Mark 11 bob
1 Olar Erusalimge jaqınlap, Za'ytu'n tawının' etegindegi Betfage ha'm Betaniya degen awıllarg'a kelgende, İysa sha'kirtlerinin' ekewin jumsap,
2 olarg'a bılay dedi: – Qarsı aldın'ızdag'ı awılg'a barın'lar. Og'an kiriwden-aq, ele hesh kim minbegen, baylawlı turg'an bir gu'rreni tabasızlar. Onı sheship, alıp kelin'ler.
3 Eger birew sizlerden: «Nege bunday islep atırsızlar?» – dep sorasa, sizler: «Bul İyemizge kerek. Ol bunı tez qaytarıp jiberedi», – dep juwap berin'ler.
4 Olar barıp, ko'shedegi da'rwaza qasında baylang'an gu'rreni taptı ha'm onı sheship aldı.
5 Sol jerde turg'an geybirewler olarg'a: – Gu'rreni sheship alıp ne qılajaqsızlar? – dep soradı.
6 Olar İysanın' aytqanınday juwap bergende, adamlar olarg'a ruxsat berdi.
7 Gu'rreni İysag'a alıp kelip, o'zlerinin' shapanların onın' u'stine salg'anda, İysa minip aldı.
8 Ko'p adamlar shapanların jolg'a to'sep, al geybirewler daladag'ı tereklerden shaqa kesip alıp, jolg'a jaydı.
9 Aldında ha'm izde erip kiyatırg'anlar bılay dep baqırıstı: – «Hosanna!* İyemizdin' atınan Keliwshi jarılqang'an!
10 Babamız Dawıttın' jaqınlap kiyatırg'an Patshalıg'ı jarılqang'an! En' joqarıda hosanna!»
11 İysa Erusalimge kelip, İbadatxanag'a kirdi. Ol jerde ha'mme na'rseni ko'zden keshirip bolıp, kesh bolg'anlıqtan, on eki sha'kirti menen Betaniyag'a ketti.
12 Kelesi ku'ni olar Betaniyadan shıqqanda, İysa ash boldı.
13 Ol alıstan japıraqları menen qaplang'an bir a'njir ag'ashın ko'rip, onnan bir na'rse tabılar ma eken dep, qasına bardı. Biraq jemis beretug'ın waqtı bolmag'anlıqtan, japıraqlarınan basqa hesh na'rse tappadı.
14 Sonda Ol ag'ashqa: – Bunnan bılay, ma'n'gige senin' miywen'nen hesh kim jemesin! – dedi. Bunı sha'kirtleri de esitti.
15 Olar Erusalimge kelgende, İysa İbadatxanag'a kirip, ol jerden satıwshılar menen alıwshılardı quwıp shıg'ara basladı. Aqsha almastırıwshılardın' stolların, kepter satıwshılardın' otırg'ıshların awdarıp tasladı.
16 ha'm İbadatxananın' ha'wlisi arqalı hesh kimge hesh na'rse alıp o'tiwge ruxsat etpedi.
17 Son'ınan xalıqqa ta'lim berip: – «Menin' u'yim ha'mme xalıqlar ushın, Duwa etiw u'yi dep ataladı» , – dep jazılmag'an ba? Al sizler onı qaraqshılardın' uyasına aylandırdın'lar, – dedi.
18 Bas ruwxaniyler ha'm diniy mug'allimler bunı esitip, Onı joq qılıw jolın izlestire basladı. O'ytkeni pu'tkil xalıq İysanın' ta'limine tan' qalısqanlıqtan, olar Onnan qorqatug'ın edi.
19 Kesh bolg'anda, İysa sha'kirtleri menen qaladan shıg'ıp ketti.
20 Olar erte azanda o'tip baratırıp, a'njir ag'ashının' tamırına deyin quwrap qalg'anın ko'rdi.
21 Petr bolg'an waqıyanı esine tu'sirip, İysag'a: – Ustaz! Qara, Sen g'arg'ag'an a'njir ag'ashı quwrap qalıptı, – dedi.
22 İysa olarg'a juwap berip: – Qudayg'a isenin'ler.
23 Sizlerge shının aytıp turman: eger kim de kim bul tawg'a: «Ornın'nan ko'terilip, ten'izge qula», – dese ha'm kewlinde gu'manlanbay, aytqanının' orınlanatug'ınına isense, onın' aytqanı orınlanadı.
24 Sonlıqtan da, sizlerge aytatug'ınım: duwa etkenin'izde neni sorasan'lar da, alg'anın'ızg'a isenin', sonda ol sizlerge beriledi.
25 Duwa etip turg'anın'ızda, birewge o'kpeli bolsan'ız, onı keshirin',
26 sonda aspandag'ı A'ken'iz de sizlerdin' gu'naların'ızdı keshiredi, – dedi.
27 Olar ja'ne Erusalimge keldi. İysa İbadatxananın' ha'wlisinde aylanıp ju'rgende, Og'an bas ruwxaniyler, diniy mug'allimler ha'm aqsaqallar kelip,
28 Onnan: – Sen bulardı qanday biylik penen islep ju'rsen'? Sag'an bul islerdi islewge kim biylik bergen? – dep soradı.
29 İysa olarg'a juwap berip: – Men de sizlerge bir soraw bereyin, juwap berin'ler. Sonda Men de bulardı qanday biylik penen isleytug'ınımdı aytaman.
30 Yaqıyanın' shomıldırıwı aspannan boldı ma yamasa adamlardan ba? Juwap berin'ler, – dedi.
31 Olar o'z ara oylasa basladı: «Eger „aspannan“ desek, Ol: „Sonda nege og'an isenbedin'ler“, deydi.
32 „Adamlardan“ deyik pe?» Biraq onday dewge xalıqtan qorqtı, sebebi ha'mme Yaqıyanı haqıyqıy payg'ambar dep sanaytug'ın edi.
33 Sonlıqtan olar İysag'a: – Bilmeymiz, – dep juwap berdi. İysa olarg'a: – Men de sizlerge bul islerdi qanday biylik penen isleytug'ınımdı aytpayman, – dedi.
