Matta 4 bob
1 Sonnan son', shaytan sınasın dep, Muxaddes Ruwx İysanı sho'lge alıp bardı.
2 İysa sol jerde qırıq ku'n, qırıq tu'n oraza tutıp, aqırı ash boldı.
3 Sonda azg'ırıwshı shaytan Onın' qasına kelip: – Eger Sen Qudaydın' Ulı bolsan', mına taslarg'a buyır, olar nang'a aylansın! – dedi.
4 İysa juwap qaytarıp: «Adam tek g'ana nan menen emes, Al Qudaydın' awzınan shıqqan Ha'r bir so'z benen jasaydı» , – dep Muxaddes Jazıwda aytılg'an-g'o, – dedi.
5 Sonnan son', shaytan Onı muxaddes qala Erusalimge alıp barıp, İbadatxananın' to'besine turg'ızıp qoydı da,
6 Og'an: – Eger Sen Qudaydın' Ulı bolsan', to'men sekirshi. O'ytkeni Muxaddes Jazıwda bılay dep aytılg'an-g'o: «Ol O'zinin' perishtelerine buyrıq beredi. Ayag'ın'dı tasqa urıp almawın' ushın, olar Seni Qollarında ko'terip alıp ketedi», – dedi.
7 İysa og'an: – «Quday-İyen'di sınama!» – dep te Muxaddes Jazıwda aytılg'an-g'o, – dedi.
8 Ja'ne shaytan Onı ju'da' biyik bir tawg'a aparıp, Og'an du'nyanın' barlıq patshalıqları menen olardın' sa'n-saltanatların ko'rsetip:
9 – Eger ayag'ıma jıg'ılıp, mag'an tabınsan', usılardın' ha'mmesin Sag'an beremen, – dedi.
10 Sonda İysa og'an: – Joq bol ko'zimnen, shaytan! «Quday-İyen'e sıyınıp, Tek Og'an xızmet et!» – dep Muxaddes Jazıwda aytılg'an-g'o, – dedi.
11 Sonnan keyin, shaytan Onın' qasınan ketti. Sonda perishteler kelip, İysag'a xızmet etti.
12 İysa Yaqıyanın' tutqıng'a alıng'anın esitip, Galila u'lkesine qaytıp ketti.
13 Ol Nasıra qalasın qaldırıp, Zebulon ha'm Naftali do'geregindegi ten'izdin' jag'asında jaylasqan Kaparnahumg'a kelip ornalastı.
14 Solay etip, İyshaya payg'ambar arqalı aytılg'an mına so'zler orınlandı:
15 «Ha'y, Zebulon jeri ha'm Naftali jeri, Ten'izge baratug'ın joldag'ı, İordannın' arg'ı jag'asındag'ı, Basqa milletlerdin' Galila eli!
16 Qaran'g'ılıqta jasag'an xalıq U'lken bir jarıqtı ko'rdi. O'lim qaran'g'ısında jasag'anlar ushın, Jaqtılıq nurı tu'sti».
17 Sol waqıttan baslap, İysa: – Ta'wbe etin'ler! Sebebi Aspan Patshalıg'ı jaqınladı! – dep ja'riyalay basladı.
18 İysa Galila ten'izinin' jag'asında ju'rgende, ten'izge aw salıp atırg'an eki ag'alı-inilini: Petr dep atalg'an Simondı ha'm onın' inisi Andreydi ko'rdi. Olar balıqshılar edi.
19 İysa olarg'a: – Menin' izime erin'ler! Men sizlerdi adamlardı Qudaydın' jolına tu'siriwshiler qılaman, – dedi.
20 Olar da'rriw awların taslap, Onın' izine erdi.
21 Sol jerden ketip baratırıp, Ol basqa eki ag'alı-inilini: Zebedeydin' ulı Yaqıptı ha'm onın' inisi Yuxandı ko'rdi. Olar a'kesi Zebedey menen birge qayıqta awların jamap otırg'an edi. İysa olardı da shaqırdı.
22 Olar da'rriw qayıqtı da, a'kesin de qaldırıp, Onın' izine erdi.
23 İysa pu'tkil Galila u'lkesin aralap ju'rdi. Olardın' ma'jilisxanalarında ta'lim berdi ha'm Aspan Patshalıg'ı tuwralı Xosh Xabardı ja'riyalap, xalıqtag'ı ha'r qanday awırıw ha'm ha'lsizlikti shıpalaytug'ın edi.
24 İysa tuwralı xabar pu'tkil Siriyag'a jayıldı. Barlıq awırıw adamlardı, tu'rli sırqaw ha'm da'rtke ushırag'anlardı, jin urg'anlardı, qoyanshıq ha'm la'n' bolg'anlardı Og'an alıp keldi. İysa olarg'a shıpa berdi.
25 Onın' izine Galiladan, Dekapolisten, Erusalimnen, Yahudiyadan ha'm İordannın' arg'ı jag'ınan kelgen ko'p xalıq erip ju'rdi.
