Matta 28 bob
1 Yahudiylerdin' dem alıs ku'ni o'tkennen son', ekshembi ku'ni tan' sa'ha'rde magdalalı Ma'riyam ha'm basqa Ma'riyam qa'birdi ko'riwge keldi.
2 Birden jer qattı silkinip, Qudaydın' perishtesi aspannan tu'sip keldi de, qa'birdin' awzındag'ı tastı domalatıp alıp taslap, onın' u'stine otırdı.
3 Perishtenin' tu'si jıldırımday bolıp, kiyimi qarday appaq edi.
4 Saqshılar onnan qattı qorqıp qaltırastı ha'm o'li sıyaqlı bolıp, janı qalmadı.
5 Perishte hayallarg'a: – Qorqpan'lar! Atanaq ag'ashqa shegelengen İysanı izlep kelgenlerin'izdi bilemen.
6 Ol bul jerde joq. O'zinin' aytqanınday, Ol qayta tirildi. Barıp, Onın' jatqan jerin ko'rin'ler.
7 Ha'zir tez Onın' sha'kirtlerine barıp: «İysa o'limnen qayta tirilipti! Ol sizlerden burın Galilag'a baradı. Onı sol jerde ko'resizler!» – dep aytıp barın'lar. Menin' sizlerge aytatug'ınım usı, – dedi.
8 Hayallar birese qorqısıp, birese qattı quwanısıp, qa'birden tez shıqtı da, Onın' sha'kirtlerine xabardı jetkiziw ushın asıg'ıp juwırıp ketti.
9 Ku'tilmegende İysa olardın' aldınan shıg'ıp: – Assalawma a'leykum! – dedi. Olar jaqınlap keldi de, İysanın' ayag'ın qushaqlap, Og'an tabındı.
10 Sonda İysa olarg'a: – Qorqpan'lar! Menin' tuwısqanlarıma barıp aytın'lar, Galilag'a barsın. Olar Meni sol jerde ko'redi, – dedi.
11 Hayallar jolda ju'rgende saqshılardın' geybirewleri qalag'a barıp, bolg'an waqıyanın' barlıg'ın bas ruwxaniylerge aytıp berdi.
12 Bas ruwxaniyler aqsaqallar menen jıynalısıp ken'esti de, a'skerlerge ko'p aqsha berip:
13 – «Tu'nde bizler uyıqlap atırg'anımızda sha'kirtleri kelip, Onı urlap alıp ketti», – dep aytın'lar.
14 Eger bul xabar ha'kimnin' qulag'ına jetse, bizler onın' menen kelisip, sizlerdi ha'r qanday ba'leden saqlap qalamız, – dedi.
15 A'skerler aqshanı alıp, olardın' u'yretiwi boyınsha isledi. Al usı so'z yahudiylerdin' arasında bu'gingi ku'nge deyin ken' tarqalg'an.
16 On bir sha'kirti Galilag'a, İysanın' o'zlerine aytqan tawına bardı.
17 Olar İysanı ko'rgende, Og'an tabındı, biraq geybirewleri gu'manlandı.
18 Sonda İysa olardın' qasına kelip: – Mag'an aspanda da, jerde de pu'tkil biylik berilgen.
19 Sonlıqtan da barıp, barlıq milletlerdi Mag'an sha'kirt qılın'lar: olardı A'kenin', Uldın' ha'm Muxaddes Ruwxtın' atı menen shomıldırıp,
20 Menin' sizlerge buyırg'anlarımnın' ha'mmesin orınlawdı olarg'a u'yretin'ler. Minekey, Men du'nyanın' aqırına deyin ha'mme waqıt sizler menen birge bolaman! – dedi.
