Basqalardı hu'kim etpen'ler! (1-6),Soran'lar, izlen'ler, esikti qag'ın'lar! (7-12),Tar qapıdan kirin'ler! (13-14),Terek miywesinen biliner (15-23),Aqıllılıq ha'm aqılsızlıq (24-29).
Matta 7 bob
1 – Basqalardı hu'kim etpen'ler, sonda sizler de hu'kim etilmeysizler.
2 O'ytkeni sizler basqalardı qalay hu'kim etsen'ler, Quday da sizlerdi solay hu'kim etedi. Qanday o'lshem menen o'lshep bersen'ler, Quday da sizlerge sonday o'lshem menen o'lshep beredi.
3 Sen nege tuwısqanın'nın' ko'zindegi sho'pti ko'rip turıp, o'z ko'zin'degi qadanı sezbeysen'?
4 O'z ko'zin'de qada bola tura, qalay: «Qa'ne, ko'zin'degi sho'pti shıg'arıp alayın», – dep tuwısqanın'a aytasan'?
5 Ha'y, eki ju'zli! Da'slep o'z ko'zin'degi qadanı shıg'ar, sonda anıq ko'rip, tuwısqanın'nın' ko'zindegi sho'pti shıg'ara alasan'.
6 Muxaddes zattı iytlerge bermen'ler, hinji-marjanların'ızdı shoshqalardın' aldına taslaman'lar. Olardı ayaqları menen basqılap, aylanıp kelip sizlerdi tilkimlep taslaydı.
7 – Soran'lar, sizlerge beriledi. İzlen'ler, tabasızlar. Esikti qag'ın'lar, ol sizlerge ashıladı.
8 Sebebi sorag'an ha'r bir adam aladı, izlegen tabadı, esik qaqqang'a ashıladı.
9 Sizlerdin' aran'ızda ulı nan sorasa, tas beretug'ın adam bar ma?
10 Ya bolmasa, balıq sorasa, og'an jılan beretug'ın bar ma?
11 O'zlerin'iz jaman bola tura, balaların'ızg'a jaqsı sıylar beriwdi bilsen'iz, onda aspandag'ı A'ken'iz O'zinen sorag'anlarg'a qanshelli ko'p iygilikler beredi!
12 Solay etip, ha'mme iste adamlardın' sizlerge ne islegenin qa'lesen'ler, sizler de olarg'a sonı islen'ler. Muxaddes Nızamnın' da, payg'ambarlardın' Jazıwlarının' da ma'nisi usı.
13 – Tar qapıdan kirin'ler. O'ytkeni nabıt bolıwg'a aparatug'ın qapı ken', jol da u'lken, onın' menen ju'retug'ınlar ko'p.
14 Al o'mirge aparatug'ın qapı tar, jol da kishi, onı tabatug'ınlar az.
15 – Jalg'an payg'ambarlardan saq bolın'lar! Olar qoy terisin jamılıp sizlerge keledi, biraq ishlerinde olar jırtqısh qasqırlar.
16 Sizler olardı miywesinen bilesizler. Shen'gelden ju'zim yamasa oshag'annan a'njir jıynay alasız ba?
17 Ha'r bir jaqsı terek jaqsı miywe beredi, jaman terek jaman miywe beredi.
18 Jaqsı terek jaman miywe, jaman terek jaqsı miywe bere almaydı.
19 Jaqsı miywe bermeytug'ın ha'r bir terek shabılıp, otqa taslanadı.
20 Solay etip, sizler olardı miywesinen bilesizler.
21 Mag'an: «İyem! İyem!» degennin' ha'r biri emes, tek aspandag'ı A'kemnin' erkin orınlawshı Aspan Patshalıg'ına kiredi.
22 Zamannın' aqırg'ı ku'ninde ko'bisi Mag'an: «İyem! İyem! Bizler Senin' atın' menen payg'ambarshılıq etip, Senin' atın' menen jinlerdi quwıp shıg'armadıq pa? Senin' atın' menen ko'p ka'ramatlar islemedik pe?» – deydi.
23 Sonda Men olarg'a: «Men sizlerdi hesh qashan tanıg'an emespen, Mennen awlaq ketin'ler, ha'y, nızamdı buzıwshılar!» – dep ashıq aytaman.
24 – Solay etip, Menin' usı so'zlerimdi tın'lap, olardı orınlawshılardın' ha'r biri o'z u'yin jar tas u'stine salg'an aqıllı adamg'a uqsaydı.
25 Jawın jawıp, da'ryalar tasıp, samal esip, bul u'ydi soqqıladı, biraq ol jar tas u'stine salıng'anlıqtan qulamadı.
26 Al Menin' usı so'zlerimdi tın'lap, olardı orınlamawshılardın' ha'r biri o'z u'yin shege qum u'stine salg'an aqılsız adamg'a uqsaydı.
27 Jawın jawıp, da'ryalar tasıp, samal esip, bul u'ydi suw basqanda, ol qulap, qattı qıyraldı.
28 İysa usı so'zlerdi aytıp bolg'anda, xalıq Onın' ta'limine tan' qaldı.
29 Sebebi Ol diniy mug'allimler sıyaqlı emes, al O'z biyligi menen adamlarg'a ta'lim berdi.
