Matta 22 bob
1 İysa olarg'a tımsallar menen so'zin dawam ettirip, bılay dedi:
2 – Aspan Patshalıg'ı bir patshanın' o'z balasına u'yleniw toyın beriwine uqsaydı.
3 Toyg'a mira't etilgenlerdi shaqırıp keliw ushın, patsha xızmetshilerin jiberipti. Biraq olardın' kelgisi kelmepti.
4 Sonda ol ja'ne basqa xızmetshilerin jiberip: «Mira't etilgenlerge aytın'lar: mine, men zıyapatımdı tayarlap qoydım, o'gizlerim de, semirtilgen mallarım da soyıldı, ha'mmesi de tayın. Toyg'a kelsin!» – dep aytıp qalıptı.
5 Biraq, mira't etilgenler onın' so'zine kewil awdarmaptı: kimisi egislik jerine, kimisi sawda-satıg'ına ketipti.
6 Al geybirewleri patshanın' xızmetshilerin uslap alıp, xorlap o'ltiripti.
7 Bunı esitken patsha qa'ha'rlenip, o'zinin' a'skerlerin jiberipti. Sol jınayatshılardı o'ltirtip, olardın' qalaların o'rtetip jiberipti.
8 Sonda ol o'zinin' xızmetshilerine: «Toydın' ası tayar, biraq mira't etilgenler ılayıqsız boldı.
9 Sonlıqtan endi sizler jol da'rbentlerine barıp, ushıratqanların'ızdın' ba'rin toyg'a shaqırıp kelin'ler», – depti.
10 Sonda xızmetshileri jollarg'a shıg'ıp, ushıratqanlarının' ba'rin de: jaqsısı bolsın, jamanı bolsın, shaqırıp jıynap kelipti. Toyxana qonaqlarg'a tolı bolıptı.
11 Patsha qonaqlardı ko'riwge kirgende, toy kiyimin kiymegen birewge ko'zi tu'sip,
12 og'an: «Ha'y, dostım, sen bul jerge toy kiyimisiz qalay kirgensen'?» – depti. Biraq ol u'ndemepti.
13 Sonda patsha xızmetshilerine buyırıp, bılay depti: «Mınanın' ayaq-qolın baylap, sırtqı qaran'g'ılıqqa taslan'lar! Ol sol jerde jılap, pushayman jeydi».
14 O'ytkeni mira't etilgenler ko'p, al tan'lap alıng'anlar az.
15 Sonda pariseyler sırtqa shıg'ıp ketip, İysanı qalay so'zinen tutıw tuwralı oylasa basladı.
16 Og'an Hirodtın' adamları menen birge o'zlerinin' sha'kirtlerin jiberip, bılay dep aytqızdı: – Ustaz! Bizler Senin' durıs adam ekenin'di ha'm jag'ımpazlıq etpeytug'ının'dı bilemiz. Sebebi Sen adamlardın' bet-ju'zine qaramaysan'.
17 Solay etip, bizlerge aytshı, Sen mınag'an qalay qaraysan': Rim patshası-Qaysarg'a salıq to'lew durıs pa yamasa nadurıs pa?
18 Biraq İysa olardın' haram niyetin bilip, olarg'a: – Ha'y, eki ju'zliler! Sizler Meni nege sınap atırsızlar?
19 Mag'an salıq ten'gesin ko'rsetin'ler, – dedi. Olar Og'an bir dinar a'kelip berdi.
20 Ol: – Bunda kimnin' su'wreti bar ha'm kimnin' atı jazılg'an? – dep soradı.
21 Olar: – Rim patshası-Qaysardın', – dep juwap berdi. Sonda İysa: – Olay bolsa, Qaysardın' haqın Qaysarg'a, Qudaydın' haqın Qudayg'a berin'ler, – dedi.
22 Olar bunı esitip, tan' qalıstı ha'm Onın' janınan ketip qaldı.
23 Qayta tiriliw joq, dewshi saddukeyler sol ku'ni İysag'a kelip, bılay dep soraw qoydı:
24 – Ustaz! Muwsa: «Birew balası bolmay o'lse, izinde qalg'an jesirine inisi u'ylenip, ag'asının' urpag'ın dawam ettirsin», – degen-g'o.
25 Bizde jeti ag'ayinli jigit bar edi. Solardın' birinshisi u'ylenip, qaytıs boldı, balası bolmag'anlıqtan, hayalı inisine qaldı.
26 Ekinshisine de, u'shinshisine de, ha'tte, jetinshisine de solay boldı.
27 Ba'rinen keyin hayaldın' o'zi de qaytıs boldı.
28 Al endi qayta tiriliwde ol jetewinin' ishinde qaysısının' hayalı boladı? Ol olardın' ha'mmesine de hayal bolg'an edi-g'o.
29 İysa olarg'a juwap qaytarıp bılay dedi: – Sizler Muxaddes Jazıwlardı da, Qudaydın' qu'diretin de bilmegenlikten aljasıp tursızlar.
30 O'ytkeni adamlar qayta tiriliwde u'ylenbeydi de, turmısqa da shıqpaydı, al aspandag'ı perishteler sıyaqlı boladı.
31 O'lgenlerdin' qayta tiriliwi tuwralı Qudaydın' sizlerge aytqanların oqımag'ansızlar ma?
32 Quday: «Men İbrayımnın' Qudayıman, Isaqtın' Qudayıman, Yaqıptın' Qudayıman», – degen-g'o. Quday o'lilerdin' emes, al tirilerdin' Qudayı.
33 Bunı esitken xalıq Onın' ta'liymatına tan' qaldı.
34 İysanın' saddukeylerdi so'yletpey taslag'anın esitken pariseyler bir jerge jıynalıstı.
35 Olardın' arasınan bir diniy mug'allim İysanı sınamaqshı bolıp,
36 Onnan: – Ustaz! Muxaddes Nızamdag'ı en' baslı buyrıq qaysı? – dep soradı.
37 İysa og'an: – «İyen' bolg'an Qudayın'dı pu'tkil ju'regin', pu'tkil janın', pu'tkil aqıl-oyın' menen su'y».
38 Bul – birinshi ha'm en' baslı buyrıq.
39 Ekinshisi de sol sıyaqlı: «O'zin'di su'ygenin' sıyaqlı, janın'dag'ı adamdı da su'y».
40 Pu'tkil Muxaddes Nızam da, payg'ambarlardın' Jazıwları da usı eki buyrıqqa tiykarlang'an, – dedi.
41 Pariseyler jıynalıp bolg'annan son', İysa olardan:
42 Masix haqqında ne oylaysızlar? Ol – kimnin' urpag'ı? – dep soradı. – Ol – Dawıttın' Urpag'ı, – dedi olar.
43 İysa olardan: – Olay bolsa, Dawıt Muxaddes Ruwxtan ilhamlanıp, Masixtı qalayınsha «İyem» dep atag'an? Ol bılay degen-g'o:
44 «İyem menin' İyeme ayttı: „Dushpanların'dı ayag'ın'nın' astına bastırmag'anımsha, Menin' on' jag'ımda otır!“»
45 Solay etip, Dawıt Onı «İyem» dep atag'an bolsa, Ol qalayınsha onın' urpag'ı boladı? – dep soradı.
46 Og'an hesh kim de juwap bere almadı ha'm sol ku'nnen baslap, Og'an soraw beriwge hesh kimnin' batılı barmadı.
