Mark 13 bob
1 İysa İbadatxanadan shıg'ıp baratırg'anda, sha'kirtlerinin' biri: – Ustaz, qara, qanday a'jayıp taslar, qanday a'jayıp imaratlar! – dedi.
2 İysa og'an: – Mına sawlatlı imaratlardı ko'rip tursan' ba? Bul jerde tas u'stinde tas qalmaydı, ha'mmesi qıyratıladı, – dedi
3 Son'ınan İysa Za'ytu'n tawında, İbadatxananın' qarsı aldında otırg'anda, Petr, Yaqıp, Yuxan ha'm Andrey awlaqta Onnan:
4 – Bizlerge ayt, bular qashan boladı ha'm bulardın' ha'mmesinin' bolatug'ının qanday belgi bildiredi? – dep soradı.
5 Sonda İysa olarg'a bılay dep ayta basladı: – Birewlerdin' sizlerdi aldawınan saq bolın'lar!
6 O'ytkeni ko'pler Menin' atım menen kelip: «Men – Masixpan» dep, ko'p adamlardı aldaydı.
7 Sizler urıslardın' shawqımın ha'm urıslar haqqında mıshmıshlardı esitkende qa'weterlenben'ler. Bulardın' bolıwı sha'rt, biraq bul ele aqırı emes.
8 Sebebi millet milletke qarsı, patshalıq patshalıqqa qarsı ko'teriledi. Ko'p jerlerde jer silkiniwler ha'm asharshılıqlar boladı. Bul waqıyalar tolg'aq azabının' baslanıwınday boladı.
9 O'zlerin'izge saq bolın'lar! O'ytkeni sizler hu'kim etiliwge uslap berilesizler ha'm ma'jilisxanalarda tayaq jeysizler. Ja'ne de, Men sebepli ha'kimler ha'm patshalardın' aldılarına aparılıp, olarg'a gu'walıq beresizler.
10 Biraq da'slep Xosh Xabar ha'mme xalıqlarg'a ja'riyalanıwı sha'rt.
11 Sizlerdi uslap alıp, hu'kim etiwge aparatırg'anda, ne aytıwdı oylap, aldın ala tınıshsızlanban'lar. Sol waqıtta sizlerge ne berilse, sonı aytın'lar. Sebebi sizler emes, al Muxaddes Ruwx so'yleydi.
12 Tuwısqanı tuwısqanın, a'kesi balasın o'limge uslap beredi. Balaları da ata-analarına qarsı shıg'ıp, olardı o'ltirtedi.
13 Menin' atım sebepli, sizlerdi ha'mme jek ko'redi. Biraq aqırına deyin shıdag'an qutqarıladı.
14 – Wayran etiwshi jerkenishlinin' turıwg'a bolmaytug'ın jerde turg'anın ko'rgenin'izde* (oqıg'an adam ma'nisin tu'sinsin), Yahudiyadag'ılar tawlarg'a qashsın!
15 Kim de kim u'yinin' to'besinde bolsa, to'menge tu'spesin ha'm bir na'rse alayın dep u'yine kirmesin.
16 Al kim de kim atızda bolsa, shapanın alıw ushın izine qaytpasın.
17 Sol ku'nleri ju'kli ha'm emiziwli hayallarg'a qanday qıyın boladı!
18 Bulardın' qıs ma'wsiminde bolmawı ushın duwa etin'ler.
19 O'ytkeni sol ku'nleri Quday bul du'nyanı jaratqannan beri usı ku'nge deyin bolmag'an ha'm qaytıp bolmaytug'ın apat boladı.
20 Eger İyemiz sol ku'nlerdin' sanın qısqartpag'anda, hesh kim aman qalmas edi. Biraq Ol O'zinin' tan'lap alg'anları ushın, sol ku'nlerdin' sanın qısqarttı.
21 Sonda eger sizlerge birew: «Qaran'lar, Masix bul jerde» yamasa: «Qaran'lar, Ol ana jerde» dese, isenben'ler.
22 Sebebi jalg'an masixlar ha'm jalg'an payg'ambarlar payda bolıp, eger mu'mkin bolsa, tan'lap alıng'anlardı aldaw ushın, ka'ramatlı belgiler ha'm tan' qalarlıq islerdi ko'rsetedi.
23 Sonlıqtan saq bolın'lar! Men ha'mmesin sizlerge aldın ala aytıp atırman.
24 – Biraq sol ku'nleri, sol apattan keyin, «Ku'n qaran'g'ılanadı, Ay o'z jaqtısın tu'sirmeydi.
25 Juldızlar aspannan tu'sip, Aspan ku'shleri silkinedi»
26 Sonda adamlar Adam Ulının' ullı qu'diret ha'm saltanat penen bultlarda kiyatırg'anın ko'redi.
27 Ol O'z perishtelerin jiberip, du'nyanın' to'rt ta'repinen, jerdin' shetinen baslap aspannın' shetine deyin, O'zinin' tan'lap alg'anların jıynap aladı.
28 – A'njir ag'ashın mısalg'a alın'lar: onın' shaqaları jumsarıp, japıraq shıg'ara baslag'anda, jazdın' jaqın ekenin bilesizler.
29 Sol sıyaqlı, usı waqıyalardın' orınlanıp atırg'anın ko'rsen'ler, Adam Ulının' jaqınlap, esik aldında turg'anın bilin'ler.
30 Sizlerge shının aytıp turman: bul a'wlad joq bolıp ketpesten burın bulardın' ha'mmesi boladı.
31 Aspan ha'm jer joyıladı, biraq Menin' so'zlerim hesh qashan joyılmaydı.
32 – Sol ku'ndi yamasa sol saattı hesh kim de bilmeydi: aspandag'ı perishteler de, Uldın' O'zi de, tek g'ana A'kem biledi.
33 Abaylan'lar ha'm sergek bolın'lar*, o'ytkeni sol waqıttın' qashan keletug'ının bilmeysizler.
34 Bul – bir adamnın' sayaxatqa ketip baratırıp, u'yindegi xızmetshilerine basqarıwg'a biylik bergeni ha'm ha'r birine is tapsırıp, da'rwaza qarawılına sergek bolıwdı buyırg'anı sıyaqlı.
35 Solay etip, sizler de sergek bolın'lar. Sebebi u'y iyesinin' keshte me, yarım aqshamda ma, qoraz shaqırg'anda ma, erte azanda ma, qashan keletug'ının bilmeysizler.
36 Ol ku'tilmegende kelip, sizlerdin' uyıqlap atırg'anın'ızdı ko'rmesin.
37 Sizlerge aytatug'ınımdı ha'mmege aytaman: sergek bolın'lar!
