırg'an aq kiyimli bir jas jigitti ko'rip, qorqıp ketti.
6 Jigit olarg'a: – Qorqpan'lar! Sizler atanaq ag'ashqa shegelengen Nasıralı İysanı izlep ju'rsizler-g'o. Ol qayta tirildi, Ol bul jerde joq. Mine, Onın' qoyılg'an jeri.
7 Endi barıp, Onın' sha'kirtlerine ha'm Petrge: «Ol sizlerden burın Galilada boladı. O'zinin' aytqanınday, Onı sol jerde ko'resizler», – dep aytın'lar, – dedi.
8 Hayallar qattı qorqısıp ha'm qaltırasıp, qa'birden shıg'ıp qashıp ketti. Qorqqanlıqtan, hesh kimge hesh na'rse aytpadı.
9 İysa ha'ptenin' birinshi ku'ni, yag'nıy ekshembi ku'ni erte tan'da qayta tirilip, birinshi bolıp magdalalı Ma'riyamg'a ko'rindi. İysa burın onnan jeti jindi quwıp shıg'arg'an edi.
10 Ma'riyam barıp, bunı İysa menen birge bolg'anlarg'a xabarladı. Olar jılap, qayg'ırıp otırg'an edi.
11 Biraq olar İysanın' tiri ekenin ha'm Ma'riyamnın' Onı ko'rgenin esitse de, isenbedi.
12 Son'ınan İysa awılg'a baratırg'an olardın' ekewine basqasha tu'rde ko'rindi.
13 Olar qaytıp kelip, basqa sha'kirtlerge xabarlag'anda, olarg'a da isenbedi.
14 Son'ınan İysa awqatlanıp otırg'an on bir sha'kirtine ko'rinip, olardı isenbewshilikte ha'm qaysarlıqta ayıpladı. O'ytkeni olar Onın' tirilgenin ko'rgenlerge isenbegen edi.
15 İysa olarg'a bılay dedi: – Pu'tkil du'nya boylap ju'rin'ler ha'm barlıq adamlarg'a Xosh Xabardı ja'riyalan'lar.
16 Kim de kim isenip shomıldırılsa, qutqarıladı, al kim de kim isenbese, hu'kim etiledi.
17 İsengenler menen mınaday ka'ramatlı belgiler birge boladı: Menin' atım menen jinlerdi quwıp shıg'arıp, jan'a tillerde so'yleydi.
18 Qolları menen jılanlardı uslap alsa da ha'm uwlı zat ishse de, olarg'a zıyan kelmeydi. Awırıwlardın' u'stilerine qolların qoyg'anda, olar shıpa tabadı.
19 İyemiz İysa olarg'a usılardı aytıp bolg'annan son', aspang'a alındı ha'm Qudaydın' on' ta'repine otırdı.
20 Al sha'kirtleri barıp, ha'mme jerde Xosh Xabardı ja'riyalap ju'rdi. İyemiz olar menen birge islep, O'z so'zin ka'ramatlı belgiler arqalı tastıyıqlaytug'ın edi.
