Matta 26 bob
1 İysa usı so'zlerdin' ha'mmesin aytıp bolg'annan keyin, O'z sha'kirtlerine:
2 – Endi eki ku'nnen son', Qutqarılıw bayramı bolatug'ının bilesizler. Sonda Adam Ulı atanaq ag'ashqa shegeleniwge uslap beriledi, – dedi.
3 Sol waqıtta bas ruwxaniyler ha'm xalıq aqsaqalları Kayafa degen bas ruwxaniydin' ha'wlisine jıynaldı.
4 Olar İysanı hiyle menen qolg'a tu'sirip alıp o'ltiriw haqqında til biriktirdi.
5 Biraq olar: «Xalıq arasında qozg'alan' bolmawı ushın, bul isti bayram ku'nleri islemeyik», – desti.
6 İysa Betaniyada, burın maqaw kesel bolg'an Simonnın' u'yinde
7 dasturxan basında otırg'anda, qolında qımbatlı a'tir mayg'a tolg'an ma'rmer ıdısı bar bir hayal Onın' qasına kelip, a'tir maydı Onın' basına quydı.
8 Bunı ko'rgen sha'kirtleri ashıwlanıp: – Bunday ısırapkershiliktin' nege keregi bar?
9 Bul a'tir maydı qımbatqa satıp, aqshasın jarlılarg'a u'lestiriwge bolar edi-g'o, – desti.
10 Biraq İysa bunı esitip, olarg'a: – Bul hayaldı nege uyaltıp atırsızlar? Ol Mag'an jaqsılıq isledi-g'o.
11 Jarlılar sizler menen ba'rqulla birge, al Men sizler menen ba'rqulla birge bolmayman.
12 Ol bul a'tir maydı deneme quyıp, Meni jerlewge tayarladı.
13 Sizlerge shının aytıp turman: Xosh Xabar du'nyanın' qay jerinde ja'riyalansa da, bul hayal eske alınıp, onın' islegen isi aytılatug'ın boladı, – dedi.
14 Son'ınan İysanın' on eki sha'kirtinin' biri bolg'an Yahuda İsqariot dep atalg'an adam bas ruwxaniylerge barıp:
15 – İysanı sizlerge uslap bersem, mag'an ne beresizler? – dep soradı. Olar og'an otız gu'mis ten'ge usındı.
16 Yahuda da sol waqıttan baslap İysanı uslap beriwge qolaylı payıt izledi.
17 Ashıtqısız nan bayramının' birinshi ku'ninde İysanın' sha'kirtleri Og'an kelip: – Qutqarılıw bayramının' asın jewin' ushın qay jerde tayarlıq ko'riwimizdi qa'leysen'? – dep soradı.
18 Ol juwap berip bılay dedi: – Qaladag'ı pa'lenshe degen adamg'a barıp, og'an: «Ustazımız: „Menin' ku'nim jaqınlap qaldı. Sha'kirtlerim menen birge bayram awqatın senin' u'yin'de jeymen“, dedi», – dep aytın'lar.
19 Sha'kirtleri İysanın' tapsırg'anın islep, bayram awqatın tayarladı.
20 Kesh bolg'anda, İysa on eki sha'kirti menen birge dasturxan a'tirapına otırdı.
21 Olar awqatlanıp otırg'anda, İysa olarg'a: – Sizlerge shının aytıp turman: aran'ızdag'ı birin'iz Mag'an satqınlıq isleydi, – dedi.
22 Sonda olar qattı qapa bolıp, birinen son' biri Onnan: – Men emespen be, İyem? – dep soray basladı.
23 İysa olarg'a juwap berip: – Menin' menen birge tabaqqa qolın salg'annın' o'zi Mag'an satqınlıq isleydi.
24 Degen menen, Adam Ulı O'zi haqqında Muxaddes Jazıwda aytılg'anday baratır, biraq Adam Ulına satqınlıq qılıwshı ha'siret shegedi! Ol adamnın' bul du'nyag'a kelmegeni o'zi ushın jaqsıraq bolar edi, – dedi.
25 Sonda Og'an satqınlıq qılatug'ın Yahuda: – Men emespen be, Ustaz? – dedi. İysa og'an: – Bunı sen o'zin' ayttın', – dep juwap berdi.
26 Olar awqatlanıp otırg'anda İysa nandı alıp, Qudayg'a shu'kirlik etti ha'm onı sındırıp, sha'kirtlerine berdi de: – Alın'lar, jen'ler, bul – Menin' denem, – dedi.
27 Son'ınan Ol keseni qolına alıp, Qudayg'a shu'kirlik etti ha'm olarg'a keseni berip bılay dedi: – Ha'mmen'iz bunnan ishin'ler!
28 Sebebi bul – ko'p adamnın' gu'nalarının' keshiriliwi ushın to'giletug'ın, Jan'a Kelisimdi bekitetug'ın Menin' qanım.
29 Sizlerge aytatug'ınım: A'kemnin' Patshalıg'ında sizler menen jan'asın ishetug'ın ku'nime deyin, Men bunday ju'zim ishimliginen qaytıp ishpeymen.
30 Son'ınan olar Qudaydı jırlaytug'ın qosıq aytıp, Za'ytu'n tawına ketti.
31 Sonda İysa olarg'a: – Bul tu'ni ha'mmen'iz Meni taslap ketesizler. O'ytkeni Muxaddes Jazıwda bılay dep aytılg'an: «Shopandı urg'anımda, Su'riwdegi qoylar tarqap ketedi».
32 Biraq qayta tirilgenimnen keyin, sizlerden burın Galilag'a baraman, – dedi.
33 Petr Og'an juwap berip: – Seni ha'mmesi taslap ketse de, men Seni hesh qashan taslap ketpeymen, – dedi.
34 İysa og'an: – Sag'an shının aytıp turman: bu'gin tu'nde qoraz shaqıraman degenshe, sen Mennen u'sh ret tanasan', – dedi.
35 Petr Og'an: – Mag'an Senin' menen birge o'liwge tuwra kelse de, men Sennen hesh qashan tanbayman, – dedi. Basqa sha'kirtlerinin' ha'mmesi de solay dedi.
36 Son'ınan İysa sha'kirtleri menen birge Getsemani degen jerge kelip, olarg'a: – Men ana jerge barıp duwa etip bolaman degenshe, sizler usı jerde otırın'lar, – dedi.
37 O'zi menen birge Petrdi ha'm Zebedeydin' eki ulın alıp ketti de, qayg'ırıp qıynala basladı.
38 Sonda İysa olarg'a: – Janım o'lerdey qıynalıp tur. Sizler usı jerde qalıp, Menin' menen birge sergek bolıp turın'lar, – dedi.
39 Son'ınan Ol biraz shetirek bardı da, betin jerge basıp, bılay dep duwa ete basladı: – A'kem Menin'! Eger de mu'mkin bolsa, bul azap kesesi Mennen o'tsin. Biraq Menin' emes, Senin' qa'lewin' bolsın!
40 Sha'kirtlerinin' qasına qaytıp kelip, olardın' uyıqlap atırg'anın ko'rdi de, Petrge: – Solay etip, sizler Menin' menen birge uyıqlamay bir saat ta otıra almadın'lar ma?
41 Azg'ırılmawın'ız ushın sergek bolıp, duwa etin'ler! Ruwx qa'leydi, biraq dene ha'lsiz, – dedi.
42 İysa ekinshi ret barıp, ja'ne bılay dep duwa etti: – A'kejanım! Eger bul azap kesesi Men ishpey Mennen o'te almasa, onda Senin' erkin' orınlansın.
43 Qaytıp kelip, olardın' ja'ne uyıqlap atırg'anın ko'rdi. O'ytkeni ko'zlerin uyqı basqan edi.
44 Olardı qaldırıp, ja'ne barıp, u'shinshi ret te sol so'zlerin qaytalap duwa etti.
45 Son'ınan sha'kirtlerinin' qasına qaytıp kelip, olarg'a: – Sizler ele uyıqlap, dem alıp atırsızlar ma? Mine, waqıt boldı, Adam Ulı gu'nakarlardın' qolına uslap beriledi
46 Turın'lar, kettik. Qaran'lar, Mag'an satqınlıq qılıwshı jaqınladı, – dedi.
47 İysa ele so'ylep turg'anda, on ekinin' biri Yahuda keldi. Onın' menen birge bas ruwxaniyler ha'm xalıq aqsaqalları jibergen ju'da' ko'p adamlar bar edi. Adamlar qollarına qılısh ha'm shoqmar uslag'an edi.
48 İysag'a satqınlıq qılıwshı olarg'a belgi berip: «Men kimdi su'ysem, Ol – Sonın' O'zi. Onı qolg'a alın'lar», – degen edi.
49 Ol da'rriw İysanın' qasına barıp: – Assalawma a'leykum, Ustaz! – dep Onı su'ydi.
50 İysa og'an: – Ha'y, dostım, nege keldin'? – dedi. Sonda olar İysag'a jaqınlap keldi de, Og'an qol salıp uslap aldı.
51 Sol waqıtta-aq İysa menen birge bolg'anlardın' birewi qılıshın suwırıp alıp, bas ruwxaniydin' qulının' qulag'ın shawıp tasladı.
52 Biraq İysa og'an: – Qılıshın'dı qınabına salıp qoy! Qılısh ko'teriwshilerdin' ha'mmesi de qılıshtan qaza tabadı.
53 Sen eger Men ha'zir A'kemnen sorasam, Ol Mag'an on eki legionnan da artıq perishte jibermeydi, dep oylaysan' ba?
54 Biraq eger onday bolsa, Muxaddes Jazıwlardag'ı solay bolıwı tiyis degen so'zler qalayınsha orınlanar edi? – dedi.
55 Sonda İysa xalıqqa: – Meni uslaw ushın, jınayatshıg'a qarsı shıqqanday bolıp, qılısh ha'm shoqmar alıp keldin'ler me? Men ha'r ku'ni İbadatxanada otırıp ta'lim beretug'ın edim, biraq sizler Meni uslamadın'lar.
56 Usılardın' ha'mmesi payg'ambarlardın' Jazıwlarının' orınlanıwı ushın boldı, – dedi. Sonda sha'kirtlerinin' ha'mmesi Onı taslap, qashıp ketti.
57 İysanı qolg'a alg'anlar Onı Kayafa degen bas ruwxaniyge apardı. Ol jerge diniy mug'allimler menen aqsaqallar jıynalg'an edi.
58 Bas ruwxaniyler ha'm pu'tkil joqarg'ı ken'es İysanı o'lim jazasına hu'kim etiw ushın, Og'an qarsı jalg'an gu'walıq izledi.
59 Bas ruwxaniyler ha'm pu'tkil joqarg'ı ken'es İysanı o'lim jazasına hu'kim etiw ushın, Og'an qarsı jalg'an gu'walıq izledi.
60 Ko'plegen jalg'an gu'walar kelse de, taba almadı. Aqırında eki jalg'an gu'wa kelip:
61 – Ol: «Qudaydın' İbadatxanasın buzıp, Onı u'sh ku'nnin' ishinde qayta tikley alaman», – dep ayttı, – dedi.
62 Sonda Стих 56 Содержимое стиха Стих 57 Содержимое стиха Стих 58 Содержимое стиха Стих 59bas ruwxaniy ornınan turıp, İysadan: – Olar Sag'an qarsı gu'walıq berip atır-g'o. Sen nege hesh juwap bermeysen'? – dep soradı.
63 Biraq İysa u'ndemedi. Sonda bas ruwxaniy Og'an: – Men Sag'an tiri Qudaydın' atı menen buyıraman. Bizlerge aytshı: Qudaydın' Ulı, Masix – Senbisen'? – dep soradı.
64 İysa og'an: – O'zin' ayttın'. Sizlerge aytatug'ınım: usı waqıttan baslap, sizler Adam Ulının' Qu'diretlinin' on' jag'ında otırg'anın ha'm aspandag'ı bultlardın' u'stinde kiyatırg'anın ko'resizler, – dedi.
65 Sonda bas ruwxaniy o'z kiyimlerin jırtıp: – Ol Qudayg'a til tiygizdi-g'o! Endi bizlerge gu'walardın' nege keregi bar? Sizler ha'zir Onın' Qudayg'a til tiygizgenin o'zlerin'iz esittin'iz-g'o!
66 Sizlerdin' hu'kimin'iz qanday boladı? – dep soradı. Olar juwap qaytarıp: – Ol o'lim jazasına tartılıwı tiyis, – dedi.
67 Sonda olar Onın' betine tu'kirip, Onı ura basladı. Birewler betine shapalaq penen urıp,
68 Og'an: – Ha'y, Masix! Bizlerge wa'liylik etip ayt: Seni kim urdı? – dedi.
69 Sol waqıtta Petr sırtta, ha'wlide otırg'an edi. Onın' qasına bir shorı qız kelip: – Sen de galilalı İysa menen birge edin'-g'o, – dedi.
70 Biraq ol ha'mmenin' aldında tanıp: – Senin' ne aytıp turg'anın'dı tu'sinbeymen, – dedi.
71 Ol da'rwazag'a qaray baratırg'anda onı basqa bir shorı qız ko'rip, sol jerdegilerge: – Mına adam Nasıralı İysa menen birge bolg'an-g'o, – dedi.
72 Ol ant iship: – Men ol Adamdı tanımayman, – dep ja'ne tandı.
73 Birazdan keyin, sol jerde turg'anlar Petrge jaqınlap kelip, og'an: – Shınında da, sen solardın' birisen'. Bul senin' so'ylegenin'nen anıq bilinip tur-g'o, – dedi.
74 Sonda Petr: – Shının aytıp turman, men ol Adamdı tanımayman, – dep ant iship, o'zin o'zi g'arg'ay basladı. Sol waqıtta-aq qoraz shaqırdı.
75 Sonda İysanın': «Qoraz shaqıraman degenshe, sen Mennen u'sh ret tanasan'», – degen so'zi Petrdin' esine tu'sti. Ol sırtqa shıg'ıp ketip, o'kirip jıladı.
