Matta 24 bob
1 İysa İbadatxanadan shıg'ıp baratırg'anda, sha'kirtleri Og'an İbadatxananın' imaratların nusqap ko'rsetiw ushın qasına keldi.
2 Sonda İysa olarg'a: – Mınalardın' ba'rin ko'rip tursızlar ma? Sizlerge shının aytıp turman: bul jerde tas u'stinde tas qalmaydı, ha'mmesi qıyratıladı, – dedi.
3 Sonnan son', Ol Za'ytu'n tawında otırg'anda sha'kirtleri awlaqta Onın' qasına kelip: – Ustaz, bunın' qashan bolatug'ının bizlerge aytıp ber. Senin' keliwin'di ha'm usı zamannın' aqırın qanday belgi bildiredi? – dep soraw qoydı.
4 İysa olarg'a bılay dep juwap berdi: – Birewlerdin' sizlerdi aldawınan saq bolın'lar!
5 Sebebi ko'pler Menin' atım menen kelip: «Men – Masixpan» dep, ko'p adamlardı aldaydı.
6 Sizler urıslardın' shawqımın ha'm urıslar haqqında mıshmıshlardı esitkende qa'weterlenben'ler. Bulardın' bolıwı sha'rt, biraq bul ele aqırı emes.
7 O'ytkeni millet milletke qarsı, patshalıq patshalıqqa qarsı ko'teriledi, ko'p jerlerde asharshılıqlar ha'm jer silkiniwler boladı.
8 Al bulardın' ha'mmesi tolg'aq azabının' baslanıwınday boladı.
9 Sonda sizlerdi qıynawg'a uslap beredi ha'm o'ltiredi. Menin' atım ushın barlıq xalıqlar sizlerdi jek ko'redi.
10 Sonda ko'p adamlar isenimnen qaytadı, bir-birine satqınlıq islep, bir-birin jek ko'redi.
11 Ko'plegen jalg'an payg'ambarlar payda bolıp, ko'p adamlardı aldaydı.
12 Jawızlıq ko'beygenlikten, ko'p adamlardın' su'yispenshiligi suwıydı.
13 Biraq, aqırına deyin shıdag'an qutqarıladı.
14 Aspan Patshalıg'ı tuwralı Xosh Xabar pu'tkil jer ju'zine ja'riyalanıp, barlıq xalıqlarg'a gu'walıq boladı. Sonnan keyin, usı zamannın' aqırı keledi.
15 – Al Daniel payg'ambar aldın ala aytqan wayran etiwshi jerkenishlinin' muxaddes orında turg'anın ko'rgenin'izde* (oqıg'an adam ma'nisin tu'sinsin!),
16 Yahudiyadag'ılar tawlarg'a qashsın.
17 Kim de kim u'yinin' to'besinde bolsa, u'yinen bir na'rse alayın dep to'menge tu'spesin.
18 Kim de kim atızda bolsa, shapanın alayın dep izine qaytpasın.
19 Sol ku'nleri ju'kli ha'm emiziwli hayallarg'a qanday qıyın boladı!
20 Qashatug'ın waqıtların'ız qıs ma'wsimine yamasa dem alıs ku'nine tuwra kelmesin dep, Qudayg'a duwa etin'ler.
21 Sebebi sonda du'nya jaratılg'annan beri usı ku'nge deyin bolmag'an ha'm qaytıp bolmaytug'ın ullı apat boladı.
22 Eger sol ku'nlerdin' sanı qısqartılmag'anda, hesh kim de qutqarılmag'an bolar edi, biraq Quday O'zinin' tan'lap alg'an adamları ushın, sol ku'nlerdin' sanın qısqartadı.
23 Sonda eger sizlerge birew: «Qaran'lar, Masix bul jerde!» yamasa: «Ol ana jerde» dese isenben'ler.
24 O'ytkeni jalg'an masixlar ha'm jalg'an payg'ambarlar payda bolıp, eger mu'mkin bolsa, Qudaydın' tan'lap alg'anların da aldaw ushın, ullı ka'ramatlı belgiler ha'm tan' qalarlıq islerdi ko'rsetedi.
25 Dıqqat etin'ler! Men sizlerge aldın ala aytıp atırman.
26 Solay etip, eger sizlerge: «Mine, Ol sho'listanda!» dese, shıqpan'lar yamasa: «Ol jasırın bo'lmelerde» dese, isenben'ler.
27 Sebebi Adam Ulının' keliwi shıg'ısta payda bolıp, aspan boylap batısqa zuwlap o'tken jıldırımday boladı.
28 O'lik qay jerde bolsa, quzg'ınlar sol jerge jıynaladı.
29 – Sol ku'nlerdin' apatınan son', «Birden ku'n qaran'g'ılanadı, Ay o'z jaqtısın tu'sirmeydi, Juldızlar aspannan tu'sip, Aspan ku'shleri silkinedi».
30 Sonda aspanda Adam Ulının' ka'ramatlı belgisi ko'ringende, jer ju'zindegi barlıq xalıqlar jılay baslaydı. Olar Adam Ulının' ullı qu'diret ha'm saltanat penen aspandag'ı bultlarda kiyatırg'anın ko'redi.
31 Ka'rnaydın' ku'shli dawısı menen Ol O'zinin' perishtelerin jiberedi ha'm olar du'nyanın' to'rt ta'repinen, aspannın' bir shetinen baslap ekinshi shetine deyin, Onın' tan'lap alg'anların jıynap keledi.
32 – A'njir ag'ashın mısalg'a alın'lar: onın' shaqaları jumsarıp, japıraq shıg'ara baslag'anda, jazdın' jaqın ekenin bilesizler.
33 Sol sıyaqlı, sizler usılardın' ha'mmesin ko'rgenin'izde Adam Ulının' jaqınlap, esik aldında turg'anın bilin'ler!
34 Sizlerge shının aytıp turman: bul a'wlad joyılıp ketpesinen burın usılardın' ha'mmesi boladı.
35 Aspan menen jer joyıladı, biraq Menin' so'zlerim hesh qashan joyılmaydı.
36 – Biraq, sol ku'ndi ha'm sol saattı hesh kim de bilmeydi: aspandag'ı perishteler de, Uldın' O'zi de, tek g'ana A'kem biledi.
37 Nuxtın' zamanında qalay bolg'an bolsa, Adam Ulı kelgende de solay boladı.
38 O'ytkeni suw tasqınınan burın, Nux kemege mingen ku'nge deyin, adamlar iship jedi, u'ylendi, turmısqa shıqtı.
39 Suw tasqını basıp, ba'rin qırıp joyg'ang'a deyin, olar an'g'armadı. Adam Ulı kelgende de solay boladı.
40 Sol waqıtta eki adam atızda bolsa, birewi alınıp, ekinshisi qaldırıladı.
41 Eki hayal digirman tartıp otırsa, birewi alınıp, ekinshisi qaldırıladı.
42 Solay etip, sergek bolın'lar! Sebebi İyen'izdin' qashan keletug'ının bilmeysizler.
43 Mınanı bilip qoyın'lar: eger u'y iyesi urının' tu'nnin' qaysı waqtında keletug'ının bilse uyıqlamay, u'yine urının' buzıp kiriwine mu'mkinshilik bermegen bolar edi.
44 Sonlıqtan sizler de tayar bolıp turıwın'ız sha'rt! O'ytkeni Adam Ulı sizler oylamag'anda keledi.
45 İyesi u'y-ishimdegilerdi basqarsın ha'm olarg'a waqtında awqatın bersin dep tayınlag'an isenimli ha'm aqıllı xızmetshi kim?
46 İyesi kelgende onın' solay islep atırg'anın ko'rse, sol xızmetshi baxıtlı!
47 Sizlerge shının aytıp turman: iyesi onı o'zinin' pu'tkil mal-mu'lkin basqarıwshı etip tayınlaydı.
48 Al eger sol xızmetshi jaman bolıp, ishinen: «İyem tez kele qoymas», – dep oylap,
49 xızmetshi joldasların sabap, ma'sku'nemler menen birge iship-jese,
50 sonda sol xızmetshinin' iyesi ku'tpegen ku'ni ha'm oylamag'an waqıtta kelip,
51 onı qattı jazalap, eki ju'zlilerdin' awhalına saladı. Sol jerde ol jılap, pushayman jeydi.
