Matta 5 bob
1 İysa xalıqtı ko'rip, bir tawg'a shıqtı. Ol otırg'annan keyin, sha'kirtleri qasına keldi.
2 İysa olarg'a bılay dep ta'lim bere basladı:
3 – Ruwxıy jarlı bolg'anlar baxıtlı! Aspan Patshalıg'ı olardiki!
4 Qayg'ırıp ju'rgenler baxıtlı! Olar jubanısh tabadı.
5 Kishipeyilliler baxıtlı! Olar jer ju'zine iyelik etedi.
6 Haqlıqqa mu'ta'j bolg'anlar baxıtlı! Quday olardı tolıq qanaatlandıradı.
7 Miyrim-sha'pa'a'tliler baxıtlı! Olar miyrim-sha'pa'a't aladı.
8 Pa'k kewilliler baxıtlı! Olar Qudaydı ko'redi.
9 Jarastırıwshılar baxıtlı! Olar Qudaydın' balaları dep ataladı.
10 Haqlıq ushın quwdalang'anlar baxıtlı! Aspan Patshalıg'ı olardiki.
11 Adamlar sizlerdi Men sebepli xorlasa, quwdalasa, ha'r tu'rli o'tirik so'zler menen jamanlasa, sizler baxıtlısızlar!
12 Quwanın'lar ha'm shadlanın'lar! O'ytkeni sizlerdin' aspandag'ı sıyın'ız u'lken. Sizlerden burıng'ı payg'ambarlardı da usılay quwdalag'an.
13 – Sizler – du'nyanın' duzısızlar. Biraq duz o'z ku'shin joytsa, onı qalay ja'ne shorlı qılıwg'a boladı? Onda ol hesh na'rsege jaramaydı, tek shıg'arıp taslanıp, adamlardın' ayag'ı astında basılıp qaladı.
14 Sizler – du'nyanın' nurısızlar. Taw basına salıng'an qala jasırın bolıp qalmaydı.
15 Sonday-aq shıranı jaqqannan son', onı ıdıstın' astına emes, al shıra qoyg'ıshqa qoyadı, sonda ol u'ydegilerdin' ha'mmesine o'z jaqtısın tu'siredi.
16 Sol sıyaqlı, sizlerdin' nurın'ız adamlardın' aldında jarqıray bersin. Adamlar sizlerdin' jaqsı islerin'izdi ko'rip, aspandag'ı A'ken'izdi dan'qqa bo'lesin!
17 – Sizler Meni Muxaddes Nızamdı yamasa payg'ambarlardın' Jazıwların biykar etiwge keldi, dep oylaman'lar. Men biykar etiw ushın emes, al orınlaw ushın keldim.
18 Sizlerge shının aytıp turman: aspan menen jer joyılmag'ansha, Muxaddes Nızamnın' bir ha'ribi de, bir noqatı da joyılmaydı, barlıg'ı da orınlanıwı tiyis.
19 Solay etip, kim de kim usı buyrıqlardın' en' kishi birewin buzıp, adamlarg'a da solay u'yretse, ol Aspan Patshalıg'ında en' kishi bolıp sanaladı. Al kim de kim olardı orınlap, adamlarg'a u'yretse, ol Aspan Patshalıg'ında ullı bolıp sanaladı.
20 Menin' sizlerge aytatug'ınım: eger sizlerdin' haqlıg'ın'ız diniy mug'allimler menen pariseylerdikinen artıq bolmasa, sizler Aspan Patshalıg'ına kirmeysiz.
21 – «Adam o'ltirme! Kim de kim adam o'ltirse, ol hu'kim etiliwge tiyisli» , – dep burıng'ılarg'a aytılg'andı esitkensiz.
22 Al Menin' sizlerge aytatug'ınım: kim de kim tuwısqanına biykarg'a g'a'zeplense, ol hu'kim etiliwge tiyisli. Kim de kim tuwısqanın masqaralap, og'an: «Aqılsız adamsan'!» dese, joqarg'ı ken'es ta'repinen hu'kim etiliwge tiyisli. Al kim de kim tuwısqanına: «Aqmaq!» dese, dozaq otına tu'siwge tiyisli.
23 Sonlıqtan eger de sen qurbanlıg'ın'dı qurbanlıq shalınatug'ın orıng'a alıp kelgenin'de, jaqın adamın'nın' sag'an o'kpeli ekeni sol jerde esin'e tu'sse,
24 qurbanlıg'ın'dı sol jerdin' aldında qaldırıp, a'weli jaqın adamın'a barıp, onın' menen jarasıp al! Son'ınan qaytıp kelip, qurbanlıg'ın'dı Qudayg'a ber.
25 Sen dawlasın' menen birge hu'kim etiliwge baratırg'an waqtın'da, onın' menen tezirek jarasıp al. Olay etpesen', ol seni qazının' aldına aparadı, qazı seni saqshıg'a tapsırıp, qamatıp taslaydı.
26 Sag'an shının aytaman: son'g'ı tiyinin'di to'lep tawıspag'anın'sha, ol jerden shıg'a almaysan'.
27 – Sizler: «Neke hadallıg'ın buzba!» – degendi esitkensiz.
28 Al Menin' sizlerge aytatug'ınım: kim de kim basqa bir hayalg'a buzıq niyet penen qarasa, ol a'lle qashan-aq, kewlinde onın' menen neke hadallıg'ın buzg'an boladı.
29 Eger seni on' ko'zin' azg'ırsa, onı oyıp tasla. Sebebi pu'tkil denen'nin' dozaqqa tu'skeninen go're, bir mu'shen'nin' joq bolg'anı sag'an jaqsıraq boladı.
30 Eger seni on' qolın' azg'ırsa, onı shawıp tasla. Pu'tkil denen'nin' dozaqqa tu'skeninen go're, bir mu'shen'nin' joq bolg'anı sag'an jaqsıraq boladı.
31 Tag'ı da: «Kim de kim o'z hayalı menen ajıraspaqshı bolsa, og'an talaq xat bersin», – delingen.
32 Al Menin' sizlerge aytatug'ınım: kim de kim neke hadallıg'ın buzbag'an hayalınan ajırassa, hayalının' neke hadallıg'ın buzıwına sebepker boladı. Sonday-aq kim de kim ku'yewinen ajırasqan bir hayaldı alsa, ol neke hadallıg'ın buzadı.
33 – Tag'ı da sizler: «Antın'dı buzba, Quday aldında antın'dı orınla!» – dep burıng'ılarg'a aytılg'andı esitkensiz.
34 Al Menin' sizlerge aytatug'ınım: hesh waqıtta ant ishpe! Aspan menen de ant ishpe, o'ytkeni ol – Qudaydın' taxtı.
35 Jer menen de ant ishpe, sebebi ol – Onın' ayaq basarı. Erusalim menen de ant ishpe, o'ytkeni ol – ullı Patshanın' qalası.
36 O'z basın' menen de ant ishpe, sebebi sen bir tal shashın'dı da ag'arta yamasa qarayta almaysan'.
37 Sizlerdin': «awa» so'zin'iz «awa» yamasa «yaq» so'zin'iz «yaq» bolsın, bunnan basqası shaytannan.
38 – Sizler: «Ko'zge ko'z, tiske tis»*, – degendi esitkensiz.
39 Al Menin' sizlerge aytatug'ınım: jaman adam menen qarsılaspan'lar. Birew betin'nin' on' jag'ına ursa, og'an betin'nin' sol jag'ın da tut.
40 Birew senin' menen dawlasıp ko'ylegin'di alg'ısı kelse, og'an shapanın'dı da sheship ber.
41 Birew seni o'zi menen birge bir shaqırım jer ju'riwge ma'jbu'rlese, onın' menen birge eki shaqırım ju'r.
42 Sennen sorag'ang'a ber, sennen qarızg'a alayın degennen ayama.
43 – Sizler: «Janın'dag'ı adamdı su'y, dushpanın'dı jek ko'r», – degendi esitkensiz.
44 Al Menin' sizlerge aytatug'ınım: dushpanların'ızdı su'yin'ler, sizlerdi quwdalaytug'ınlar ushın duwa etin'ler.
45 Sonda aspandag'ı A'ken'izdin' balaları bolasızlar. O'ytkeni Ol jamanlardın' u'stine de, jaqsılardın' u'stine de, O'z quyashının' nurın to'gedi ha'm haq adamlardın' u'stine de, nahaqlardın' u'stine de, jawının jawdıradı.
46 Eger sizler o'zlerin'izdi su'ygenlerdi g'ana su'ysen'ler, qanday sıylıq alasızlar? Salıqshılar da solay islemey me?
