Matta 21 bob
1 Olar Erusalimge jaqınlap, Za'ytu'n tawının' etegindegi Betfage degen awılg'a kelgende, İysa eki sha'kirtin jumsap,
2 olarg'a bılay dedi: – Qarsı aldın'ızdag'ı awılg'a barın'lar. Og'an kiriwden-aq, baylawlı turg'an eshek penen gu'rreni tabasızlar. Olardı sheship alıp, Mag'an a'kelin'ler.
3 Eger birew sizlerge bir na'rse dese, sizler: «Olar İyemizge kerek», – dep juwap bersen'ler, ol olardı sol waqıtta-aq jiberedi.
4 Bul payg'ambar arqalı aytılg'an mına so'zlerdin' orınlanıwı ushın boldı:
5 «Sion qızınaaytın'lar: Mine, senin' Patshan' jas eshekke, yag'nıy gu'rrege minip, Kishipeyillik penen sag'an kiyatır!»
6 Sha'kirtleri barıp, İysanın' buyırg'anın isledi.
7 Olar eshekti gu'rresi menen alıp kelip, shapanların u'stine salg'anda, İysa gu'rrege minip aldı.
8 Xalıqtın' ko'pshiligi o'z shapanların jolg'a to'sep, basqaları tereklerden shaqa kesip alıp jolg'a jaydı.
9 Aldında ha'm izde erip kiyatırg'an xalıq quwanısıp: – Dawıttın' Urpag'ına hosanna! İyemizdin' atınan Keliwshi jarılqang'an! En' joqarıda hosanna! – dep baqırıstı.
10 İysa Erusalimge kirip kelgende, pu'tkil qala janlanıp: – Bul kim? – dep soradı.
11 Xalıq: – Bul – İysa, Galiladag'ı Nasıradan shıqqan payg'ambar, – desti
12 İysa İbadatxanag'a kirip, ol jerden satıwshılar menen alıwshılardın' ha'mmesin quwıp shıg'ardı da, aqsha almastırıwshılardın' stolların, kepter satıwshılardın' otırg'ıshların awdarıp taslap,
13 olarg'a: – «Menin' u'yim duwa etetug'ın u'y dep ataladı», – dep Muxaddes Jazıwda aytılg'an, al sizler onı qaraqshılardın' uyasına aylandırdın'lar! – dedi.
14 İbadatxanada İysanın' qasına soqırlar ha'm aqsaqlar kelgende, Ol olarg'a shıpa berdi.
15 Bas ruwxaniyler ha'm diniy mug'allimler Ol islegen ka'ramatlardı ha'm İbadatxanada: «Dawıttın' Urpag'ına hosanna!» – dep baqırısqan balalardı ko'rip, ashıwlanıp qaldı da,
16 Og'an: – Olardın' ne dep atırg'anın esitip tursan' ba? – dedi. İysa olarg'a: – Awa! Sizler: «Na'resteler menen emiziwli balalardın' awzınan O'zin'e maqtawlar aytqızdın'», – dep Muxaddes Jazıwda aytılg'andı hesh oqımag'ansızlar ma? – dedi.
17 Sonnan son', İysa olardı qaldırıp, qaladan shıg'ıp ketti ha'm Betaniyag'a barıp, sol jerde tu'nedi.
18 Erte azanda İysa qalag'a qaytıp kiyatırg'anda, ash boldı.
19 Jol boyında bir a'njir ag'ashın ko'rip, onın' qasına bardı. Biraq onda japıraqlarınan basqa hesh na'rse tappag'annan son', ag'ashqa: – Bunnan bılay, sende ma'n'gige hesh jemis o'spesin, – dedi. A'njir ag'ashı sol waqıtta-aq quwrap qaldı.
20 Sha'kirtleri bunı ko'rgende tan' qalısıp: – Bul a'njir ag'ashı qalayınsha da'rriw quwrap qaldı? – dep soradı.
21 İysa olarg'a juwap berip: – Sizlerge shının aytıp turman: eger gu'mansız isensen'ler, tek a'njir ag'ashına islegenimdey g'ana emes, al mına tawg'a: «Ornın'nan ko'terilip, ten'izge qula!» – desen'ler, sonday boladı.
22 Eger isenim menen duwa etsen'ler, ne sorasan'lar da, ha'mmesin alasızlar, – dedi.
23 İysa İbadatxanag'a kirip, ta'lim berip otırg'anda, Og'an bas ruwxaniyler menen xalıq aqsaqalları kelip: – Bul islerdi qanday biylik penen islep ju'rsen' ha'm bunday biylikti Sag'an kim berdi? – dep soradı.
24 İysa juwap qaytarıp: – Men de sizlerge bir soraw bereyin. Eger onın' juwabın bersen'ler, Men de sizlerge bul islerdi qanday biylik penen isleytug'ınımdı aytaman.
25 Yaqıya adamlardı shomıldırıw ushın qayaqtan biylik aldı? Aspannan ba yamasa adamlardan ba? – dedi. Olar o'z ara oylasıp: «Eger „aspannan“ desek, Ol bizlerge: „Sonda nege sizler og'an isenbedin'ler“, – deydi.
26 Al eger „Adamlardan“ dewge xalıqtan qorqamız: ha'mmesi de Yaqıyanı payg'ambar dep esaplaydı-g'o!» – desti.
27 Sonlıqtan olar İysag'a: – Bilmeymiz, – dep juwap berdi. Ol: – Men de sizlerge bul islerdi qanday biylik penen isleytug'ınımdı aytpayman, – dedi.
28 – Sizler qalay oylaysızlar: bir adamnın' eki ulı bolıptı. Ol birinshisine barıp: «Balam, sen bu'gin barıp, ju'zim bag'ında isle», – depti.
29 Ol: «Barmayman», – dep juwap beripti. Biraq son'ınan o'kinip, barıptı.
30 Son' a'kesi ekinshi ulına barıp, og'an da solay depti. Ol: «Yaqshı, taqsır, baraman», – dep juwap beripti, biraq barmaptı.
31 Usı ekewinin' qaysısı a'kesinin' tilegin orınlag'an boladı? – dep soradı İysa. – Birinshisi, – dep juwap qaytardı olar. İysa olarg'a bılay dedi: – Sizlerge shının aytıp turman: salıqshılar ha'm buzıq hayallar Qudaydın' Patshalıg'ına sizlerden burın kiredi.
32 O'ytkeni Yaqıya sizlerge haq joldı ko'rsetiw ushın kelgen edi, biraq sizler og'an isenbedin'ler. Al salıqshılar menen buzıq hayallar og'an isendi, biraq sizler bunı ko'rgennen keyin de ta'wbe etpedin'ler ha'm isenbedin'ler.
33 – Endi basqa bir tımsaldı tın'lan'lar: bir u'y iyesi bolıptı. Ol ju'zim bag'ın otırg'ızıp, onı diywal menen qorshaptı, ju'zimnin' suwın sıg'ıwg'a arnalg'an shuqır qazıp, gu'zet minarasın ornatıptı. Son'ınan bag'ın diyxanlarg'a ijarag'a berip, o'zi uzaq jerge ketip qalıptı.
34 Zu'ra'a't jıynaytug'ın ma'wsim jaqınlag'anda, ol o'zine tiyisli u'lesin alıw ushın, diyxanlarg'a xızmetshilerin jiberipti.
35 Diyxanlar onın' xızmetshilerin uslap alıp, olardın' birewin sabap, ekinshisin o'ltirip, al ja'ne birewin tas penen urıptı.
36 Son'ınan bag'dın' iyesi burıng'ıdan da ko'p basqa xızmetshilerin jibergende, olarg'a da solay islepti.
37 En' aqırında ol: «Ulımdı hu'rmet eter» dep, olarg'a o'z ulın jiberipti.
38 Biraq diyxanlar onın' ulın ko'rip, bir-birine: «Bul – miyrasxor-g'o. Ju'rin'ler, onı o'ltirip, miyras mu'lkine iye bolayıq», – desipti.
39 Olar onı uslap alıp, ju'zim bag'ınan sırtqa shıg'arıp o'ltiripti.
40 Endi ju'zim bag'ının' iyesi kelgende, sol diyxanlarg'a ne qıladı?
41 Olar İysag'a: – Ol bul jawızlardı rehimsiz o'lim menen o'ltiredi de, ju'zim bag'ın waqtında jemisin berip turatug'ın basqa diyxanlarg'a ijarag'a beredi, – dedi.
42 İysa olarg'a bılay dedi: – Sizler Muxaddes Jazıwlarda mına so'zlerdi oqımag'ansızlar ma? «Qurılısshılardın' kereksiz dep taslag'an tası, U'ydin' mu'yeshinin' tiykarg'ı tası boldı. İyemiz qılg'an bul is, Ko'zimizge a'jayıp ko'rindi!»
43 Sonlıqtan Menin' sizlerge aytatug'ınım: Quday O'z Patshalıg'ın sizlerden tartıp aladı da, onı jemisin berip turatug'ın xalıqqa beredi.
44 Sol tasqa tu'sken adamnın' shıl-pa'rshesi shıg'adı. Tas kimnin' u'stine tu'sse, sonı jenship taslaydı.
45 Bas ruwxaniyler menen pariseyler İysanın' aytqan tımsalların esitkennen son', Onın' o'zleri haqqında aytqanın tu'sinip,
46 Onı qolg'a alıwg'a tırıstı. Biraq xalıqtan qorqtı, sebebi xalıq Onı payg'ambar dep sanaytug'ın edi.
