Mark 10 bob
1 İysa sol jerdi qaldırıp, Yahudiya u'lkesine ha'm İordannın' arg'ı ta'repine ketti. Onın' janına ja'ne ko'p xalıq jıynalg'an edi ha'm Ol tag'ı a'dettegidey olarg'a ta'lim berdi.
2 İysag'a ayırım pariseyler keldi ha'm Onı sınap ko'rmekshi bolıp: – Er adamnın' hayalı menen ajırasıwı nızamg'a tuwrı kele me? – dep soradı.
3 İysa sorawg'a soraw menen juwap berip: – Muwsa sizlerge neni buyırg'an edi? – dedi.
4 Olar: – Muwsa er adamnın' hayalına talaq xat jazıp, ajırasıwına ruxsat etken, – dedi.
5 İysa olarg'a: – Sizler tas bawır bolg'anlıqtan, ol usı buyrıqtı jazg'an edi.
6 «Biraq jaratılıstın' basında Quday adamlardı erkek ha'm hayal qılıp jaratqan».
7 «Sonlıqtan er adam ata-anasın qaldırıp, o'z hayalına qosıladı.
8 ha'm ekewi bir dene boladı. Solay etip, olar endi eki emes, al bir dene boladı».
9 Sol sebepli, Quday qosqanlardı adam ajıratpasın, – dedi.
10 U'yde bolg'anda, Onnan sha'kirtleri ja'ne usılar haqqında soradı.
11 İysa olarg'a: – Kim de kim o'z hayalı menen ajırasıp, basqa hayal alsa, ol hayalına bolg'an neke hadallıg'ın buzg'an boladı.
12 Hayal da o'z ku'yewi menen ajırasıp, basqa erkekke turmısqa shıqsa, ol da neke hadallıg'ın buzg'an boladı, – dedi.
13 Qolın tiygizsin dep, adamlar İysag'a balaların alıp keldi. Al sha'kirtleri olarg'a keyidi.
14 Bunı ko'rgende İysa olarg'a ashıwlanıp: – Balalardın' Mag'an keliwine ruxsat berin'ler! Olarg'a tosqınlıq jasaman'lar! O'ytkeni Quday Patshalıg'ı usındaylardiki.
15 Shının aytıp turman: – Kim de kim Quday Patshalıg'ın bala sıyaqlı qabıl etpese, og'an hesh kire almaydı, – dedi.
16 Son'ınan balalardı qushaqlap, olardın' u'stine qolların qoyıp, pa'tiyasın berdi.
17 İysa jolg'a shıg'ıp baratırg'anda bir adam juwırıp kelip, Onın' aldında dize bu'kti de: – İygilikli Ustaz! Ma'n'gilik o'mirdi alıwım ushın ne islewim kerek? – dep soradı.
18 İysa og'an: – Sen nege Meni iygilikli dep atap atırsan'? Jalg'ız Qudaydan basqa hesh kim iygilikli emes.
19 Onın' buyrıqların o'zin' bilesen'-g'o: «Adam o'ltirme, neke hadallıg'ın buzba, urlıq isleme, jalg'an gu'walıq berme, jalataylıq qılma, ata-anan'dı hu'rmetle».
20 Ol İysag'a: – Ustaz! Men bulardın' ha'mmesin bala waqtımnan beri orınlap kiyatırman, – dedi.
21 İysa og'an su'yispenshilik penen qarap: – Sag'an bir na'rse jetispeydi. Barıp barlıq mal-mu'lkin'di satıp, aqshasın jarlılarg'a ber, sonda senin' g'a'ziynen' aspanda boladı. Son'ınan kelip, Menin' izime er, – dedi.
22 Biraq jigit bul so'zlerdi esitkende tu'ri o'zgerip ketti. Ol qapa bolıp, ketip qaldı. Sebebi onın' baylıg'ı ko'p edi.
23 İysa a'tirapına qarap, sha'kirtlerine: – Baylıg'ı barlarg'a Quday Patshalıg'ına kiriw qanday qıyın! – dedi.
24 Sha'kirtleri bul so'zlerdi esitip, tan' qalıstı. Biraq İysa olarg'a ja'ne: – Balalarım! Quday Patshalıg'ına kiriw qanday qıyın!
25 Bay adamnın' Quday Patshalıg'ına kiriwinen go're, tu'yege iynenin' ko'zinen o'tiw an'satıraq, – dedi.
26 Olar qattı tan' qalısıp, bir-birine: – Olay bolsa, kim qutqarıla aladı? – dedi.
27 İysa olarg'a qarap: – Bul adamlardın' qolınan kelmeydi, biraq Qudaydın' qolınan keledi. O'ytkeni Quday ushın mu'mkin emes na'rse joq, – dedi.
28 Sonda Petr so'z baslap, Og'an: – Minekey, bizler ha'mme na'rseni taslap, Senin' izin'e erdik, – dedi.
29 İysa juwap berip: – Shının aytıp turman: kim de kim Men ha'm Xosh Xabar ushın ya u'ylerin, ya ag'a-inilerin, ya apa-qarındasların, ya ata-anasın, ya balaların, ya jerlerin taslap shıqsa,
30 ol ha'zir, bul du'nyada quwdalanıwlar menen birlikte ju'z ese artıg'ı menen u'ylerin de, ag'a-inilerin de, apaqarındasların da, anaların da, balaların da, jerlerin de aladı ha'm keleshekte ma'n'gilik o'mirge iye boladı.
31 Biraq, birinshilerdin' ko'bisi son'g'ılar, son'g'ılardın' ko'bisi birinshiler boladı, – dedi.
32 Olar Erusalimge ko'teriletug'ın jolda baratırg'anda, İysa sha'kirtlerinin' aldında ju'rdi. Sha'kirtleri tan' qalıstı, al erip kiyatırg'anlar qorqınıshta edi. İysa on eki sha'kirtin ja'ne shaqırıp aldı da, O'zine ne bolatug'ını haqqında olarg'a ayta baslap, bılay dedi:
33 – Minekey, bizler Erusalimge qaray ko'terilip baratırmız. Sol jerde Adam Ulı bas ruwxaniyler ha'm diniy mug'allimlerdin' qolına uslap beriledi. Olar Onı o'limge hu'kim etip, basqa millet adamlarına tapsıradı.
34 Olar Onı masqaralap, Og'an tu'kiredi ha'm qamshılap sabap, o'ltiredi. Al u'sh ku'nnen keyin, Ol qayta tiriledi.
35 Sonda Zebedeydin' ulları Yaqıp ha'm Yuxan İysag'a kelip: – Ustaz! Bizler ne sorasaq ta, sonı Senin' bizler ushın orınlawın'dı qa'leymiz, – dedi.
36 İysa olardan: – Menin' sizler ushın ne islewimdi qa'leysizler? – dep soradı.
37 Olar: – O'zin'nin' saltanatlı patshalıg'ın'da birewimizdi on' jag'ın'a, ekinshimizdi sol jag'ın'a otırg'ız, – desti.
38 İysa: – Sizler ne sorap turg'anın'ızdı bilmeysizler. Sizler Men ishetug'ın azap kesesinen ishe alasızlar ma? Menin' shomıldırılatug'ınımday, shomıldırıla alasızlar ma? – dedi.
39 Olar: – Awa, alamız, – dep juwap berdi. İysa olarg'a: – Men ishetug'ın azap kesesinen sizler de ishesizler, Menin' shomıldırılatug'ınımday, sizler de shomıldırılasızlar.
40 Biraq Menin' on' jag'ım yamasa sol jag'ıma otırg'ızıw Menin' erkimde emes. Bul orınlar kimlerge arnalg'an bolsa, solar otıradı, – dedi.
41 Qalg'an on sha'kirt bunı esitkende, Yaqıp penen Yuxang'a ashıwlanıp qaldı.
42 Sonda İysa olardı qasına shaqırıp alıp: – Basqa milletler arasında hu'kimdarları bolıp esaplang'anlar xalıqqa zulımlıq etip, basshıları u'stemlik penen basqaratug'ının sizler bilesizler.
43 Biraq, sizlerdin' aran'ızda bunday bolmasın. Aran'ızda kim ullı bolg'ısı kelse, ol sizlerge xızmetshi bolıwı sha'rt.
44 Aran'ızda kim birinshi bolg'ısı kelse, ol ha'mmege qul bolıwı sha'rt.
45 Sebebi Adam Ulı da O'zine xızmet ettiriwge emes, al O'zi xızmet etiwge ha'm ko'plegen adamlardın' qutqarılıwı ushın O'z janın qurban etiwge keldi, – dedi.
46 Olar Erixog'a keldi. İysa O'z sha'kirtleri ha'm ko'p xalıq penen Erixodan shıg'ıp baratırg'anda, jol boyında tilenshilik etip, Timeydin' ulı soqır Bartimey otır edi.
47 Ol Nasıralı İysanın' sol jerde ekenin esitkende: – Dawıttın' Urpag'ı İysa! Mag'an rehim ete go'r! – dep baqıra basladı.
48 Ko'p adamlar u'nin shıg'armawın aytıp, og'an keyidi. Biraq ol onnan da beter qattı baqırıp: – Dawıttın' Urpag'ı! Mag'an rehim ete go'r! – dedi.
49 İysa toqtap: – Onı shaqırın', – dedi. Adamlar soqırdı shaqırıp: – Jigerli bol, ornın'nan tur! Ol seni shaqırıp atır, – dedi.
50 Ol shapanın sheshti de, ornınan ushıp turıp, İysag'a keldi.
51 İysa onnan: – Menin' sen ushın ne islewimdi qa'leysen'? – dep soradı. Soqır adam Og'an: – Ustaz! Ko'zlerim ko'retug'ın bolsın, – dedi.
52 İysa og'an: – Bar, isenimin' seni qutqardı, – dedi. Sol waqıtta-aq soqırdın' ko'zi qaytadan ko'retug'ın boldı ha'm ol İysanın' izine erip, jolg'a tu'sti.
