Matta 8 bob
1 İysa tawdan tu'skende, izine ko'p xalıq erdi.
2 Sonda Onın' qasına maqaw kesel adam kelip, ayag'ına jıg'ıldı da: – İyem, eger Sen qa'lesen', meni maqaw keselden tazalay alasan'-g'o, – dedi.
3 İysa qolın sozıp, og'an tiygizdi de: – Qa'leymen, tazalan! – dedi. Ol sol waqıtta-aq maqaw keselden tazalanıp shıpa taptı.
4 İysa og'an: – Abaylı bol, bunı hesh kimge aytpa! Biraq ruwxaniyge barıp o'zin'di ko'rset te, maqaw keselden tazalang'anın'dı adamlarg'a da'lillew ushın, Muwsa buyırg'an qurbanlıqtı ber, – dedi.
5 İysa Kaparnahumg'a kirgen waqıtta Onın' qasına bir rimli ju'zbası kelip:
6 – İyem, menin' xızmetshim la'n' bolıp, qattı qıynalıp u'yde jatır, – dep Onnan ja'rdem soradı.
7 İysa og'an: – Men barıp, og'an shıpa beremen, – dedi.
8 Al ju'zbası: – İyem, Senin' shan'arag'ıma keliwin'e men ılayıqlı emespen. Tek bir so'z g'ana aytsan', xızmetshim jazılıp ketedi.
9 O'ytkeni men de birewdin' qol astındag'ı adamman, o'zime bag'ınıshlı a'skerlerim de bar. Olardın' birewine «bar» desem, baradı, ekinshisine «kel» desem, keledi, qulıma «mınanı isle» desem, isleydi, – dep juwap qaytardı.
10 Bulardı esitken İysa tan' qalıp, izine erip kiyatırg'anlarg'a: – Sizlerge shının aytıp turman: Men bunday isenimdi İzrailda da ushıratpag'an edim.
11 Sizlerge aytatug'ınım: shıg'ıstan ha'm batıstan ko'p adamlar kelip, İbrayım, Isaq ha'm Yaqıp penen birge Aspan Patshalıg'ında dasturxanlas boladı.
12 Al Patshalıqtın' miyrasxorları sırtqı qaran'g'ılıqqa shıg'arıp taslanadı. Sol jerde olar jılap, pushayman jeydi, – dedi.
13 Sonnan son', İysa ju'zbasıg'a: – Bara ber, senin' isenimin'e qaray bolsın! – dedi. Ju'zbasının' xızmetshisi sol waqıtta-aq jazılıp ketti.
14 İysa Petrdin' u'yine kelip, onın' qa'yin enesinin' ıssılıg'ı ko'terilip, awırıp jatırg'anın ko'rdi.
15 İysa hayaldın' qolına qolın tiygizgende, ıssılıg'ı tu'sti ha'm hayal ornınan turıp, Og'an xızmet etti.
16 Kesh bolg'anda, adamlar İysag'a jin urg'an ko'p adamlardı alıp keldi. İysa olardag'ı jawız ruwxlardı O'zinin' so'zi menen quwıp shıg'arıp, awırg'anlardın' ha'mmesine shıpa berdi.
17 Bular İyshaya payg'ambar arqalı aytılg'an mına so'zlerdin' orınlanıwı ushın boldı: «Ol ha'lsizliklerimizdi O'zine aldı, Awırıwlarımızdı O'zine ju'kledi».
18 İysa do'geregine jıynalg'an ko'p xalıqtı ko'rgende, sha'kirtlerine ten'izdin' arg'ı jag'asına o'tiwdi buyırdı.
19 Sonda bir diniy mug'allim kelip, Og'an: – Ustaz, Sen qayaqqa barsan' da, men Sag'an eremen, – dedi.
20 İysa og'an: – Tu'lkilerdin' inleri, aspandag'ı quslardın' uyaları bar. Biraq Adam Ulının' bas panalaytug'ın ornı da joq, – dedi.
21 Ja'ne bir sha'kirti Og'an: – İyem, da'slep barıp, a'kemdi jerlewime ruxsat et, – dedi.
22 Biraq İysa og'an: – Mag'an er. O'z o'lgenlerin jerlewdi o'lilerge qaldır, – dedi.
23 İysa qayıqqa mingende, sha'kirtleri de Onın' izinen mindi.
24 Ten'izde tosattan ku'shli dawıl ko'terilip, tolqınlar qayıqtı suwg'a toltıra basladı. Al İysa uyıqlap jatır edi.
25 Sonda sha'kirtleri Og'an jaqınlap keldi de, Onı oyatıp: – İyem! Bizlerdi qutqar, nabıt bolajaqpız! – dedi.
26 İysa olarg'a: – Nege bunshama qorqasızlar, ha'y, isenimi azlar? – dedi de, turıp samalg'a ha'm ten'izge tıyım salg'anda, awır tınıshlıq ornadı.
27 Adamlar tan' qalısıp: – Samaldı da, ten'izdi de O'zine boysındıratug'ın bul kim? – desti.
28 İysa arg'ı jag'adag'ı Gadara u'lkesine kelgende, qa'birlerdin' arasınan kiyatırg'an jin urg'an eki adamdı ushırattı. Olar ju'da' qa'ha'rli bolg'anlıqtan, bul jol menen o'tiwge hesh kimnin' batılı barmaytug'ın edi.
29 Olar qıshqırısıp: – Qudaydın' Ulı İysa, Senin' bizler menen ne jumısın' bar? Bul jerge bizlerdi waqtı kelmesten burın azaplawg'a keldin' be? – dedi.
30 Olardan alısıraqta bir u'lken shoshqa padası jayılıp ju'rgen edi.
31 Jinler İysag'a: – Eger bizlerdi quwıp shıg'aratug'ın bolsan', shoshqalardın' padasına jiber, – dep jalındı.
32 Sonda İysa olarg'a: – Barın'lar, – dedi. Jinler adamlardan shıg'ıp, shoshqalardın' ishine kirdi. Sonda shoshqalardın' ha'mmesi juwırısıp, tik jag'adan ten'izge tu'sti de, suwda nabıt boldı.
33 Padashılar qashıp qalag'a barıp, ba'rin xabarladı ha'm jin urg'anlarg'a ne bolg'anın da aytıp berdi.
34 Sonda qalanın' barlıq turg'ınları İysanın' aldına shıqtı. Olar Onı ko'rgende, u'lkeden shıg'ıp ketiwin o'tindi.
