Matta 23 bob

İysanın' diniy mug'allimler menen pariseylerdi ayıplawı (1-28),Jazaların'ızdı tartasızlar! (29-36),İysanın' Erusalim tuwralı qayg'ırıwı (37-39).

¹ Sonda İysa xalıqqa ha'm O'zinin' sha'kirtlerine bılay dedi:

² – Muwsanın' orınlıg'ına diniy mug'allimler menen pariseyler otırdı.

³ Sonlıqtan olardın' sizlerge aytqanlarının' ha'mmesin de orınlan'lar. Biraq, olardın' islegenin islemen'ler. Sebebi olar aytadı, biraq aytqanların o'zleri islemeydi.

⁴ Olar ko'tere almaytug'ın awır ju'klerdi baylap, adamlardın' iyinlerine ju'kleydi. Al o'zleri olardı barmag'ı menen de qozg'ag'ısı kelmeydi.

⁵ Olar barlıq islerin adamlardın' ko'zine tu'siw ushın g'ana isleydi. Man'laylarına ishlerinde Muxaddes Nızam ayatları jazılg'an qutıların u'lken etip baylap, kiyimlerinin' shashaqların uzın etip qoyadı.

⁶ Olar toylarda to'rde, ma'jilisxanalarda sıylı orında otırıwdı jaqsı ko'redi.

⁷ Bazarda adamlardın' o'zlerine sıylap sa'lem beriwin ha'm o'zlerin «ustaz» dep atawın unatadı.

⁸ Al sizler o'zlerin'izdi «ustaz» dep atatpan'lar, o'ytkeni sizlerdin' jalg'ız-aq Ustazın'ız bar. Sizlerdin' ba'rin'iz bir-birin'izge tuwısqansız.

⁹ Jer ju'zinde hesh kimdi de «a'ke» dep ataman'lar, o'ytkeni sizlerdin' jalg'ız-aq A'ken'iz bar, Ol aspanda.

¹⁰ O'zlerin'izdi «jolbasshı» dep te atatpan'lar, sebebi sizlerdin' jalg'ız-aq jolbasshın'ız bar, Ol – Masix.

¹¹ Aran'ızdag'ı en' ullın'ız sizlerdin' xızmetshin'iz bolsın.

¹² O'ytkeni kim de kim o'zin joqarı tutsa, ol pa'sletiledi, kim de kim o'zin pa's tutsa, ol joqarı boladı.

¹³ Ha'siret shegesizler, diniy mug'allimler ha'm pariseyler, eki ju'zliler!

¹⁴ Sebebi sizler adamlarg'a Aspan Patshalıg'ının' esigin jabasızlar. O'zlerin'iz de kirmeysizler, kirgisi kelgenlerdi de kirgizbeysizler.

¹⁵ Ha'siret shegesizler, diniy mug'allimler ha'm pariseyler, eki ju'zliler! Sizler o'z dinin'izge bir adamdı bolsa da engiziw ushın ten'izdi de, qurg'aqlıqtı da aylanıp shıg'asızlar. Eger birew engen bolsa, onı o'zlerin'izden de eki ese jaman dozaqı qılasızlar.

¹⁶ Ha'siret shegesizler, soqır jetelewshiler! Sizler bılay deysizler-g'o: «Kim de kim İbadatxana menen ant etse, ol antın orınlawg'a minnetli emes, al kim de kim İbadatxanadag'ı altın menen ant etse, ol antın orınlawg'a minnetli».

¹⁷ Ha'y, aqılsız soqırlar! Qaysısı ullıraq: altın ba yamasa altındı muxaddes qılatug'ın İbadatxana ma?

¹⁸ Ja'ne de: «Kim de kim qurbanlıq shalınatug'ın orın menen ant etse, ol antın orınlawg'a minnetli emes, al kim de kim onın' u'stindegi qurbanlıq penen ant etse, ol antın orınlawg'a minnetli», – deysizler.

¹⁹ Ha'y, soqırlar! Qaysısı ullıraq: qurbanlıq pa yamasa qurbanlıqtı muxaddes qılatug'ın qurbanlıq shalınatug'ın orın ba?

²⁰ Solay etip, qurbanlıq shalınatug'ın orın menen ant etiwshi adam orın menen de, orınnın' u'stindegilerdin' ha'mmesi menen de ant etken boladı.

²¹ İbadatxana menen ant etiwshi adam İbadatxana menen de, onda jasaytug'ın Quday menen de ant etken boladı.

²² Aspan menen ant etiwshi adam Qudaydın' taxtı menen de, onın' u'stinde otırg'an Quday menen de ant etken boladı.

²³ Ha'siret shegesizler, diniy mug'allimler ha'm pariseyler, eki ju'zliler! Sizler jalbız, anis, ziyre sıyaqlı o'simliklerdin' onnan birin Qudayg'a beresizler, biraq Muxaddes Nızamdag'ı en' baslılarına: a'dillikke, miyrimsha'pa'a'tke ha'm sadıqlıqqa kewil bo'lmeysizler. Bunı da islep, onı da qaldırmawın'ız kerek edi-g'o.

²⁴ Ha'y, shirkeydi su'zip taslap, tu'yeni jutatug'ın soqır jetelewshiler!

²⁵ Ha'siret shegesizler, diniy mug'allimler ha'm pariseyler, eki ju'zliler! Sizler tabaq-keselerdin' sırtın tazalaysızlar, biraq olardın' ishi na'psiqawlıq ha'm ju'wensizlikke tolg'an-g'o.

²⁶ Ha'y, soqır parisey! Sen da'slep tabaqkesenin' ishin tazala, sonda olardın' sırtı da taza boladı.

²⁷ Ha'siret shegesizler, diniy mug'allimler ha'm pariseyler, eki ju'zliler! Sizler ha'klengen qa'birlerge uqsaysızlar: olar sırtınan sulıw bolıp ko'rinse de, ishi o'liklerdin' su'yekleri menen pataslıqqa tolg'an-g'o.

²⁸ Sol sıyaqlı sizler de sırtın'ızdan adamlarg'a o'zlerin'izdi haq adam etip ko'rsetesizler, biraq ishlerin'iz eki ju'zlilik penen jawızlıqqa tolı.

²⁹ – Ha'siret shegesizler, diniy mug'allimler ha'm pariseyler, eki ju'zliler! Sizler payg'ambarlarg'a mazarlar ornatasızlar. Haq adamlardın' esteliklerin bezep:

³⁰ «Eger de ata-babalarımızdın' zamanında o'mir su'rgenimizde, payg'ambarlardın' qanın to'giwlerine olarg'a sherikles bolmas edik», – deysizler.

³¹ Solay etip, o'zlerin'izdin' payg'ambarlardı o'ltirgenlerdin' urpag'ı ekenligin'izdi da'lilleysizler.

³² Ata-babaların'ızdın' islegen gu'nalarının' mo'lsherin tolıqtıra berin'ler!

³³ Jılanlar, uwlı jılanlardın' tuqımları! Sizler qalay etip dozaq jazasınan qashıp qutılmaqshısızlar?

³⁴ Sol sebepli Men sizlerge payg'ambarlardı, danalardı, diniy mug'allimlerdi jiberemen. Sizler olardın' geybirewlerin o'ltiresizler, geybirewlerin atanaq ag'ashqa shegeleysizler, basqaların ma'jilisxanaların'ızda qamshılap, qaladan-qalag'a quwdalaysızlar.

³⁵ Solay etip, haq Abıldın' qanınan baslap, İbadatxanadag'ı Muxaddesxana menen qurbanlıq shalınatug'ın orınnın' arasında sizler o'ltirgen Baraqiyanın' ulı Zekeriyanın' qanına deyin, jer betinde to'gilgen haq adamlardın' qanlarının' ba'ri de sizlerdin' moyınların'ızg'a ju'klenedi.

³⁶ Sizlerge shının aytıp turman: bulardın' ha'mmesi ushın usı a'wlad jazag'a tartıladı.

³⁷ – Oh, Erusalim, Erusalim! Payg'ambarlardı o'ltiriwshi, Qudaydın' sag'an jibergenlerin tas penen urıwshı qala! O'z sho'jelerin qanatının' astına alg'an ma'kiyen sıyaqlı, Men de senin' balaların'dı neshe ret jıynamaqshı boldım, biraq sizler qa'lemedin'ler.

³⁸ Mine, u'yin'izdi Quday taslap ketip, ol qan'ırap qaladı.

³⁹ Sizlerge aytatug'ınım: «Qudaydın' atınan Keliwshi jarılqang'an!» – dep aytqanların'ızg'a deyin Meni qaytıp ko'rmeysizler.