Matta 3 bob

Shomıldırıwshı Yaqıyanın' Xosh Xabardı ja'riyalawı (1-12),ysanın' shomıldırılıwı (13-17).

¹ Sol ku'nleri Shomıldırıwshı Yaqıya kelip, Yahudiya u'lkesinin' sho'l dalasında:

² – Ta'wbe etin'ler! O'ytkeni Aspan Patshalıg'ı jaqınlap qaldı, – dep ja'riyaladı.

³ İyshaya payg'ambar arqalı mınaday dep aldın ala aytılg'an adam usı Yaqıya edi: «Sho'l dalada baqırg'an birewdin' dawısı shıg'adı: „İyemizge jol tayarlan'lar, Onın' ju'retug'ın jolların du'zetin'ler!“»

⁴ Yaqıya tu'yenin' ju'ninen kiyim kiygen, belin teri qayıs penen buwg'an bolıp, onın' awqatı shegirtke menen jabayı ha'rrenin' palı edi.

⁵ Sol waqıtta Erusalimnin', pu'tkil Yahudiya u'lkesinin' ha'm İordannın' pu'tkil do'gereginin' turg'ınları og'an bardı

⁶ ha'm o'zlerinin' gu'naların moyınlap, İordan da'ryasında shomıldırıldı.

⁷ Yaqıya o'zine ko'p pariseyler menen saddukeylerdin' shomıldırılıwg'a kiyatırg'anın ko'rip, olarg'a: – Ha'y, uwlı jılanlardın' tuqımları! Keleshektegi qa'ha'rli jazadan qutılıwdı sizlerge kim u'yretti?

⁸ Ta'wbe etkenin'izge ılayıq jemis berin'ler!

⁹ Ja'ne: «Bizlerdin' ata tegimiz – İbrayım ata-g'o!» – dep ishlerin'izden oylaman'lar. Sebebi sizlerge aytatug'ınım: Quday İbrayımg'a mına taslardan da balalar jasap bere aladı.

¹⁰ Tereklerdin' tamırında ha'zirdin' o'zinde-aq balta jatır. Jaqsı miywe bermeytug'ın ha'r bir terek shabılıp, otqa taslanadı.

¹¹ Ta'wbe etkenin'izdin' belgisi retinde, men sizlerdi suw menen shomıldıraman. Biraq mennen keyin Keliwshi mennen de qu'diretli: men Onın' ayaq kiyimin sheshiwge de ılayıqlı emespen. Ol sizlerdi Muxaddes Ruwx ha'm ot penen shomıldıradı.

¹² Onın' jabası qolında. Ol O'z qırmanın tazalap, biydayın g'a'llexanasına jıynaydı, al sabanın so'nbes otqa jandıradı, – dedi.

¹³ Sonda İysa Yaqıya ta'repinen shomıldırılıw ushın Galiladan İordan da'ryasına, Yaqıyanın' qasına keldi.

¹⁴ Biraq Yaqıya Onı irkip: – Senin' qolın'nan shomıldırılıwg'a men mu'ta'jben-g'o! Sen nege mag'an kiyatırsan'? – dedi.

¹⁵ Biraq, İysa og'an juwap berip: – Endi ırazı bol, pu'tkil haqlıqtı bizler usılayınsha orınlawg'a tiyislimiz-g'o, – dedi. Sonnan son', Yaqıya Og'an qayılshılıq berdi.

¹⁶ İysa shomıldırılıp, da'rriw suwdan shıqtı. Mine, aspan ashılıp, Ol Qudaydın' Ruwxının' O'zinin' u'stine kepterdey tu'sip kiyatırg'anın ko'rdi.

¹⁷ Sonda aspannan: – Bul – Menin' su'yikli Ulım, Men Og'an ırzaman! – degen saza esitildi.