Mark 15 bob
1 Tan' atıwdan bas ruwxaniyler, aqsaqallar, diniy mug'allimler ha'm pu'tkil joqarg'ı ken'es ma'sla'ha'tlesip aldı da, İysanı baylap, rimli ha'kim Pilatqa aparıp tapsırdı.
2 Pilat Onnan: – Sen Yahudiylerdin' Patshasımısan'? – dep soradı. İysa og'an: – Sol ekenimdi o'zin' ayttın', – dep juwap berdi.
3 Bas ruwxaniyler Onı ko'p na'rselerde ayıpladı.
4 Pilat ja'ne İysadan sorap: – Sen hesh juwap bermeysen' be? Qara, olar Sag'an qanshama ayıp tag'ıp atır, – dedi.
5 Biraq İysa hesh juwap bermegenlikten, Pilat hayran qaldı.
6 Ha'r Qutqarılıw bayramında Pilat xalıq sorag'an bir tutqındı bosatıp beretug'ın edi.
7 Sol waqıtta qamaqta qozg'alan' waqtında o'zinin' sherikleri menen adam o'ltirgen Baraba degen bir adam bar edi.
8 Xalıq Pilatqa kelip, a'dettegidey isleytug'ın isin olar ushın islep, bir tutqındı bosatıp beriwin soray basladı.
9 Pilat olardan: – Yahudiylerdin' Patshasın bosatıp beriwimdi qa'leysizler me? – dep soradı.
10 Sebebi ol bas ruwxaniylerdin' İysanı o'zine ku'nshillik penen uslap bergenin biletug'ın edi.
11 Biraq bas ruwxaniyler xalıqtı u'gitlep, İysanın' ornına Barabanı bosatıp beriwdi talap ettirdi.
12 Pilat olarg'a ja'ne: – Olay bolsa, sizler Yahudiylerdin' Patshası dep atag'an Adamg'a ne isleyin? – dedi.
13 Olar: – Onı atanaq ag'ashqa shegelet! – dep baqırıstı.
14 Pilat olardan: – Ol qanday jamanlıq isledi, aqırı? – dep soradı. Biraq olar qattıraq baqırısıp: – Onı atanaq ag'ashqa shegelet! – dedi.
15 Sonda Pilat xalıqtı qanaatlandırıw ushın Barabanı bosatıp berdi. Al İysanı qamshılatqannan son', atanaq ag'ashqa shegelewge tapsırdı.
16 A'skerler İysanı hu'kimet sarayının' ishki ha'wlisine alıp barıp, pu'tkil a'skerlerdi jıynadı.
17 Olar İysag'a shım qızıl shapan kiygizdi de, tikenli shıbıqlardan taj o'rip, basına saldı.
18 Son'ınan: – Jasasın, Yahudiylerdin' Patshası! – dep baqırısa basladı.
19 Basına qamıs penen urıp, Og'an tu'kirdi de, aldında dize bu'gip, ta'jim etti.
20 Masqaralap bolg'annan son', olar İysanın' u'stindegi shım qızıl shapandı sheship alıp, Og'an O'z kiyimin kiygizdi de, atanaq ag'ashqa shegelew ushın alıp ketti.
21 İskender ha'm Rufustın' a'kesi, Simon degen kireneli bir adam awıldan kiyatırıp, sol jerden o'tip baratır edi. Onı İysanın' atanaq ag'ashın arqalap alıp ju'riwge ma'jbu'rledi.
22 Olar İysanı Golgota dep atalg'an, yag'nıy «Bas su'yek ornı» degendi an'latatug'ın jerge alıp keldi.
23 Og'an mirra qosılg'an sharaptı bergende, Ol ishiwden bas tarttı.
24 İysanı atanaq ag'ashqa shegelep bolg'annan son', kim ne alar eken dep shek taslasıp, o'z ara Onın' kiyimlerin bo'listi.
25 Olar İysanı atanaq ag'ashqa shegelegende, saat azang'ı tog'ız edi.
26 Onın' bas betinde ayıbın ko'rsetetug'ın: «YAHUDİYLERDİN' PATSHASI» degen jazıw bar edi.
27 İysa menen birge eki qaraqshını da, birewin on',
28 ekinshisin sol ta'repine atanaq ag'ashqa shegeledi.
29 O'tip baratırg'anlar basların shayqadı ha'm Onın' u'stinen ku'lip: – Ha'y, İbadatxananı buzıp, Onı u'sh ku'nnin' ishinde qayta tikleyjaq bolg'an, Sen!
30 O'zin'di O'zin' qutqarıp, atanaq ag'ashtan tu'sip ko'rshi! – dedi.
31 Bas ruwxaniyler menen diniy mug'allimler de Onı mazaq qılıp, birbirine: – Bul basqalardı qutqarıp, O'zin O'zi qutqara almaydı!
32 İzraildın' Patshası Masix ha'zir atanaq ag'ashtan tu'ssin, sonda bizler ko'rip, Og'an isenemiz, – desti. İysa menen birge atanaq ag'ashqa shegelengenler de Onı mazaq etti.
33 Tu'ski saat on ekiden baslap, tu'sten keyin saat u'shke deyin pu'tkil jerdi qaran'g'ılıq qaplap turdı.
34 Saat u'shte İysa qattı dawıs penen: – Eloy, Eloy! Lama sabaxtani? – dep baqırdı. Bul: «Qudayım, Qudayım! Nege Meni taslap kettin'?» – degendi an'latadı.
35 Sol jerde turg'anlardın' geybirewleri bunı esitip: – Qaran'lar, Ol İliyastı shaqırıp atır, – desti.
36 Sonda bir adam juwırıp barıp, sorg'ıshtı sirke suwına sin'dirdi ha'm onı bir tayaqqa qadadı da, Og'an ishiwge berip: – Toqtay turın'! İliyas kelip, Onı tu'sirip alar ma eken, ko'reyik! – dedi.
37 Al İysa qattı baqırdı da, jan tapsırdı.
38 Sol waqıtta İbadatxananın' Muxaddesxanasındag'ı perde joqarıdan to'menge deyin qaq ayırılıp, ekige bo'lindi.
39 İysanın' qarsısında turg'an ju'zbası Onın' usılay jan tapsırg'anın ko'rip: – Haqıyqattan da, bul Adam – Qudaydın' Ulı eken, – dedi.
40 Sol jerde uzaqtan qarap turg'an bir neshe hayal bar edi. Olardın' arasında: magdalalı Ma'riyam, kishkene Yaqıp penen İosestin' anası Ma'riyam ha'm Salomiya boldı.
41 Olar İysag'a Galilada bolg'an waqtında erip ju'rip, Og'an xızmet etken edi. Ol jerde İysa menen birge Erusalimge kelgen basqa ko'p hayallar da bar edi.
42 Ku'n kesh boldı. Bul ku'n tayarlıq ku'ni, yag'nıy shembi ku'ninen aldın'g'ı juma ku'ni edi.
43 Sonda joqarg'ı ken'estin' hu'rmetli ag'zası, Qudaydın' Patshalıg'ın ku'tiwshi arimatiyalı Yusup keldi. Ol batıllıq penen Pilattın' aldına kirdi de, İysanın' denesin soradı.
44 Pilat İysanın' a'lle qashan o'lgenine hayran qalıp, ju'zbasını shaqırtıp aldı da: – O'lgenine ko'p waqıt boldı ma? – dep soradı.
45 Ju'zbasıdan bilip alg'annan son', ol deneni Yusupke berdi.
46 Yusup kepinlik tawar satıp aldı. Ol İysanın' denesin atanaq ag'ashtan tu'sirip alıp, kepin menen oradı da, jartasta oyılg'an qa'birge qoyıp, qa'birdin' awzına bir tastı domalatıp qoydı.
47 Magdalalı Ma'riyam menen İosestin' anası Ma'riyam İysanın' qay jerge qoyılg'anın ko'rdi.
