Mark 14 bob
1 Qutqarılıw ha'm Ashıtqısız nan bayramına eki ku'n qalg'an edi. Bas ruwxaniyler ha'm diniy mug'allimler İysanı hiyle menen uslap alıp, o'ltiriwdin' jolın izlestirdi.
2 Biraq olar: «Xalıq arasında qozg'alan' bolmawı ushın, bul isti bayram ku'nleri islemeyik», – desti.
3 İysa Betaniyada, burın maqaw kesel bolg'an Simonnın' u'yinde, dasturxan basında otırg'anda, ma'rmer ıdısta sap nardtan islengen qımbat bahalı a'tir mayı bar bir hayal keldi. Ol ıdıstı sındırdı da, maydı İysanın' basına quydı.
4 Geybirewler ashıwlanıp, bir-birine: – Bul may nege biykarg'a ısırap etildi?
5 Onı u'sh ju'z dinardan da qımbatıraqqa satıp, aqshasın jarlılarg'a u'lestirip beriwge bolar edi-g'o, – desip, hayaldı ayıplay basladı.
6 Biraq İysa: – Hayaldı tınıshına qoyın'lar. Onı nege uyaltıp atırsızlar? Ol Mag'an jaqsılıq isledi-g'o.
7 O'ytkeni jarlılar sizler menen ba'rqulla birge, olarg'a qa'legen waqtın'ızda ja'rdem bere alasızlar. Biraq Men sizler menen ba'rqulla birge bolmayman.
8 Ol qolınan kelgenin isledi. Menin' deneme aldın ala a'tir may quyıp, onı jerlewge tayarladı.
9 Sizlerge shının aytıp turman: Xosh Xabar du'nyanın' qay jerinde ja'riyalansa da, bul hayal eske alınıp, onın' islegen isi aytılatug'ın boladı, – dedi.
10 Son'ınan on eki sha'kirttin' biri bolg'an Yahuda İsqariot İysanı uslap beriw ushın bas ruwxaniylerge bardı.
11 Olar bunı esitip, quwanısıp qaldı ha'm og'an gu'mis ten'ge beriwdi wa'de etti. Yahuda da İysanı uslap beriwge qolaylı payıt izledi.
12 Ashıtqısız nan bayramının' birinshi ku'ni Qutqarılıw bayramının'* qozısı shalıng'anda, sha'kirtleri İysag'a: – Qutqarılıw bayramının' asın jewin' ushın, bizlerdin' qay jerge barıp tayarlıq ko'riwimizdi qa'leysen'? – desti.
13 Ol sha'kirtlerinin' ekewin jiberip, olarg'a: – Qalag'a barın'lar, ol jerde sizlerge gu'ze menen suw ko'terip kiyatırg'an adam gezleskende, onın' izine erin'ler.
14 Ol kirgen u'ydin' iyesine: «Ustazımız: „Sha'kirtlerim menen birge bayram asın jeytug'ın bo'lme qa'ne?“ – dep sorap atır», den'ler.
15 Ol sizlerge to'sekler to'selip tayar turg'an joqarıdag'ı u'lken bo'lmeni ko'rsetedi. Bizlerge sol jerde bayram asın tayarlan'lar, – dedi.
16 Sha'kirtleri shıg'ıp, qalag'a keldi ha'm İysanın' aytqanların tawıp, bayram asın tayarladı.
17 Kesh bolg'anda, İysa on eki sha'kirti menen birge keldi.
18 Olar awqatlanıp otırg'anda, İysa: – Sizlerge shının aytıp turman: Menin' menen awqatlanıp otırg'an aran'ızdag'ı birin'iz Mag'an satqınlıq isleydi, – dedi.
19 Olar qapa bolıp, birinen son' biri Onnan: – Men emespen-g'o, ya? – dep soray basladı.
20 İysa olarg'a juwap berip: – On eki sha'kirtimnin' biri, Menin' menen bir tabaqqa nanın malıp atırg'an adam – sol.
21 Adam Ulı O'zi haqqında jazılg'anday baratır, biraq Adam Ulına satqınlıq qılıwshı ha'siret shegedi! Ol adamnın' bul du'nyag'a kelmegeni o'zi ushın jaqsıraq bolar edi, – dedi.
22 Olar awqatlanıp otırg'anda, İysa nan alıp, Qudayg'a shu'kirlik etti. Onı sındırıp, sha'kirtlerine berdi de: – Alın'lar, bul – Menin' denem, – dedi.
23 Son' keseni alıp, Qudayg'a shu'kirlik etti de, olarg'a berdi. Onnan ha'mmesi ishti.
24 Olarg'a: – Bul – ko'p adamlar ushın to'giletug'ın, Jan'a Kelisimdi bekitetug'ın Menin' qanım.
25 Sizlerge shının aytıp turman: Quday Patshalıg'ında jan'asın ishetug'ın ku'nime deyin, ju'zim ishimliginen qaytıp ishpeymen, – dedi.
26 Son'ınan olar Qudaydı jırlaytug'ın qosıq aytıp, Za'ytu'n tawına ketti.
27 İysa olarg'a: – Sizlerdin' ha'mmen'iz Meni taslap ketesizler. Sebebi bılay dep jazılg'an: «Shopandı urg'anımda, Qoylar tarqap ketedi».
28 Biraq qayta tirilgenimnen keyin, sizlerden burın Galilag'a baraman, – dedi.
29 Petr Og'an: – Seni ha'mmesi taslap ketse de, men taslap ketpeymen, – dedi.
30 Sonda İysa og'an: – Sag'an shının aytıp turman: bu'gin tu'nde qoraz eki ret shaqıraman degenshe, sen Mennen u'sh ret tanasan', – dedi.
31 Biraq Petr qızıp ketip: – Mag'an Senin' menen birge o'liwge tuwra kelse de, Sennen hesh qashan tanbayman, – dedi. Qalg'anlarının' ha'mmesi de solay dedi.
32 Olar Getsemani dep atalatug'ın jerge keldi. İysa sha'kirtlerine: – Men duwa etip bolaman degenshe, sizler usı jerde otırın'lar, – dedi.
33 O'zi menen birge Petr, Yaqıp ha'm Yuxandı alıp, qattı qa'weterlenip, qıynala basladı.
34 Olarg'a: – Janım o'lerdey qıynalıp tur. Sizler usı jerde qalıp, sergek bolıp turın'lar, – dedi.
35 Shetirek shıg'ıp, jerge jıg'ıldı da, mu'mkin bolsa bul saattın' O'zinen o'tiwin sorap, duwa ete basladı.
36 – A'ke, A'kejanım! Sag'an ha'mmesi mu'mkin. Bul azap kesesin Mennen o'tkizip jiber. Biraq Menin' emes, Senin' qa'legenin' bolsın, – dedi.
37 İysa sha'kirtlerinin' qasına qaytıp kelip, olardın' uyıqlap atırg'anın ko'rdi de, Petrge: – Simon, uyıqlap atırsan' ba? Uyıqlamay bir saat ta otıra almadın' ba?
38 Azg'ırılmawın'ız ushın sergek bolıp, duwa etin'ler. Ruwx qa'leydi, biraq dene ha'lsiz, – dedi.
39 Ol ja'ne barıp, sol so'zlerin aytıp, duwa etti.
40 Qaytıp kelip, olardın' ja'ne uyıqlap atırg'anın ko'rdi. O'ytkeni ko'zlerin uyqı basqan edi. Olar İysag'a ne dep juwap bererin bilmedi.
41 İysa u'shinshi ret qaytıp kelip, olarg'a: – Sizler ele uyıqlap, dem alıp atırsızlar ma? Boldı, waqıt keldi. Adam Ulı gu'nakarlardın' qolına uslap beriledi.
42 Turın'lar, kettik. Qaran'lar, Mag'an satqınlıq qılıwshı jaqınladı, – dedi.
43 Tap sol waqıtta, İysa ele so'ylep turg'anda, on eki sha'kirtinin' biri Yahuda keldi. Onın' menen birge bas ruwxaniyler, diniy mug'allimler ha'm aqsaqallar jibergen bir topar adamlar bar edi. Adamlar qolına qılısh ha'm shoqmar uslag'an edi.
44 Satqınlıq qılıwshı olarg'a belgi berip: «Men kimdi su'ysem, Ol – Sonın' O'zi. Onı uslap, abaylap alıp ketin'ler», – degen edi.
45 Yahuda keldi de, da'rriw İysag'a jaqınlasıp, Og'an: – Ustaz! – dep, Onı su'ydi.
46 Al adamlar İysag'a qol salıp, uslap aldı. 47Biraq İysanın' qasında turg'anlardın' birewi qılıshın suwırıp alıp, bas ruwxaniydin' qulının' qulag'ın shawıp tasladı.
47 Biraq İysanın' qasında turg'anlardın' birewi qılıshın suwırıp alıp, bas ruwxaniydin' qulının' qulag'ın shawıp tasladı
48 Sonda İysa olarg'a: – Meni uslaw ushın, jınayatshıg'a qarsı shıqqanday bolıp, qılısh ha'm shoqmar alıp keldin'ler me?
49 Men ha'r ku'ni sizler menen İbadatxanada birge bolıp, ta'lim bergenimde, Meni uslamadın'lar. Biraq, Muxaddes Jazıwlar orınlanıwı sha'rt, – dedi.
50 Sonda sha'kirtlerinin' ha'mmesi Onı taslap, qashıp ketti.
51 Jalan'ash denesine tawar orag'an bir jas jigit Onın' izine erip baratır edi. Olar onı uslap alg'anda,
52 ol orang'an tawarın taslap, jalan'ash qashıp ketti.
53 Olar İysanı bas ruwxaniyge apardı. Ol jerge ha'mme bas ruwxaniyler, aqsaqallar ha'm diniy mug'allimler jıynaldı.
54 Petr İysag'a bas ruwxaniydin' ha'wlisinin' ishine deyin uzaqtan erip kelip, ha'wlide saqshılar menen birge otqa jılınıp otırdı.
55 Bas ruwxaniyler ha'm pu'tkil joqarg'ı ken'es İysanı o'lim jazasına hu'kim etiw ushın, Og'an qarsı gu'walıq izledi, biraq taba almadı.
56 Sebebi ko'p adamlar Og'an qarsı jalg'an gu'walıqlar berse de, gu'walıqları bir-birine sa'ykes kelmes edi.
57 Son'ınan geybirewler ornınan turıp, Og'an qarsı jalg'an gu'walıq berip:
58 – Bizler Onın': «Adam qolınan qurılg'an bul İbadatxananı Men buzıp taslap, u'sh ku'nnin' ishinde adam qolınan qurılmag'an basqa İbadatxana quraman», – degenin esittik, – dedi.
59 Biraq olardın' gu'walıg'ı da sa'ykes kelmedi.
60 Sonda bas ruwxaniy ortag'a shıg'ıp, İysadan: – Olar Sag'an qarsı gu'walıq berip atır-g'o. Sen nege hesh juwap bermeysen'? – dep soradı.
61 Biraq İysa u'ndemedi ha'm hesh juwap qaytarmadı. Bas ruwxaniy Onnan ja'ne: – Alg'ıslının' Ulı – Masix Senbisen'? – dep soradı.
62 İysa: – Awa, Men. Sizler Adam Ulının' Qu'diretli Qudaydın' on' jag'ında otırg'anın ha'm aspandag'ı bultlarda kiyatırg'anın ko'resizler, – dedi.
63 Sonda bas ruwxaniy o'z kiyimlerin jırtıp: – Endi bizlerge gu'walardın' nege keregi bar?
64 Qudayg'a til tiygizgenin esittin'ler-g'o. Sizlerdin' qararın'ız qanday? – dedi. Olardın' ha'mmesi İysanı o'lim jazasına hu'kim etiwge qarar etti.
65 Geybirewler Og'an tu'kire basladı ha'm betin baylap, Onı mushlap urdı da, Og'an: – Qa'nekey, wa'liylik et, – desti. Saqshılar da Onı shapalaq penen urdı.
66 Petr ishki ha'wlide otırg'anda, bas ruwxaniydin' shorı qızlarınan biri keldi.
67 Ol otqa jılınıp otırg'an Petrdi ko'rip, og'an tigilip qaradı da: – Sen de sol Nasıralı İysa menen birge edin'-g'o, – dedi.
68 Biraq Petr tanıp: – Senin' ne aytıp turg'anın'dı bilmeymen ha'm tu'sinbeymen, – dedi de, sırtqı ha'wlige shıg'ıp ketti.
69 Shorı qız onı ko'rip, sol jerdegilerge ja'ne: – Bul adam – solardın' biri, – dep ayta basladı.
70 Biraq Petr ja'ne tandı. Birazdan son', sol jerde turg'anlar Petrge: – Rasında da, sen solardın' birisen', o'ytkeni galilalısan'-g'o, – dedi.
71 Ol: – Sizler aytıp turg'an bul Adamdı men tanımayman, – dep ant iship, o'zin o'zi g'arg'ay basladı.
72 Sol waqıtta-aq qoraz ekinshi ret shaqırdı. Petr İysanın' o'zine: «Qoraz eki ret shaqıraman degenshe, sen Mennen u'sh ret tanasan'», – degen so'zi esine tu'sip, jılap jiberdi.
