Mark 1 bob
1 Qudaydın' Ulı İysa Masixtın' Xosh Xabarının' baslanıwı.
2 İyshaya payg'ambardın' kitabında bılay dep jazılg'an: «Mine, Men xabarshımdı aldın'nan jiberemen, Ol Senin' baratug'ın jolın'dı tayarlap qoyadı.
3 Sho'l dalada baqırg'an birewdin' dawısı shıg'adı: „İyemizge jol tayarlan'lar, Onın' jolların du'zetin'ler!“»
4 Yaqıya sho'l dalag'a kelip, adamlardı suwg'a shomıldırdı. Olarg'a gu'nalarının' keshiriliwi ushın ta'wbege keliwdi ha'm suwg'a shomıldırılıwdı ja'riyalap ju'rdi.
5 Sonda pu'tkil Yahudiya u'lkesinin' xalqı ha'm Erusalim turg'ınlarının' ha'mmesi og'an barıp, gu'naların moyınladı ha'm İordan da'ryasında shomıldırıldı.
6 Yaqıya tu'ye ju'ninen kiyim kiygen, belin teri qayıs penen buwg'an bolıp, shegirtke ha'm jabayı ha'rrenin' palı menen awqatlanatug'ın edi.
7 Ol xalıqqa ja'riyalap: – Menin' izimnen mennen de qu'diretli Birew kiyatır. Men iyilip, Onın' ayaq kiyiminin' bawın sheshiwge de ılayıqlı emespen.
8 Men sizlerdi suw menen shomıldırdım, al Ol sizlerdi Muxaddes Ruwx penen shomıldıradı, – dedi.
9 Sol ku'nleri İysa Galila u'lkesindegi Nasıra qalasınan kelip, İordan da'ryasında Yaqıyanın' qolınan shomıldırıldı.
10 İysa suwdan shıg'ıwdanaq, aspannın' ashılg'anın ha'm Muxaddes Ruwxtın' kepterdey O'zinin' u'stine tu'skenin ko'rdi.
11 Sonda aspannan: – Sen – Menin' su'yikli Ulımsan', Men Sag'an ırzaman! – degen saza esitildi.
12 Sonnan son', da'rriw Muxaddes Ruwx İysanı sho'lge apardı.
13 İysa sho'lde qırıq ku'n bolıp, shaytan ta'repinen sınaldı. Ol jabayı haywanlar arasında boldı ha'm perishteler Og'an xızmet etti.
14 Yaqıya qamaqqa alıng'annan keyin, İysa Galila u'lkesine keldi ha'm Qudaydın' Xosh Xabarın ja'riyalap:
15 – Waqıt boldı, Quday Patshalıg'ı jaqınladı. Ta'wbe etip, Xosh Xabarg'a isenin'ler! – dedi.
16 İysa Galila ten'izinin' jag'ası menen baratırg'anda, ten'izge aw salıp ju'rgen Simondı ha'm onın' inisi Andreydi ko'rdi. Olar balıqshılar edi.
17 İysa olarg'a: – Menin' izime erin'ler! Men sizlerdi adamlardı Qudaydın' jolına tu'siriwshiler qılaman, – dedi.
18 Olar da'rriw awların taslap, Onın' izine erdi.
19 İysa biraz ju'rgennen son', Zebedeydin' ulı Yaqıptı ha'm onın' inisi Yuxandı ko'rdi. Olar qayıqta awların jamap otırg'an edi.
20 İysa da'rriw olardı da shaqırdı. Olar da a'kesi Zebedeydi jumısshılar menen qayıqta qaldırıp, İysanın' izine erdi.
21 Olar Kaparnahum qalasına keldi. Dem alıs ku'ni bolg'anda İysa da'rhal ma'jilisxanag'a kirip, adamlarg'a ta'lim bere basladı
22 Adamlar Onın' ta'limine tan' qalıstı, sebebi Ol diniy mug'allimler sıyaqlı emes, al O'z biyligi menen ta'lim berdi.
23 Sol waqıtta olardın' ma'jilisxanasında jawız ruwxlı bir adam bolıp, ol:
24 – Nasıralı İysa! Bizler menen ne jumısın' bar? Sen bizlerdi joq etiwge keldin' be? Senin' kim ekenin'di bilemen, Sen – Qudaydın' Muxaddesisen'! – dep baqıra basladı.
25 Biraq İysa jawız ruwxqa keyip: – U'nin'di o'shir de, onnan shıg'ıp ket! – dedi.
26 Jawız ruwx adamdı qaltırattı da, qattı baqırıp, onnan shıg'ıp ketti.
27 Ha'mme tan' qalısıp, o'z ara: – Bul ne? Bul qanday qu'diretli jan'a ta'liymat? Onın' buyrıg'ına jawız ruwxlar da boysınadı-g'o, – desti.
28 İysa haqqında xabar tez arada pu'tkil Galila u'lkesinin' ha'mme jerine tarqaldı.
29 Ma'jilisxanadan shıg'ıwdan-aq, İysa Yaqıp ha'm Yuxan menen birge Simon ha'm Andreydin' u'yine keldi.
30 Simonnın' qa'yin enesinin' ıssılıg'ı ko'terilip, awırıp jatırg'an edi. Olar İysag'a ol haqqında da'rriw aytıp berdi.
31 İysa hayaldın' qasına barıp, qolınan uslap turg'ızg'anda, onın' ıssılıg'ı tu'sip, olarg'a xızmet etti.
32 Quyash batıp kesh tu'skende, adamlar İysag'a barlıq awırg'an ha'm jin urg'anlardı alıp keldi.
33 Pu'tkil qala xalqı esik aldına jıynaldı.
34 Ol ha'r tu'rli awırıw menen awırg'an ko'p adamlarg'a shıpa berdi ha'm ko'p jinlerdi quwıp shıg'ardı. İysa jinlerdin' so'ylewine ruxsat bermedi, o'ytkeni jinler Onın' kim ekenin biletug'ın edi.
35 Tan' azanda İysa erte turıp, u'yden shıqtı. Bir O'zi awlaq jerge ketip, sol jerde duwa etti
36 Simon ha'm onın' qasındag'ılar Onı izlep shıqtı.
37 Onı tapqannan son', Og'an: – Ha'mme Seni izlemekte, – desti.
38 Ol juwap berip: – Ju'rin'ler, jaqın jaylasqan qalalarg'a barayıq. Men ol jerlerde de waz aytıwım kerek, sebebi Men sol ushın kelgenmen, – dedi.
39 Solay etip, İysa pu'tkil Galila u'lkesin aralap, olardın' ma'jilisxanalarında waz aytıp, jinlerdi quwıp shıg'ardı.
40 Maqaw kesel bolg'an bir adam İysag'a kelip, Onın' aldında dize bu'kti ha'm Onnan: – Eger Sen qa'lesen', meni maqaw keselden tazalay alasan'-g'o, – dep o'tindi.
41 İysanın' janı ashıp, qolın sozıp, og'an tiygizdi de: – Qa'leymen, tazalan! – dedi.
42 Da'rhal sol adamnın' maqaw keseli ketip, tazalandı.
43 İysa qatan' eskertip, onı da'rhal jiberdi de:
44 – Abayla, hesh kimge hesh na'rse aytıwshı bolma! Biraq ruwxaniyge barıp o'zin'di ko'rset te, maqaw keselden tazalang'anın'dı adamlarg'a da'lillew ushın, Muwsa buyırg'an qurbanlıqtı ber, – dedi.
45 Biraq ol barıp, bolg'an waqıyanın' ha'mmesin jar salıp ayta basladı. Sol sebepli, İysa endi qalag'a ashıq kire almaytug'ın boldı ha'm qala sırtındag'ı dalan'lıqta turdı. Sonda da xalıq Og'an ha'r ta'repten kele berdi.
