Matta 6 bob
1 – Abaylan'lar, sizler sawap islerin'izdi* adamlarg'a ko'rsetiw ushın, olardın' aldında islemen'ler. Olay etsen'ler, sizlerge aspandag'ı A'ken'izden sıylıq bolmaydı.
2 Solay etip, sen qayır-sadaqa bergenin'de, eki ju'zliler sıyaqlı o'zo'zin'nen jar salma. Bundaylar adamlar maqtasın dep, ma'jilisxanalarda ha'm ko'shelerde usılay isleydi. Sizlerge shının aytıp turman: olar a'lle qashan o'z sıyların alıp boldı.
3 Sen qayır-sadaqa bergenin'de, on' qolın'nın' ne islegenin sol qolın' bilmesin.
4 Sonda senin' qayır beriwin' jasırın boladı ha'm jasırınlıqtı ko'riwshi A'ken' sag'an qaytaradı.
5 – Duwa etkenin'izde, adamlarg'a ko'rsetiw ushın ma'jilisxanalarda ha'm ko'shelerdin' mu'yeshlerinde turıp duwa etiwdi jaqsı ko'retug'ın eki ju'zliler sıyaqlı bolman'lar. Sizlerge shının aytıp turman: olar a'lle qashan o'z sıyların alıp boldı.
6 Al sen duwa etkenin'de bo'lmen'e kirip, esigin'di japqanın'nan son', ko'zge ko'rinbeytug'ın A'ken'e duwa et! Sonda jasırınlıqtı ko'riwshi A'ken' sag'an qaytaradı.
7 Duwa etkenin'izde, butqa tabınıwshılar sıyaqlı mıljın'g'a berilmen'ler. Olar ko'p so'ylesek tın'lar dep oylaydı.
8 Sizler olarg'a uqsaman'lar. Sebebi A'ken'iz nege mu'ta'j ekenligin'izdi Onnan soramasın'ızdan aldın biledi.
9 Sonlıqtan sizler bılay dep duwa etin'ler: Aspandag'ı A'kemiz! Senin' atın' muxaddes bola bersin.
10 Senin' Patshalıg'ın' kelsin. Aspanda orınlang'anı sıyaqlı, Jerde de Senin' erkin' orınlansın.
11 Bizlerge bu'gin de ku'ndelikli nanımızdı bere go'r.
12 Bizlerge gu'na islegenlerdi keshirgenimizdey, Bizlerdin' de gu'nalarımızdı keshire go'r.
13 Bizlerdin' azg'ırılıwımızg'a jol qoymay, Shaytannan qutqara go'r. Sebebi Patshalıq ta, qu'diret te, ullılıq ta ma'n'gilikke Seniki. Awmiyin.
14 Eger sizlerge gu'na islegenlerdi keshirsen'ler, aspandag'ı A'ken'iz de sizlerdi keshiredi.
15 Al eger sizlerge gu'na islegenlerdi keshirmesen'ler, A'ken'iz de gu'naların'ızdı keshirmeydi.
16 – Oraza tutqanın'ızda, eki ju'zliler sıyaqlı mun'ayıp ju'rmen'ler. Olar adamlarg'a oraza tutıwshı bolıp ko'riniw ushın g'ana ajarın buzıp ju'redi. Sizlerge shının aytaman: olar a'lle qashan o'z sıyların alıp boldı.
17 Sen oraza tutqanın'da, shashın'dı tarap, betin'di juw.
18 Solay etip, oraza tutqanın' adamlarg'a emes, al ko'zge ko'rinbeytug'ın A'ken'e ko'rinsin. Jasırınlıqtı ko'riwshi A'ken' sag'an qaytaradı.
19 – O'zlerin'izge jer betinde baylıq jıynaman'lar. Bul jerde onı ku'ye de jeydi, tat ta basadı, urılar da buzıp kirip urlaydı.
20 Al o'zlerin'izge aspanda baylıq jıynan'lar. Sol jerde onı ku'ye de jemeydi, tat ta baspaydı, urılar da buzıp kirip urlamaydı.
21 O'ytkeni baylıqların'ız qay jerde bolsa, kewillerin'iz de sol jerde boladı.
22 Ko'z – denenin' shırag'ı. Sonlıqtan da, eger ko'zin' saw bolsa, pu'tkil denen' de jarıq boladı.
23 Eger ko'zin' saw bolmasa, pu'tkil denen' de qaran'g'ı boladı. Sonlıqtan eger ishin'degi jarıq qaran'g'ı bolsa, onda qaran'g'ılıqtın' o'zi qanshelli tas tu'nek boladı!
24 Hesh kim eki xojag'a xızmet ete almaydı. Sebebi ol birewin jek ko'rip, ekinshisin jaqsı ko'redi yamasa birewine sadıq bolıp, ekinshisine itibarsız qaraydı. Sizler ha'm Qudayg'a, ha'm baylıqqa birdey xızmet ete almaysızlar.
25 – Sonlıqtan sizlerge aytatug'ınım: ne iship, ne jeymiz dep, janın'ız ushın, ne kiyemiz dep, denen'iz ushın ta'shiwishlenben'ler. Jan awqattan, dene kiyimnen artıq emes pe?
26 Aspandag'ı quslarg'a qaran'lar! Olar ekpeydi de, ormaydı da, telekke jıynamaydı da, al aspandag'ı A'ken'iz olardı asıraydı. Sizler olardan anag'urlım artıq emessizler me?
27 Ta'shiwishleniw sebepli, kim sizlerdin' aran'ızda o'z o'mirin bir saatqa bolsa da uzayta aladı?
28 Kiyim tuwralı nege ta'shiwishlenesizler? Daladag'ı liliya gu'llerinin' qalay o'sip turg'anına qaran'lar! Olar miynet te etpeydi, jip te iyirmeydi.
29 Al sizlerge aytatug'ınım: Sulayman da o'zinin' sa'nsaltanatında usılardın' birewindey sa'nli kiyinbegen edi.
30 Eger bu'gin bar bolıp, erten' oshaqqa taslanatug'ın daladag'ı sho'pti Quday solay kiyindirse, sizlerdi olardan da artıq kiyindirmes pe edi, ha'y, isenimi azlar?
31 Sonlıqtan da: «Ne iship, ne jeymiz?» yamasa «Ne kiyemiz?» – dep ta'shiwishlenben'ler.
32 O'ytkeni usılardın' ha'mmesin butqa tabınıwshılar izlep ju'redi. Usı na'rselerdin' ha'mmesine mu'ta'j ekenin'izdi aspandag'ı A'ken'iz biledi.
33 En' aldı menen Qudaydın' Patshalıg'ın ha'm Onın' haqlıg'ın izlen'ler! Sonda bulardın' ha'mmesi sizlerge qosımsha etip beriledi.
34 Solay etip, erten'gi ku'n tuwralı ta'shiwishlenben'ler! Sebebi erten'gi ku'n o'zi ushın o'zi g'am jeydi. Ha'r ku'nnin' o'z g'amı o'zine jetedi.
